ជីវិតកម្សាន្ដ

តារាសម្តែង ស៊ឹម ស្រីនិច្ច ត្អូញត្អែររឿងជីវិតគូ

បានផុស

១១ ខែ មុន

នៅ

ថ្ងៃចន្ទ ២២ មេសា ២០២៤

ដោយ

តារាសម្តែង ស៊ឹម ស្រីនិច្ច ខណៈអាជីពសិល្បៈលេចវត្តមានសម្តែងឡើងវិញ ស្រាប់តែតារាស្រីរូបនេះ ចេញមកត្អូញត្អែររម្លឹកពីអតីតកាល នៃការខំប្រឹងប្រែងរបស់ខ្លួន និងរឿងជីវិតគូថា តើនាងគួរមានជីវិតគូ ឬបែបណា?។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រីស្អាត ស៊ឹម ស្រីនិច្ច បានទម្លាយអារម្មណ៍លាយឡំការតស៊ូរបស់នាងកំឡុងពេល ១០ ឆ្នាំ កន្លងទៅ ថា នាងបានខំប្រឹងប្រែងធ្វើគ្រប់បែបយ៉ាង ដើម្បីចង់បានសេចក្ដីសុខ ខណៈពេលខ្លះស្ទើរគ្មានពេលសម្រាកពីការងារ ព្រោះចង់សន្សំលុយដោយចេញពីញើសឈាមផ្ទាល់ខ្លួន។

នាងរៀបរាប់ថា «ពេលនេះម៉ោងនេះ ខ្ញុំក៏បានដឹងយ៉ាងច្បាស់បំផុតថា រយៈពេលធ្វើការ ១០ ឆ្នាំ មកនេះ មានរយៈពេល ៧ ឆ្នាំ ដែលខ្ញុំមិនហ៊ានសូម្បីតែសម្រាក ពេលយប់ថតរឿងខ្មោច ពេលថ្ងៃថតរឿងភាគ រត់ទៅឆ្លៀត event រត់ទៅថតផលិតផល រត់ទៅច្រៀង រត់ទៅធ្វើជា MC នោះព្រោះការប្រឹងសន្សំទាំងញើសឈាមដោយបៀមក្នុងចិត្តមិនត្អូញមិនប្រាប់អ្នកណាឡើយ ហើយខ្ញុំក៏ទុកក្នុងចិត្តម្នាក់ឯង រង់ចាំមើលថា តើខ្ញុំគួរមានជីវិតគូ ឬបែបណា?»។

តារាសម្តែង ស៊ឹម ស្រីនិច្ច និយាយទៀតថា តើនាងត្រូវសន្សំទុកដាក់ដោយរបៀបណា ពេលវេលា ការស្រឡាញ់។ ចុងក្រោយនេះ នាងក៏ដឹងថា នាងសក្ដិសមនឹងនៅម្នាក់ឯងណាស់ហើយ មិនបាច់ប្រឹងសន្សំពេក មិនបាច់ប្រឹង គិតអនាគតជាមួយអ្នកណាពេក មិនបាច់គិតពីកិត្តិយសអារម្មណ៍របស់អ្នកណាពេកទេ។

កញ្ញា ស៊ឹម ស្រីនិច្ច ក៏បន្ថែមថា «ខ្ញុំនឹងនៅជាមួយរាងកាយរបស់ខ្ញុំដោយមោទនភាព និងសេរីភាព ក្តីស្រឡាញ់យកចិត្តទុកដាក់ជាមួយខ្លួនឯងឲ្យបានយ៉ាងល្អបំផុត មូលហេតុព្រោះទី១.ខ្ញុំស្មោះត្រង់ណាស់ ទី២.ខ្ញុំពូកែអត់ធ្មត់ណាស់ និងទី៣.ខ្ញុំរឹងមាំណាស់»។

គេចាំបានថា តារាសម្តែងរូបស្រស់កញ្ញា ស៊ឹម ស្រីនិច្ច កាលពីអំឡុងពាក់កណ្ដាលឆ្នាំ ២០២១ នាងបានប្រកាសយ៉ាងភ្ញាក់ផ្អើលអំពីដំណឹងលាឈប់ពីអាជីពសិល្បៈដែលខំសាងកេរ្តិ៍ឈ្មោះឡើងអស់ពេលច្រើនឆ្នាំកន្លងមកនោះ ដោយកាលណោះគេសង្ស័យថា នាងមានទំនាក់ទំនងស្នេហាជាមួយបុរសម្នាក់។ ប៉ុន្តែអ្វីដែលគេចាប់អារម្មណ៍ថែមទៀត ថ្មីៗ នេះ ស្រីនិច្ច ស្រាប់តែលេចវត្តមានសម្តែងក្នុងរឿងខ្នាតធំបែបប្រវត្តិសាស្ត្រ«អប្សរាមហាអង្គរ»៕

អត្ថបទ ៖ ចាន់រ៉ា