Santa KH សុំទោសដោយផ្ទាល់ជាមួយអភិបាលខេត្តកំពត និងសុំទោសជាសាធារណៈ

ទីបំផុតម្ចាស់គណនីហ្វេសប៊ុកឈ្មោះ Santa KH ដែលមានឈ្មោះពិត ស៊ុំ សារុន បានចូលទៅទទួលកំហុស និងជួបសុំទោសដោយផ្ទាល់ជាមួយអភិបាលខេត្តកំពត និងលោកស្នងការខេត្តព្រមទាំងសុំទោសមហាជនជាសាធារណម្តងទៀត។

នៅលើទំព័រហ្វេសប៊ុករបស់ស្នងការដ្ឋាននគរបាលខេត្តកំពតបានបញ្ជាក់ឲ្យដឹងថា លោក SantaKH បានដឹងអំពីកំហុសហើយបានមកធ្វើការសុំទោសដោយផ្ទាល់ជាមួយលោកអភិបាលខេត្ត និងសុំទោសជាសាធារណៈម្តងទៀតជុំវិញកំហុសឆ្គងរបស់ខ្លួនក្នុងការថតរូបមិនសមរម្យ ។

សូមបញ្ជាក់ថា នៅលើបណ្តាញសង្គមហ្វេសប៊ុកនាព្រឹកថ្ងៃទី២៥មេសា គេឃើញមានកាចែករំលែកយ៉ាងផុសផុលបន្ទាប់ពីឃើញទង្វើរគ្មានសីលធម៌របស់ម្ចាស់ហ្វេសប៊ុកឈ្មោះ SantaKH ជាមួយការបញ្ចេញទស្សន:រិះគន់មិនសំចៃមាត់ទៅលើរូបភាពអសីលធម៌បែបនេះ ។

យ៉ាងណាមិញបន្ទាប់ពីផ្ទុះការរិះគន់ដូចទឹកបាក់ទំនប់ពាក់ព័ន្ធការថតបង្ហោះរូបភាពមិនសមរម្យនៅទីតាំងសេះសមុទ្របាញ់ទឹកនាខេត្តកំពតភ្លាមៗនោះម្ចាស់គណនីហ្វេសប៊ុកឈ្មោះSanta KHដែលមានឈ្មោះពិត ស៊ុំ សារុន ក៏បានចេញមុខសុំទោសមហាជនជាសាធារណ:ផងដែរ៕

អត្ថបទ៖ ចាន់រ៉ា