ខេមរ: សិរីមន្ត សម្រេចលុបចោល MV បទ «ឆ្នាំហ្នឹងសប្បាយខ្លាំង» ស្របតាមបំណងអ្នកគាំទ្រ

នៅលើទំព័រហ្វេសប៊ុក លោក ខេមរ: សិរីមន្ត បានប្រកាស​បលុបចោល MV បទ «ឆ្នាំហ្នឹងសប្បាយខ្លាំង» ដែល​រង​ការ​រិះគន់ពីអ្នកគាំទ្រ​កន្លងមក។

តារាចម្រៀង ខេមរ: សិរីមន្ត បានបញ្ជាក់ថា បទ «ឆ្នាំហ្នឹងសប្បាយខ្លាំង» គិតមកដល់ពេលនេះ ចំនួនអ្នកទស្សនា Teaser មាន (2M) នៅក្នុងហ្វេស​ប៊ុក​ផ្ទាល់ខ្លួន និង MV (1M) នៅក្នុងយូធូបរយ:ពេល ២ ថ្ងៃ។

យ៉ាងណាមិញ បើតាម​កំពូល​តារាចម្រៀងរូបនេះ​ ការសម្រេច​ចិត្ត​លុប​គឺ​លុបតែ MV តែប៉ុណ្ណោះ។

តាមរយ:ការប្រកាសពីសំណាក់លោក ខេមរ: សិរីមន្ត ក៏មានការបញ្ចេញ​មតិផ្សេងៗគ្នាពីមហាជនដោយខ្លះយល់​ថា ការលុប MV បទខាងលើនេះជា​រឿងល្អ។ រីឯ​អ្នក​ខ្លះទៀតទៀតលើកហេតុផល​ថា ដូចជាមិនអាក្រក់ណាស់ណាទេថ្វីត្បិតតែបទត្រៀមចូលឆ្នាំគឺបែបសប្បាយមិនមែនបទប្រពៃណី។ បន្ថែមពីនេះ​អ្នក​គាំទ្រ​​​ក៏​ឲ្យ​​អ្នក​រិះគន់​មានការ​គិតពិចារណាឡើងវិញលើការ​រិះគន់បែបស្ថាបនាកុំរិះគន់ព្រោះតាមគ្នា។

កំពូលតារាចម្រៀងមាន​ងារជាឧកញ៉ា ខេមរ: សិរីមន្ត មួយ​រយៈចុងក្រោយ​នេះ​បានចេញបទចម្រៀងថ្មីៗជាបន្តបន្ទាប់ដើម្បីស្រូបទាញប្រជាប្រិយភាព និងការគាំទ្រពីសំណាក់មហាជននិងមិត្តៗយុវវ័យ។

ការចេញបទចម្រៀងថ្មីៗរបស់ លោក ខេមរ: សិរីមន្ត កន្លងមកផ្ទុះ​ការ​គាំទ្រផងនិងរិះគន់ផងពោលគឺចាប់តាំងពីចេញបទ «CALL ME PAPA» បទ «អូនរាំអែន» និងបទ“ឆ្នាំនឹងសប្បាយខ្លាំង” ដែលមិនមែនជាបទបែបប្រពៃណីទេគឺជាបទចង្វាក់​បែបទំនើប៕

អត្ថបទ៖ ចាន់រ៉ា