ជីវិតកម្សាន្ដ

តារាចម្រៀង ណូយ វណ្ណា ក្លាយជាជនរងគ្រោះក្នុងការទិញដីឡូត៍គម្រោងទី ៣០ ម៉ន ដានី ខេត្តកំពត

បានផុស

១០ ខែ មុន

នៅ

ថ្ងៃព្រហស្បតិ៍ ២១ មីនា ២០២៤

ដោយ

តារាចម្រៀងជើងចាស់លោក ណូយ វណ្ណា ដែលជាប្អូនប្រុសបង្កើតលោក ណូយ វ៉ាន់ណេត ថ្មីៗនេះ ត្រូវបានប្រភពមិត្តភ័ក្ដិស្និទ្ធស្នាលក្នុងចង្កោមសិល្បៈទម្លាយថា លោក វណ្ណា ក៏ជាជនរងគ្រោះម្នាក់ ចំណោមជនរងគ្រោះជាច្រើនទៀត ក្នុងការទិញដីឡូត៍គម្រោងទី ៣០ របស់អ្នកស្រី ម៉ន ដានី ខេត្តកំពត ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការលើកឡើងរបស់តារាសម្តែងលោក សាវិន ហ្វីលីព បានបញ្ជាក់ឲ្យដឹងថា «តារាចម្រៀងជើងចាស់ លោក ណូយ វណ្ណា គឺខំសន្សំលុយពីការលក់នំបញ្ចុក ចុងក្រោយស្ពៃដូចខ្ញុំដែរ ក្នុងការទិញដីឡូត៍គម្រោងទី ៣០ របស់ ម៉ន ដានី នៅខេត្តកំពត»។ ដោយឡែក លោកក៏បានបង្ហាញទៀតថា «ម៉ន ដានី គម្រោង ៣០ : អាសូរណាស់ ចុងក្រោយគឺបាយកញ្ចប់គ្រប់គ្នា ក្នុងនោះក៏មានភរិយាតារាចម្រៀង លោក ណូយ វណ្ណា ម្នាក់ផងដែរ»។

តារាសម្តែងលោក សាវិន ហ្វីលីព បន្តថា នេះជារូបភាពជនរងគ្រោះមកបែរបន់នៅគម្រោង ម៉ន ដានី ទី ៣០ ឲ្យ លោកយាយ ម៉ៅ ជួយឲ្យលោកស្រី ម៉ន ដានី ឆាប់ចូលខ្លួនមកដោះស្រាយជាមួយអតិថិជនដែលបានទិញដីនៅគម្រោងនេះ ស្ថិតនៅភូមិច្បារអំពៅ ឃុំព្រៃថ្នង ស្រុកទឹកឈូ ខេត្តកំពត ជាង ២ ឆ្នាំ មកហើយ មិនបានប្លង់។

លោកបន្ថែមថា «ក្រោយនិយ័តករអចលនទ្រព្យចេញសេចក្ដីប្រកាសថ្មីៗ នេះថា ក្រុមហ៊ុន ម៉ន ដានី លក់ដីគ្មានអាជ្ញាប័ណ្ណស្របពេលដែលសមត្ថកិច្ចដែនដី ភូមិឃុំ ស្រុក ។ល។ កាលនោះ ម៉េចមិនចេញមកបញ្ឈប់ការឈូសឆាយដីពុះឡូត៍ខុសច្បាប់នេះអ៊ីចឹង? ចុងក្រោយរាស្ត្រសាមញ្ញទាំងគេទាំងខ្ញុំ គឺបានត្រឹមតែទឹកភ្នែកប៉ុណ្ណោះ»។

ទាក់ទងនឹងព័ត៌មានខាងលើនេះ កម្ពុជាថ្មី នៅថ្ងៃទី ២១ ខែមីនា ឆ្នាំ ២០២៤ នេះ មិនទាន់អាចទំនាក់ទំនង ដើម្បីសូមការបញ្ជាក់បន្ថែមពីលោក ណូយ វណ្ណា បាននៅឡើយទេ។