ជីវិតកម្សាន្ដ

ខាត់ សុឃីម កំពុងពិចារណារឿងឈរឈ្មោះជាប្រធានសមាគមសិល្បករអាណត្តិថ្មី ខណៈមានការជំរុញពីអ្នកគាំទ្រ

បានផុស

១១ ខែ មុន

នៅ

ថ្ងៃសៅរ៍ ១៧ កុម្ភៈ ២០២៤

ដោយ

ស្របពេលមានអ្នកគាំទ្រ និងមហាជន ព្រមទាំងសិល្បករ-សិល្បការិនីជាច្រើន បាននាំគ្នាផុសផុលជំរុញលើកទឹកចិត្តឲ្យតារាពហុជំនាញអ្នកនាង ខាត់ សុឃីម ឈរឈ្មោះក្នុងការបោះឆ្នោតធ្វើជាប្រធានសមាគមសិល្បករខ្មែរសម្រាប់អាណត្តិថ្មី ឆ្នាំ ២០២៤ នេះ តារាស្រីរូបនេះ បញ្ជាក់ថា «បើមានការគាំទ្រ និងទុកចិត្តពីបងប្អូនសិល្បករ នាងខ្ញុំ នឹងគិតគូរស្វែងយល់បន្ថែមចំពោះរឿងនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់នៅលើបណ្ដាញសង្គមហ្វេសប៊ុកនាពេលប៉ុន្មានថ្ងៃនេះ គេសង្កេតឃើញមានការបង្ហោះចែករំលែកយ៉ាងព្រោងព្រាតតាមរយៈការផ្តល់ទំនុកចិត្តដោយជំរុញឲ្យអ្នកនាង ខាត់ សុឃីម ឈរឈ្មោះបោះឆ្នោតក្នុងអាណត្តិនេះ។ មូលហេតុដោយសារគេមើលឃើញពីគុណសម្បត្តិអ្នកនាង ខាត់ សុឃីម គឺជាមនុស្សស្រឡាញ់រាប់អានស្មើៗ គ្នា មិនលំអៀង។ លើសពីនេះទៀត អ្នកនាង ខាត់ សុឃីម មានចិត្តអភិរក្សអភិវឌ្ឍន៍សិល្បៈវប្បធម៌ខ្មែរយ៉ាងពិតប្រាកដ និងមានសមត្ថភាពបទពិសោធច្រើនឆ្នាំទៅលើជំនាញសិល្បៈច្រើនទម្រង់ជាដើម។

ឆ្លើយតបនឹងការគាំទ្ររបស់មហាជនខាងលើនេះ អ្នកនាង ខាត់ សុឃីម លើកឡើងថា «សូមថ្លែងអំណរអរគុណដល់ ឯកឧត្ដម លោកជំទាវ លោកឧកញ៉ា បងប្អូនមិត្តសិល្បៈ បងប្អូនទស្សនិកជន បណ្ដាញសារព័ត៌មានទាំងអស់ បង្ហោះសារគាំទ្រនាងខ្ញុំជាការលើកទឹកចិត្តដ៏ល្អរបស់បងប្អូន»។

តារាពហុជំនាញ ខាត់ សុឃីម បញ្ជាក់ថា «នាងខ្ញុំ ពិតជាសប្បាយចិត្តមែនទែនដែលប្អូនៗ របស់ខ្ញុំ ក៏ដូចជាទស្សនិកជន បានគាំទ្រនាងខ្ញុំផងដែរ រឿងឈរឈ្មោះជាប្រធានសមាគមសិល្បករខ្មែរ នាងខ្ញុំមិនបានដឹង ឬ ត្រៀមទុកមុនធ្វើនោះទេ ប៉ុន្តែបើមានការគាំទ្រ និងទុកចិត្តពីបងប្អូនសិល្បករទស្សនិកជន នាងខ្ញុំ នឹងគិតគូរស្វែងយល់បន្ថែមចំពោះរឿងនេះ»។

គួរបញ្ជាក់ដែរថា អ្នកនាង ចន ច័ន្ទលក្ខិណា ដែលជាប្រធានសមាគមសិល្បករខ្មែរអាណត្តិចាស់ បានប្រកាសបញ្ចប់អាណត្តិរបស់ខ្លួនពីប្រធាន«សមាគមសិល្បករខ្មែរ» និងកំពុងត្រៀមរៀបចំការបោះឆ្នោតអាណត្តិថ្មីនៅក្នុងឆ្នាំ ២០២៤ នេះ៕

អត្ថបទ ៖ ចាន់រ៉ា