សមាគមសិល្បករខ្មែរ បំភ្លឺករណីចោទប្រកាន់ថា បក្សពួកនិយម អសកម្ម និងលេបលុយមូនិធិ

សមាគមសិល្បករខ្មែរ នៅយប់ថ្ងៃទី២៣ ខែកុម្ភ: ឆ្នាំ២០២៤ បានចេញលិខិតស្រាយបំភ្លឺក៏ដូចជាឆ្លេីយតបទៅកាន់ លោក លាន អាហ្វ្រីគីនីន និងលោក គួច ខេវិន ដោយច្រានចោលការចោទប្រកាន់ដែលថា សមាគមសិល្បករខ្មែរ បក្សពួកនិយម មានភាពអសកម្ម និងលេបលុយមូនិធិជាដើមនោះ ជាការលើកឡើងដោយគ្មានដ្ឋានច្បាស់លាស់ និងផ្ទុយពីការពិត។

តាមរយៈលិខិតនេះ សមាគមបញ្ជាក់ថា ក្នុងអាណត្តិទី៦ សមាគមសិល្បករខ្មែរ បានខិតខំយ៉ាងខ្ជាប់ខ្ជួន ក្នុងការបំពេញតួនាទីជាសេនាធិកា របស់រាជរដ្ឋាភិបាល ក៏ដូចជាក្រសួងវប្បធម៌ និងវិចិត្រសិល្ប: ក្នុងន័យគាំពារដល់សិល្បករ ជាពិសេស សិល្បករចាស់ជរាពិការភាព មានជំងឺ និងទីទ័លក្រ។

ជាមួយគ្នានេះ សមាគមសិល្បករខ្មែរ ក៏បានសម្តែងនូវការសោកស្តាយយ៉ាងខ្លាំង ចំពោះការលើកឡើងដោយគ្មានមូលដ្ឋាន នាំឱ្យសាធារណ:មតិមានការភ័ណ្ឌច្រឡំ និងសង្ស័យមកលើសមាគមសិល្បករខ្មែរ។

សមាគមបានខិតខំអស់ពីសមត្ថភាពនិងលទ្ធភាព ក្នុងការគាំពារដល់ពួកគាត់ដោយមិនប្រកាន់និន្នាការ ឬ បក្សពួកនិយមដូចការលើកឡើងរបស់លោកទាំងពីរនោះឡើយ។ ជាក់ស្តែងបច្ចុប្បន្នមានសិល្បករចាស់ជរា ពិការភាព មានជំងឺ និងខ្វះខាតជីវភាពច្រើនកំពុងគាំពារផ្នែកជីវភាពជាគ្រឿងឧប្បភោគ បរិភោគនិងថវិកាយ៉ាងទៀតទាត់រាល់ខែ ក្នុងរយ:ពេល ៦ឆ្នាំ កន្លងមកនេះ។ ទន្ទឹមនេះ សមាគមក៏បាននិងកំពុងផ្តល់សេវាជាច្រើនជាផ្នែក គាំពារដល់សិល្បករ ដែលក្នុងនោះក៏មានសេវាផ្នែកផ្លូវច្បាប់ផងដែរ៕

អត្ថបទ៖ ចាន់រ៉ា