ជីវិតកម្សាន្ដ

Vj អាឡាស្កូ បញ្ជាក់ស្ថានភាពជំងឺក្រោយសម្ងំព្យាបាលជិត ៣ ខែ

បានផុស

៧ ខែ មុន

នៅ

ថ្ងៃអង្គារ ២០ កុម្ភៈ ២០២៤

ដោយ

ដូចដែលមហាជនបានដឹងហើយថាតារាប្រុសរូបសង្ហា Vj អាឡាស្កូ កាលពីថ្មីៗកន្លងទៅបានជួបបញ្ហាគ្រោះថ្នាក់ចរាចរណ៍ត្រូវរថយន្តបុកបណ្តាលឲ្យរបួសផ្នែកក្បាល និងដៃបង្កការព្រួយបារម្ភសម្រាប់អ្នកគាំទ្រ និងមិត្តភក្តិក្នុងរង្វង់សិល្បៈដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាបន្ទាប់ពីជួបគ្រោះថ្នាក់ខាងលើតារាប្រុសរូបនេះបានបាត់វត្តមានមួយរយៈធំពីសិល្បៈ ខណៈមហាជន និងអ្នកគាំទ្រមួយចំនួនចង់ដឹងពីសុខទុក្ខរបស់វីជេអាឡាស្កូ ផងដែរ។ បញ្ជាក់ពីស្ថានភាពជំងឺ អាឡាស្កូ ប្រាប់ «កម្ពុជាថ្មី» ថា មកដល់ពេលនេះលោកបានជាសះស្បើយប្រមាណ ៨០ភាគរយហើយ ខណៈដៃក៏អាចវិលរកសភាពដូចដើមវិញផងដែរ។

Vj អាឡាស្កូ បានបញ្ជាក់ថា «ខ្ញុំក៏ចង់ជំរាបដល់ក្រុមហ៊ុន និងបងប្អូនមហាជនថា ស្ថានភាពដៃរបស់ខ្ញុំគ្រាន់បើស្រួលបួល ៨០% ហើយតែនៅលើកឡើងលើមិនសូវបានយូរ ព្រោះសសៃរមិនទាន់សាំជាមួយគល់ឆ្អឹងដូចដើម ដូច្នេះខ្ញុំអាចធ្វើការបាននេះជាដំណឹងល្អរបស់ខ្ញុំ ក្រោយព្យាយាមព្យាបាលជិត ៣ខែបន្ទាប់ពីគ្រោះថ្នាក់ចរាចរណ៍កាលពីថ្ងៃទី១៦ ខែវិច្ឆិកា ឆ្នាំ២០២៣ កន្លងទៅ។

លោកនិយាយបន្តថា ដំបូងឡើយលោកស្មានតែខូចដៃម្ខាងបាត់ទៅហើយព្រោះក្រោយគ្រោះថ្នាក់វាចាប់ផ្តើមស្វិតធ្វើអ្វីមិនកើតទេតែដោយសារការព្យាយាមរកគ្រប់មធ្យោបាយក្នុងការព្យាបាលទើបអាចវិលមកសភាពល្អប្រសើរឡើងវិញ។ ចំណែកឯការប៉ះទង្វិចត្រង់ក្បាលលោក ក៏យកចិត្តទុកដាក់តាមដានស្គែនមើលជាប្រចាំ។

សូមបញ្ជាក់ថា បន្ទាប់ពីការអាក់ខានសិល្បៈអស់ពេលប្រមាណ ២ឆ្នាំមកនោះ កាលពីថ្មីៗ អាឡាស្កូ បានបង្ហាញខ្លួនវិលរកអាជីពសិល្បៈវិញហើយ ខណៈបច្ចុប្បន្នកំពុងចាប់ផ្តើមការងារមួយចំនួននៅតាមបណ្តាកម្មវិធី និងក្រុមហ៊ុននានាជាដើម។ ចំណុចនេះ ក៏ត្រូវបានគេមើលឃើញថា ថ្វីត្បិតកន្លងមកលោកអវត្តមានសិល្បៈក៏ពិតមែនតែទីផ្សារ និងការគាំទ្រនៅតែរក្សាបានដូចដើម៕

អត្ថបទ៖ ចាន់រ៉ា