ជីវិតកម្សាន្ដ

តួប្រុសរឿង “អន្លង់កម្ម” ប្រកាសលក់ឡានទំនើប យកលុយព្យាបាលជំងឺឪពុក

បានផុស

១១ ខែ មុន

នៅ

ថ្ងៃអង្គារ ១២ មីនា ២០២៤

ដោយ

តារាសម្ដែងថៃលោក Chanatip phothongka ដែលទស្សនិកជនជាច្រើនស្គាល់ថាជាតួប្រុសក្នុងរឿងអន្លង់កម្មបានប្រកាសក្ដែងៗដោយសម្រេចចិត្តលក់រថយន្តទំនើបផ្ទាល់ខ្លួនជាបន្ទាន់ ដើម្បីយកប្រាក់ជួយជីវិតឪពុកដែលឈឺធ្ងន់ ខណៈដែលលោកបានត្អូញត្អែររឿងកូនបំណុលមិនសងលុយថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈគេហទំព័រកម្សាន្តថៃ Sanook បានចុះផ្សាយពីទុក្ខលំបាករបស់តារាសម្ដែងប្រចាំស្ថានីយទូរទស្សន៍ប៉ុស្តិ៍លេខ៣ Chanatip phothongka ត្រូវទទួលបន្ទុកថ្លៃព្យាបាលដ៏ធំរបស់ឪពុក ដែលពីមុនជួបគ្រោះថ្នាក់ចរាចរណ៍ដោយបានបាត់បង់ជើងស្តាំរបស់គាត់ ហើយក្លាយជាពិការ។

នៅលើគណនី Instagram ផ្ទាល់ខ្លួនរបស់តួប្រុសក្នុងរឿង អន្លង់កម្ម បានបកស្រាយយ៉ាងលម្អិតថា ”លក់បន្ទាន់! រថយន្ត Porsche Cayenne Diesel ឆ្នាំ២០១១ ម៉ូដែល 958.1 ម៉ាស៊ីនម៉ាស៊ូត មួកខ្មៅ លេខ 116,xxx ម៉ាយ មានការដូរលាងរាល់ពេល ព្រោះឡាននៅប្រើរាល់ថ្ងៃ។ ម្ចាស់ឡានតែមួយ តួស្អាត គ្មានគ្រោះថ្នាក់ ជារថយន្តដែលខ្ញុំស្រលាញ់ ហើយក៏មានមនុស្សជាច្រើនចូលចិត្តដូចគ្នា។ ប៉ុន្តែខ្ញុំត្រូវតែលក់វាចេញដើម្បីយកលុយមកព្យាបាលជំងឺឪពុក។ពេលនេះកូនបំណុលបានជាប់បំណុលជាយូរមកហើយ តែមិនព្រមសងសោះ”។

ក្នុងនោះផងដែរ តារាសម្ដែង Chanatip បានបញ្ចាក់បន្ថែមទៀតថា ឡានទំនើបរបស់លោកលក់ក្នុងតម្លៃប្រមាណ២.៣៣លានបាត ដោយប្រញាប់លុយបំផុតនាពេលនេះ ដើម្បីឆាប់បានយកអ្នកមានគុណទៅព្យាបាលជំងឺឲ្យឆាប់ជាះស្បើយតែប៉ុណ្ណោះ។

សូមបញ្ចាក់ជាថ្មីម្ដងទៀតថា តារាសម្តែងកតញ្ញូរូបនេះដាច់ចិត្តលក់ឡានទំនើបផ្ទាល់ខ្លួន ដោយសារតែឪពុករបស់លោកបានជួបគ្រោះថ្នាក់ចរាចរណ៍នៅឆ្នាំ ២០២១ បណ្តាលឲ្យត្រគាកខាងឆ្វេង ខួរក្បាលត្រូវបានខូចខាត ហើយជើងស្តាំរបស់គាត់បានបាក់ រហូតដល់គាត់មិនអាចដើរបានដូចមុនទៀតទេ។ តុលាការបានសម្រេចថា ភាគីបង្កហេតុត្រូវសងជំងឺចិត្តដល់ឪពុកលោកចំពោះថ្លៃព្យាបាលដោយសារការបើកបរធ្វេសប្រហែស។ ប៉ុន្តែកន្លងមក រូបលោកពុំទទួលបានប្រាក់សំណងសូម្បីតែ១បាត ទើបត្រូវលក់របស់ដែលខ្លួនស្រលាញ់ ដើម្បីបន្តជីវិតឪពុក៕