អតីត​តារា​រ៉េប​ក្រុម​​ចម្រៀង​ប្រុស​៥​រូប​សារភាព​ថា ​លួច​ថត​មិត្ត​ស្រី​ពេល​រួម​ភេទចំនួន១៨ដង

កាលពីខែធ្នូឆ្នាំមុន Choi ដែលជាអតីតតារាចម្រៀងរ៉េបនៃក្រុម idol មានសមាជិក ៥ នាក់ ត្រូវបានចោទប្រកាន់ពីបទថតមិត្តស្រីហៅកាត់ថា A​​ របស់គាត់ដោយខុសច្បាប់ ក្នុងអំឡុងពេលរួមភេទសរុបចំនួន ១៨ដង។​ នេះបើយោងតាមសារព័ត៌មានកម្សាន្តកូរ៉េ allkpop បានចុះផ្សាយនៅថ្ងៃ ០៨ ខែមីនា ឆ្នាំ២០២៤។

Choi ត្រូវបានគេនិយាយថា បានឲ្យមិត្តស្រីនាង A ពាក់របាំងមួយបិទភ្នែកមុនពេលគាត់ប្រើកម្មវិធីកាមេរ៉ាគ្មានសំឡេងដើម្បីថតនាង ហើយគាត់ប្រឈមមុខនឹងការចោទប្រកាន់បន្ថែម ក្នុងពេលដែលលួចថតខោក្នុងរបស់នារីម្នាក់ទៀតហៅកាត់ថា ​B​ ខណៈដែលនាងដេកនៅលើគ្រែ។

នៅថ្ងៃទី ០៨ ខែមីនា Choi ដែលមានអាយុ ២៨ ឆ្នាំបានចូលរួមការកាត់ក្តីលើកដំបូងរបស់គាត់នៅតុលាការ Seoul Western District ពីបទរំលោភលើច្បាប់ដាក់ទណ្ឌកម្មផ្លូវភេទ ហើយបានសារភាពថា លោកពិតជាបានថតអតីតមិត្តស្រីដោយខុសច្បាប់ច្រើនជាង ២០ ដងដោយនាងមិនដឹងខ្លួនសូម្បីតែម្ដងសោះ។

Choi ត្រូវបានគេរាយការណ៍ថាមានទំនាក់ទំនងជាមួយមិត្តស្រី A ប្រហែល ១០ ខែចាប់ពីឆ្នាំ ២០២២ ដល់ខែឧសភាឆ្នាំមុន រួមទាំងអតីតមិត្តស្រីរបស់គាត់ផ្សេងទៀត B និង C មានជនរងគ្រោះសរុប ៣ នាក់។ ជនរងគ្រោះម្នាក់ក្នុងចំណោមជនរងគ្រោះដែលមិនបញ្ចេញឈ្មោះបានអះអាងថា Choi បានមកលេងនាងកាលពីខែមករាកន្លងទៅនេះ ហើយនាងបានដាក់ពាក្យបណ្ដឹងបន្ថែមអំពីការតាមចាប់ខ្លួនគាត់ជាមួយប៉ុស្តិ៍ប៉ូលីស Yongsan ក្នុងទីក្រុងសេអ៊ូល។ នាងត្រូវបានគេដកស្រង់នូវសម្ដី ដោយបានជំរុញឲ្យដាក់ទណ្ឌកម្មធ្ងន់ធ្ងរលើ Choi កុំលើកលែងឲ្យសោះ។

យ៉ាងណាក៏ដោយ Choi បាន​ផ្អាក​សកម្មភាព​របស់​គាត់​ក្នុង​នាម​ជា​តារា​រ៉េប​ដ៏​សំខាន់​នៃ​ក្រុម​ចម្រៀង​ដែល​មាន​សមាជិក ៥នាក់​ក្នុង​ឆ្នាំ ២០១៩ ដោយសារ​ហេតុផល​សុខភាព។ ក្រុមនេះបានបង្ហាញខ្លួនជាលើកដំបូងក្នុងឆ្នាំ ២០១៧ ហើយនៅឆ្នាំ ២០១៩ សមាជិក Lee ត្រូវបានកាត់ទោសឲ្យជាប់ពន្ធនាគារលើការចោទប្រកាន់ពីបទបៀតបៀនអនីតិជន។ ចំណែកការកាត់ក្តីបន្ទាប់សម្រាប់ករណីរបស់ Choi ត្រូវបានកំណត់ពេលនៅថ្ងៃទី១៧ ខែឧសភាខាងមុខ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖Hwang Jung Eum បង្ហាញមុខលើកដំបូង ចាប់តាំងពីប្រកាសលែងលះស្វាមីជាសាធារណៈ