ជីវិតកម្សាន្ដ

ខាត់ សុឃីម អំពាវនាវគ្រប់ភាគីពាក់ព័ន្ធ រួមគ្នាលើកស្ទួយប្រពៃណី”អាពាហ៍ពិពាហ៍ខ្មែរ”

បានផុស

១ year មុន

នៅ

ថ្ងៃសុក្រ ១៥ មីនា ២០២៤

ដោយ

តារាពហុជំនាញដែលសម្តែងបានគ្រប់ទម្រង់សិល្បៈ អ្នកនាង ខាត់ សុឃីម បានចេញមុខអំពាវនាវដល់មហាជន ក៏ដូចជាអ្នកពាក់ព័ន្ធមានដូចជា អ្នកសម្អាងការ ,អ្នកភ្លេងការ ,អ្នករៀបពិធីមង្គលការ រួមទាំងលោកអាចារ្យ លោកមហា ត្រូវរួមគ្នាលើកស្ទួយប្រពៃណី”អាពាហ៍ពិពាហ៍ខ្មែរ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអំពាវនាវរបស់តារាស្រីអ្នកនាង ខាត់ សុឃីម នេះ ស្របពេលក្រសួងវប្បធម៌ និងវិចិត្រសិល្បៈ បានបញ្ជាក់ឲ្យដឹងកាលពីថ្មីៗ នេះថា ក្រសួង បាននិងកំពុងរៀបចំឯកសារអំពី “អាពាហ៍ពិពាហ៍ខ្មែរ” ដើម្បីស្នើសុំចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ។

អ្នកនាង ខាត់ សុឃីម បានលើកឡើងដោយខ្លឹមសារដូច្នេះថា «អាពាហ៍ពិពាហ៍ក្នុងសង្គមខ្មែរ រៀបចំដោយក្រសួងវប្បធម៌ និងវិចិត្រសិល្បៈ ត្រៀមចូលបេតិកភណ្ឌជាតិមរតកអរូបិយ UNESCO។ ដូចនេះ ដើម្បីរក្សាបានប្រពៃណី និងទំនៀមទម្លាប់តាមតំបន់ នៃអាពាហ៍ពិពាហ៍ក្នុងសង្គមខ្មែរ សូមចូលរួមលើកស្ទួយទាំងអស់គ្នា, មានដូចជា អ្នកសម្អាងការ អ្នកភ្លេងការ អ្នករៀបពិធីការ រួមទាំងលោកអាចារ្យ លោកមហា គ្រប់ខេត្តតំបន់»។

តារាពហុជំនាញរូបនេះ បានសង្កត់ធ្ងន់ទៀតថា រឿងដែលពិសេសថែមទៀត គឺ ម្ចាស់មង្គលការ ក៏ត្រូវតែរើសសំលៀកបំពាក់ឲ្យបានត្រឹមត្រូវទៅតាមប្រពៃណី និងទំនៀមទម្លាប់ ជៀសវាងប៉ះប្រពៃណី និងទំនៀមទម្លាប់ប្រទេសជិតខាង។ ដោយឡែក ក៏មានការបញ្ចេញទស្សនៈដែរថា «សប្បាយចិត្តខ្លាំងណាស់ ហើយកម្មវិធីទាំងអស់ក្នុងពិធីសុទ្ធតែមានអត្ថន័យ ខ្ញុំចង់ឃើញសម្អាងការ និងអាចារ្យទាំងអស់ មានក្បួនច្បាប់ត្រឹមត្រូវ ពោលគឺ (ក្រាបសំពះផ្ទឹម មិនមែនអង្គុយផ្ទឹមទេ)»។

គួរជម្រាបថា បច្ចុប្បន្ន ក្រសួងវប្បធម៌ និងវិចិត្រសិល្បៈ កំពុងប្រមូលធាតុចូល ដើម្បីជាប្រយោជន៍ក្នុងការរៀបចំឯកសារអំពីអាពាហ៍ពិពាហ៍ខ្មែរ ស្នើសុំចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ៕

អត្ថបទ ៖ ចាន់រ៉ា