ជីវិតកម្សាន្ដ

យឿន ពិសី ប្រកាសដំណឹងលែងលះជាមួយភរិយា យ៉ាងភ្ញាក់ផ្អើល

បានផុស

៩ ខែ មុន

នៅ

ថ្ងៃព្រហស្បតិ៍ ២២ កុម្ភៈ ២០២៤

ដោយ

តារាចម្រៀង និងជាម្ចាស់ជ័យលាភីលេខ ១ ក្នុងកម្មវិធី Cambodia’s Got Talent រដូវកាលទី ១ លោក យឿន ពិសី បានធ្វើឲ្យមហាជន និងអ្នកគាំទ្រ មានការភ្ញាក់ផ្អើលគ្រប់គ្នា ខណៈសុខៗ ស្រាប់តែតារាវ័យក្មេងរូបនេះ ប្រកាសចែកផ្លូវជាមួយភរិយាដោយមិនដឹងមូលហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេនៅចាំបានថា តារាចម្រៀង និងជាម្ចាស់ពានរង្វាន់ Cambodia’s Got Talent លោក យឿន ពិសី និងភរិយា បានសម្រេចចូលរោងការតាមប្រពៃណី កាលពីថ្ងៃទី ១៧ ខែមករា ឆ្នាំ ២០២១ ដែលគិតមកទល់ពេលនេះ មានរយៈពេលប្រមាណជាង ៣ ឆ្នាំ ហើយ ខណៈអ្នកទាំងពីរ ក៏ទទួលបានចំណងដៃកូន ២ នាក់ ផងដែរ។

លោក យឿន ពិសី បានប្រកាសពីការបែកបាក់ឲ្យដឹងថា «ជម្រាបសួរ ពុកម៉ែបងប្អូន ខ្ញុំបាទ យឿន ពិសី សូមជម្រាបជូនពុកម៉ែបងប្អូនដែលជា Fan គាំទ្ររូបខ្ញុំបាទទាំងអស់ ឲ្យបានជ្រាបថា ចាប់ពីពេលនេះតទៅ ខ្ញុំបាទ សូមបញ្ចប់ជីវិតគ្រួសារដែលមានឈ្មោះជាប្ដី-ប្រពន្ធជាមួយភរិយាខ្ញុំ ចាប់ពីពេលនេះតទៅ ចំពោះហេតុផល ខ្ញុំសុំមិនបញ្ចេញបញ្ចូលអ្វីច្រើនទេ ព្រោះខ្ញុំមិនចង់បំពុលសង្គម»។

យឿន ពិសី និយាយបន្តថា លោកក៏មិនចង់ឲ្យសង្គមមួយនេះច្របូកច្របល់ដោយសាររឿងអស់ទាំងនេះទៀតដែរ ប៉ុន្តែសម្រាប់កូនៗ ទាំងពីររបស់លោក គឺលោកនឹងធានាចិញ្ចឹមពួកគាត់ និងផ្ដល់អាហារកិច្ចជូនគាត់ចាប់ពីពេលនេះតទៅរហូតដល់គាត់មានអាយុ ១៨ ឆ្នាំ សង្ឃឹមថាគ្រប់យ៉ាង នឹងរក្សាបាននូវសន្តិភាពផ្លូវចិត្តរៀងខ្លួន ដោយគ្មានការដាក់សម្ពាធ ឬ បិទសិទ្ធិ ឬ តាមរំខានពីភាគីណាមួយទៀតឡើយ។

តារាចម្រៀង យឿន ពិសី បានបញ្ជាក់បន្ថែមថា «ខ្លឹមសារដែលខ្ញុំបង្ហោះនៅថ្ងៃនេះ ខ្ញុំសុំស្ងប់ស្ងាត់ចាប់ពីពេលនេះតទៅ ចំពោះរឿងគ្រួសារជីវិតជាប្ដី-ប្រពន្ធមួយនេះ ខ្ញុំសុំមិនបកស្រាយអ្វីច្រើនទៀតទេ ខ្ញុំបាទក៏សូមអរគុណពុកម៉ែបងប្អូនដោយក្ដីគោរព»។ ដំណឹងនេះបានធ្វើឲ្យអ្នកគាំទ្រមួយចំនួនធំ មានការភ្ញាក់ផ្អើល ព្រោះកន្លងមកគេតែងឃើញប្តីប្រពន្ធអ្នកទាំងពីរមានភាពផ្អែមល្ហែម និងស្រលាញ់គ្នាណាស់៕

អត្ថបទ ៖ ចាន់រ៉ា