ជីវិតកម្សាន្ដ

តារាសិចស៊ី វ៉ាន់ វល័ក្ខ លេចវត្តមានសម្ដែងជាថ្មី ក្រោយបាត់ពីសិល្បៈមួយរយៈធំ

បានផុស

១២ ខែ មុន

នៅ

ថ្ងៃពុធ ២១ កុម្ភៈ ២០២៤

ដោយ

តារាសម្ដែងនិយមចូលចិត្តស្លៀកពាក់សិចស៊ី កញ្ញា វ៉ាន់ វល័ក្ខ ក្រោយសាងភាពល្បីឈ្មោះនៅលើវិថីសិល្បៈរយៈពេលជាច្រើនឆ្នាំកន្លងមក ស្រាប់តែបាត់វត្តមានពីវិស័យមួយនេះប្រមាណ ២ ឬ ៣ ឆ្នាំ មកហើយ ខណៈមានទស្សនិកជនមួយចំនួនបានសួរនាំចង់ដឹងពីរឿងរ៉ាវនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាត់វត្តមានពីអាជីពសិល្បៈមួយរយៈពេលធំរបស់តារាស្រី កញ្ញា វ៉ាន់ វល័ក្ខ បានធ្វើឲ្យទស្សនិកជនខ្លះយល់ថា ទំនងតារាស្រីរូបនេះ បានសម្រេចចិត្តឈប់ពីវិស័យមួយនេះហើយ ខណៈកន្លងមកកត់សម្គាល់ឃើញ វល័ក្ខ ជាតារាស្រីចូលចិត្តភាពហ៊ឺហា និងមានលុយចាយពេញដៃសមល្អដែលធ្វើឲ្យនាងចាយមួយជីវិតរស់នៅយ៉ាងមានសេចក្តីសុខជាមួយរបស់ទ្រព្យកើតចេញពីកម្លាំងញើសឈាម។

ដោយឡែករឿងដែលអ្នកគាំទ្រចាប់អារម្មណ៍ថ្មីៗ នេះ ស្រាប់តែលេចវត្តមាន កញ្ញា វ៉ាន់ វល័ក្ខ សម្តែងជាថ្មីក្នុង MV បទចម្រៀង និងភាពយន្តផងដែរ។ ប្រការនេះ បានធ្វើឲ្យមហាជនយល់ថា វល័ក្ខ នៅតែស្រលាញ់អាជីពរបស់ខ្លួនដែលបានខំប្រឹងសាងកេរ្តិ៍ឈ្មោះយ៉ាងលំបាកជាច្រើនឆ្នាំកន្លងមកនោះ។

ប្រាប់ កម្ពុជាថ្មី តាមសារអេឡិចត្រូនិក កញ្ញា វ៉ាន់ វល័ក្ខ បានបញ្ជាក់ថា អាជីពសិល្បៈនាងចាប់ផ្ដើមទទួលឡើងជាធម្មតា គ្រាន់តែមិនទាន់សូវមានពេលគ្រប់គ្រាន់ ព្រោះនៅរវល់ការងាររកស៊ីផ្ទាល់ខ្លួនតាមអនឡាញ។ នាងថា ដំបូងៗ នាងទទួលថតតែ MV ចម្រៀង និងឃ្លីបរឿងខ្លីៗ សិន ចាំមានពេលវេលាគ្រប់គ្រាន់ ទើបទទួលថតរឿងភាគដូចមុនវិញ។ ចំណែកឯមូលហេតុបាត់វត្តមានពីសិល្បៈមួយរយៈពេល ត្រូវបានស្រីស្អាត វ៉ាន់ វល័ក្ខ បញ្ជាក់បន្ថែមខ្លីថា ដោយសាររវល់ផង និងចាប់តាំងពីជាប់គាំងអំឡុងពេលផ្ទុះកូវីដ-១៩ ទើបនាងហាក់រយាលពីអាជីពសិល្បៈតែម្ដង៕

អត្ថបទ ៖ ចាន់រ៉ា