ឈួន សុវណ្ណឆៃ ស្នើឱ្យមហាជនចូលរួមគាំទ្រកសិផល បន្លែ-ផ្លែឈើ របស់កសិករខ្មែរ

បន្ទាប់ពីមានការចែករំលែកនូវវីដេអូរបស់កសិករខ្មែរ ដែលត្អូញត្អែរពីផលលំបាកជុំវិញ រឿងគ្មានការគាំទ្រកសិផលបន្លែនៅលើទីផ្សានោះ តារាចម្រៀង និងជាតារាសម្តែងចាស់វស្សា អ្នកនាង ឈួន សុវណ្ណឆៃ បានចេញមុខដោយធ្វើការអំពាវនាវឱ្យមហាជនចូលរួមគាំទ្រ បន្លែ និងផ្លែឈើ របស់ករសិករខ្មែរ។

តារាស្រី អ្នកនាង ឈួន សុវណ្ណឆៃ បានលើកឡើងដូច្នេះថា «របស់ធម្មជាតិខ្មែរមិនជួយគាំទ្ររទេ ខុសត្រូវបន្តិចបន្តួចទិញអាគីមីរួចនាំយកលុយដែលខំសន្សំបានយកទៅឱ្យពេទ្យអត់យល់ខ្មែរ នេះហើយជាកាជំរុញឱ្យខ្មែរអត់ការងារធ្វើ ហើយរត់ស៊ីឈ្នួលទៅស្រុកគេ ហ៊ឺស​…!»។ អ្នកនាង បន្តថា «ថ្ងៃណាឆ្នាំណាទើបបំបាត់ភាពពុករលួយបានគ្រាន់តែជួយគាំទ្របន្លែផ្លែរឈើខ្មែរវាងាប់មែន»។

ចំណែក តារាកំប្លែង លោក ម៉ា ដូណា ក៏បានបញ្ចេញមតិហួសចិត្តដែរថា «មកពីលោកឯងដាំបន្លែប្រើគីមីច្រើនពេកបានគ្មានអ្នកទិញ បន្លែគេនាំចូលមកវាគ្មានគីមីមកពីលោកឯងលក់បន្លែថោកពេកបានគ្មានអ្នកទិញ ទាល់តែលក់ថ្លៃដូចការនាំចូលមកបានគេគាំទ្រមក ពីឈ្មួញកណ្តាលវាមិនមែនពូជខ្មែរតែវាជាពូជ…ដែលវាមិនចេះយល់ និងអាណិតដល់កសិករខ្មែរ នឹងមិនឱ្យតម្លៃ»។

ជាមួយគ្នានេះដែរ តារាសម្តែង និងចម្រៀង កញ្ញាសុខ ស្រីម៉ុច បានលើកឡើងខ្លីដែរថា កញ្ញា ក៏ជាកូនកសិករធ្លាប់ឆ្លងកាត់រែកទឹកស្រោចដំណាំផង រៀនផង សូមខ្មែរជួយខ្មែរទើបរីកចម្រើន។ ក្នុងនោះក៏មានការបញ្ចេញមតិពីអ្នកប្រើប្រាស់បណ្តាញសង្គមដោយស្នើឱ្យមានការគិតគូរ និងគាំទ្រដល់កសិផលរបស់កសិករខ្មែរ ផងដែរ៕

អត្ថបទ ៖ ចាន់រ៉ា