ជីវិតកម្សាន្ដ

តារាកំប្លែង ខ្ញុង ត្រូវម្ចាស់បំណុលព្រមានប្ដឹង

បានផុស

១១ ខែ មុន

នៅ

ថ្ងៃចន្ទ ២២ មករា ២០២៤

ដោយ

តារាកំប្លែងអ្នកនាង ស្រេង សុកាន់ដា ហៅ ខ្ញុង ជាថ្មីម្តងទៀត ត្រូវបានម្ចាស់បំណុលចេញមុខរម្លឹកពាក់ព័ន្ធរឿងបំណុល ខណៈតារាស្រីរូបនេះ នៅមិនទាន់រើបម្រាស់ខ្លួនរួចផុតពីរឿងនេះនៅឡើយ។ ដោយឡែក ថ្មីៗនេះ ក៏ត្រូវបានម្ចាស់បំណុលមួយចំនួន ព្រមានដាក់ពាក្យបណ្ដឹងទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តួយ៉ាងកាលពីយប់ថ្ងៃទី ២១ ខែមករា ឆ្នាំ ២០២៣ នៅលើបណ្ដាញសង្គមហ្វេសប៊ុករបស់តារាសម្ដែងលោក ម៉ា ដូណា ក៏បានស៊ែរការផុសមួយភ្ជាប់ខ្លឹមសារខ្លីថា «តោះបង Dara Rath លេងមួយក្បាច់ជាមួយវាអត់ ខ្ញុំមាន ៣ នាក់ ចាំដាក់ប្តឹងជាមួយខ្ញុំដែរ»។ ចំពោះការលើកឡើងរបស់លោក ម៉ា ដូណា នេះ ស្របពេលលោក ផាត់ តារារ័ត្ន ស្ថាបនិកគ្រួសារតារាកម្ពុជា បានបង្ហោះរម្លឹកដល់តារាកំប្លែង ខ្ញុង ជុំវិញរឿងជំពាក់លុយ។

លោក តារារ័ត្ន បានលើកឡើងខ្លឹមសារខ្លីថា «ខ្ញុង ស្រួលបួលជាមួយខ្ញុំតិច អាសូរតែយកការ ឬ ឲ្យសងដុំ កុំឲ្យអស់ទ្រាំ សិរីមង្គល សិរីមង្គល»។ យ៉ាងណា បន្ទាប់ពីការបង្ហោះបែបនេះ គេឃើញមានម្ចាស់បំណុលមួយចំនួន បានចេញមករម្លឹកឲ្យតារាកំប្លែង ខ្ញុង សងលុយផងដែរ។

ចំណែកលោក ម៉ា ដូណា បានបញ្ជាក់បន្ថែមថា រហូតមកដល់ពេលនេះ តារាកំប្លែង ខ្ញុង នៅជំពាក់លុយខ្លួនចំនួនជិត ៥ ម៉ឺនដុល្លារ។ លោកថា «តោះ ដាក់មួយបងឲ្យវាចូលគុក ចេញពីគុកហើយ ដាក់បន្តទៀត ឲ្យវាចូលគុកបន្ត រហូតវាព្រម…..ព្រោះវាពូកែដ្រាម៉ាណាស់»។

ប្រាកដណាស់ ដោយសារតែបញ្ហា នៃការជំពាក់បំណុលនេះហើយ ទើបអ្នកនាង ខ្ញុង បានធ្លាក់ខ្លួនដល់ចំណុចសូន្យ ព្រោះការលក់ទ្រព្យសម្បត្តិអស់ខ្ទេចខ្ទី គ្មានសល់ពីខ្លួន។ ប៉ុន្តែអ្វីដែលគួរឲ្យសរសើរលើការតស៊ូនោះ បច្ចុប្បន្ន ខ្ញុង និងស្វាមី បានខិតខំក្នុងការរកស៊ី ស្ទើរគ្មានពេលសម្រាក ខណៈអាជីពកំប្លែងក៏ចាប់ផ្ដើមលេចមុខឡើងវិញនៅក្នុងក្រុមលោក សុវណ្ណរិទ្ធី ហៅលោកតា វ៉ិចទ័រ៕

អត្ថបទ ៖ ចាន់រ៉ា