ជីវិតកម្សាន្ដ

តួលោកតាក្នុងរឿង “Squid Game” លាឈប់ពីភាពយន្តថ្មី ក្រោយជាប់ក្ដីក្ដាំបៀតបៀនកេរខ្មាស

បានផុស

១២ ខែ មុន

នៅ

ថ្ងៃចន្ទ ៥ កុម្ភៈ ២០២៤

ដោយ

នៅថ្ងៃទី ០៥ ខែកុម្ភៈ អ្នកតំណាងរបស់ Lotte Entertainment បានប្រកាសថា លោកតា O Yeong-su បានសម្រេចចិត្តលាឈប់ពីភាពយន្តក្រោមចំណងជើងថា Big Family ខណៈដែល Lee Soon Jae នឹងទទួលតួនាទីជំនួសគាត់វិញ។ យោងតាមការចុះផ្សាយពីសារព័ត៌មាន Allkpop បានបញ្ចាក់មុននេះបន្តិចប៉ុណ្ណោះ។

Big Family គឺជាខ្សែភាពយន្តថ្មីដែលដឹកនាំដោយអ្នកដឹកនាំរឿង Yang Woo Seok នៃរឿង “The Attorney” និង “Steel Rain” ។ ភាពយន្តនេះរៀបរាប់ពីដំណើររឿងចៅៗគួរឲ្យស្រលាញ់មកលេងម្ចាស់ហាងនំប៉ាវមួយឈ្មោះថា Pyeong Man Ok ដែលអាជីវកម្មគ្រួសារជិតត្រូវបញ្ចប់ដោយសារតែកូនប្រុសរបស់គាត់បានបួសជាព្រះសង្ឃ។ ខ្សែភាពយន្តនេះក៏មានការចូលរួមសម្តែងដោយ Kim Yun Seok, Lee Seung Gi, និង Kang Han Na ផងដែរ។

កាលពីខែវិច្ឆិកា ឆ្នាំ ២០២២ យោងតាមរបាយការណ៍បានបញ្ចាក់ថា តារាសម្ដែងវ័យចំណាស់ O Yeong-su ត្រូវបានចោទប្រកាន់ពីបទមានទំនាក់ទំនងរាងកាយមិនសមរម្យជាមួយស្ត្រីម្នាក់ក្នុងឆ្នាំ ២០១៧។ ភាគីរបស់ O Yeong-su បានបដិសេធការចោទប្រកាន់ក្នុងអំឡុងពេលស៊ើបអង្កេតរបស់ព្រះរាជអាជ្ញាដោយនិយាយថា “ខ្ញុំគ្រាន់តែកាន់ដៃនាងដើម្បីណែនាំផ្លូវ” ។ ប៉ុន្តែកាលពីពីពេលថ្មីៗនេះផងដែរ អយ្យការបានស្នើឲ្យកាត់ទោស O Yeong-su ឲ្យជាប់ពន្ធនាគាររយៈពេលមួយឆ្នាំ ក្រោមការចោទប្រកាន់ពីបទរំលោភបំពាន ហើយសវនាការកាត់ទោសគាត់គ្រោងនឹងធ្វើនៅថ្ងៃទី ១៥ ខែមីនា ឆ្នាំ ២០២៤។

សូមជម្រាបជូនថា O Yeong-su បានបង្ហាញខ្លួននៅក្នុងស៊េរីរឿង Squid Game របស់ Netflix ក្នុងនាមជា Oh Il Nam ដែលទទួលរងពីដុំសាច់ក្នុងខួរក្បាល ហើយបានឈ្នះពានរង្វាន់តារាសម្តែងឆ្នើមក្នុងផ្នែកទូរទស្សន៍នៅឯ Golden Globe Awards នៅសហរដ្ឋអាមេរិកក្នុងឆ្នាំ ២០២២៕