ជីវិតកម្សាន្ដ

លោក គួច ខេវិន ៖ ពិធីករ-ពិធីការិនី មានតួនាទីសំខាន់ក្នុងការបង្ហាញអត្តសញ្ញាណថ្លៃថ្នូរជាតិសាសន៍ខ្លួន

បានផុស

៦ ខែ មុន

នៅ

ថ្ងៃព្រហស្បតិ៍ ២១ មីនា ២០២៤

ដោយ

ស្របពេលដែលមានការវែកញែកពាក់ព័ន្ធវីដេអូពិធីករ-ពិធីការិនី និយាយភាសាលាយខ្មែរ និងបរទេសចូលគ្នា ច្របូកច្របល់នោះ ស្រាប់តែផលិតករល្បីឈ្មោះលោក គួច ខេវិន បានចេញមកបញ្ចេញទស្សនៈថា សិល្បៈជាអាវុធមុខពីរ បើបង្ហាញត្រូវ នឹងឲ្យគេយកគំរូតាមល្អ តែបើខុស គឺប៉ះពាល់ធ្ងន់ធ្ងរដល់សង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់នៅលើបណ្ដាញសង្គមថ្មីៗនេះ គេឃើញមានការចែកចាយនូវវីដេអូពិធីករ-ពិធីការិនី ក្នុងកម្មវិធីមួយដែលពួកគេជជែកសាសងគ្នាឡើងវល់ ព្រោះនិយាយភាសាខ្មែរ និងបរទេសចូលគ្នា ច្របូកច្របល់ ហាក់ដូចជាកំពុងតែនិយាយនៅតៀមកាហ្វេ ឬ បា មិនមែនជាការផ្សាយផ្ទាល់ ហើយសូម្បីតែឈ្មោះកម្មវិធីក៏មិនមែនជាភាសាជាតិផងដែរ។

ជាមួយនោះ ដោយឃើញដូចនេះ លោក គួច ខេវិន ក៏បានចេញសារដាស់តឿនដើម្បីពញាក់ស្មារតីយុវជនខ្មែរថា «ប្រសិនបើមិនបានជួយលើកតម្កើង សូមកុំជាន់ពន្លិច គុណតម្លៃ នៃភាសា ជាតិសាសន៍របស់ខ្លួន តាមចរិតបរទេស និយមហួសហេតុ»។ លោកក៏បានសង្កត់ធ្ងន់ថា «ភាសារលត់ ជាតិរលាយ ភាសាពណ្ណរាយ ជាតិថ្កើងថ្កាន»។

លោក គួច ខេវិន បានបញ្ជាក់ថា «ក្នុងសកម្មភាពសិល្បៈរបស់ខ្ញុំកន្លងមក ខ្ញុំបានធ្វើការផលិតកម្មវិធី និងបណ្ដុះបណ្ដាលសមត្ថភាពពិធីករ-ពិធីការិនីជាច្រើននាក់ សម្រាប់ការងារទូរទស្សន៍ និងកម្មវិធីជាសាធារណៈផ្សេងៗ ទៀត ពួកគេមានកម្រិតវប្បធម៌ ជំនាញភាសាជាតិ និងភាសាបរទេសយ៉ាងស្ទាត់ជំនាញ ទាំងការសន្ទនា និងបកប្រែ ក៏ប៉ុន្តែនៅក្នុងកម្មវិធីនីមួយៗ ពួកគេបានប្រកាន់ខ្ជាប់នូវអត្តសញ្ញាណជាតិខ្មែររបស់ខ្លួនយ៉ាងល្អប្រសើរ ដោយមិនប្រើភាសាច្របូកច្របល់តាមទំនើងចិត្តនោះឡើយ»។

លោកនិយាយបន្តថា ពិធីករ-ពិធីការិនី មានតួនាទីសំខាន់ក្នុងការបង្ហាញនូវគោលគំនិតអត្ថប្រយោជន៍ នៃកម្មវិធី ជាពិសេសបង្ហាញនូវអត្តសញ្ញាណថ្លៃថ្នូររបស់ជាតិសាសន៍ខ្លួន ទាំងអាកប្បកិរិយា និងពាក្យសម្ដី។ “ភាសារលត់ ជាតិរលាយ ភាសាពណ្ណរាយ ជាតិថ្កើងថ្កាន” បើជាកូនខ្មែរមិនចេះថែរក្សាលើកស្ទួយផ្តល់គុណតម្លៃចំពោះភាសាជាតិខ្មែររបស់ខ្លួន តើគួរគប្បីទុកឲ្យជាតិសាសន៍ណាគេមកលើកតម្កើងជំនួស?។

បន្ថែមពីលើនេះ លោក គួច ខេវិន លើកឡើងថា ប្រសិនបើមិនបានជួយលើកតម្កើង សូមកុំជាន់ពន្លិចគុណតម្លៃ នៃភាសាជាតិសាសន៍របស់ខ្លួនតាមចរិតបរទេសនិយមហួសហេតុ។

គួរបញ្ជាក់ថា លោក គួច ខេវិន ធ្លាប់បានដឹកនាំ និងគ្រប់គ្រងកម្មវិធីសិល្បៈរយៈពេលជាង ២០ ឆ្នាំ មកហើយ។ ក្នុងនោះ កម្មវិធីដែលលោកផលិតចេញមកសុទ្ធតែបង្កប់ទៅដោយខ្លឹមសារ អប់រំ បង្ហាញពីប្រពៃណីខ្មែរ និងអភិរក្សពីភាសាជាតិជាដើម…៕

អត្ថបទ ៖ ចាន់រ៉ា