មន្រ្តីជាន់ខ្ពស់​​មួយរូប ប្រាប់ពីលក្ខណ:​សម្បត្តិ​បុគ្គល​ស័ក្តិសម​​ដឹកនាំ​ប្រធានសមាគមសិល្បករខ្មែរ

សង្កេតឃើញប៉ុន្មានថ្ងៃមកមានការលើកឡើងពីសមាសភាពបេក្ខភាព ដែលនឹងត្រូវឈរឈ្មោះធ្វើជាប្រធានសមាគមសិល្បករខ្មែរនៅអាណត្តិថ្មី បន្ទាប់អ្នកនាង ចន ច័ន្ទលក្ខិណា ជាប្រធានសមាគម​សិល្បករខ្មែរបច្ចុប្បន្ន​នឹង​បញ្ចប់អាណត្តិនាពេលខាងមុខនេះ។

លោក ជុំ កុសល អតីតពិធីករទូរទស្សន៍ ​និង​បច្ចុប្បន្ន​ជា​រដ្ឋលេខាធិការក្រសួងព័ត៌មានបាន​ផ្តល់យោបល់ប៉ុន្មានចំណុចចំពោះបេក្ខភាពសាកសមត្រូវធ្វើជាប្រធានសមាគម។

លោក ជុំ កុសល បាន​លើកឡើងថា ក្រោយ​មានការលើកយកបេក្ខជនឈរជាប្រធានសមាគមសិល្បករខ្មែរមានច្រើននាក់ និងចង់បានការបោះឆ្នោតគាំទ្រឲ្យធ្វើជាប្រធានបន្តពីអ្នកស្រី ចន ចន្ទលក្ខិណា។ ក្នុងនាមលោកជាស្ថាបនិក​សមាគមមួយរូបជាមួយលោក សយ សុភាព ,លោកខៀវ កូឡា និងលោកជឺ ហៃ ជាយូរ​ឆ្នាំមកហើយនោះ លោកបញ្ជាក់ថា ការជ្រើសរើសប្រធានដឹកនាំសមាគម សូមសំឡឹងមើលបេក្ខជនដែលមានលក្ខណ:សម្បត្តិដូចខាងក្រោម៖

១. មានចំណេះដឹងទូទៅ យល់ដឹងពីកិច្ចការសង្គមបានច្រើន យល់ពីសិល្ប: វប្បធម៌ ទំនៀមទម្លាប់ប្រពៃណីខ្មែរ។
២. មានសីលធម៌រស់នៅថ្លៃថ្នូរមិនមានរឿងអាស្រូវផ្ទាល់ខ្លួន។
៣.ជាមនុស្សមានការទទួលខុសត្រូវខ្ពស់ មានឆន្ទ:ការងារច្បាស់លាស់ មានទំនាក់ទំនងសាធារណ:បានល្អនិងមានភាពចាស់ទុំចិត្តគំនិត។

លោក ជុំ កុសល បានលើកឡើង​ប្រសាសន៍របស់ប្រមុខ​ថ្នាក់ដឹកនាំជាតិ​ថា៖ «បង្កើតសមាគមបានហើយត្រូវដឹកនាំឲ្យបានល្អនិងមាននិរន្តរភាព។ ត្រូវដឹងថាការបង្កើតជាការងាយទេ ប៉ុន្តែការដឹកនាំមិនមែនជាការងាយឡើយ»៕

អត្ថបទ៖ ចាន់រ៉ា