តារាសម្ដែង ស៊ិន ឌី លើកសរសើរភេទទី៣មានជំនាញ និងចាប់អាជីពលេចធ្លោធំៗជាច្រើនក្នុងសង្គម 

តារាសម្ដែងលោក ស៊ិន ឌី បានបង្ហាញនូវការលើកទឹកចិត្ត និងសរសើរចំពោះស្នាដៃក្រុមភេទទី៣ កាន់តែច្រើនដែលមានជំនាញច្បាស់លាស់ក្នុងការចាប់អាជីពចិញ្ចឹមជីវិតរស់នៅក្នុងសង្គមដែលអាជីវកម្មខ្លះ គឺភេទទី៣ជាអ្នកបង្ហាញពីភាពលេចធ្លោនាពេលបច្ចុប្បន្ន។

លោក ស៊ិន ឌី ថ្លែងថា «ខ្ញុំឃើញប្អូនៗជំនាន់ក្រោយ (ភេទទី៣)ដែលគាត់មានការងារធ្វើត្រឹមត្រូវ មានមុខរបរច្បាស់លាស់ ដែលមានទាំងភាពទាន់សម័យដូចជាការឌីហ្សាញ ធ្វើជាគ្រូដឹកនាំគេបង្ហាត់បង្ហាញម៉ូដ ផាត់មុខ ធ្វើសក់ សាឡន ,កែសម្ផស្ស និងវិស្វករជាដើមក៏មានភេទទី៣មួយចំនួនកាន់ជំនាញនេះផងដែរ។ ខ្ញុំពេញចិត្តដែលពួកគាត់កាន់តែលេចធ្លោច្រើន ក្នុងអាជីវកម្មធំៗក្នុងសង្គម ពួកគាត់បានបង្ហាញពីស្នាដៃ និងទេពកោសល្យដើម្បីឲ្យគេទទួលស្គាល់ និងកុំឲ្យមានការរើសអើងពួកគាត់តទៅទៀត»។

ការលើកឡើងរបស់លោក ស៊ិន ឌី នេះ ក្រោយពីលោកបានទៅទស្សនាដោយផ្ទាល់ការប្រកួតវគ្គផ្ដាច់ព្រ័ត្រប្រលងបវរកញ្ញាភេទទី៣កម្ពុជា ឆ្នាំ២០២៤ (Miss Queen Cambodia 2024 )កាលពីថ្ងៃទី៤ មេសា ឆ្នាំ២០២៤ ហើយជាលទ្ធផលកញ្ញា នៀក នៀក សម មកពីខេត្តរតនគិរី គ្រងមកុដ Grand Winner Miss Queen Cambodia 2024 ត្រៀមទៅប្រកួត Miss Star International 2024 នៅប្រទេសប្រេស៊ីល នៅអំឡុងខែធ្នូ ឆ្នាំ២០២៤ ខាងមុខ ខណៈដែលWinner Miss Queen 2024 បានទៅលើកញ្ញា ហានី មកពីខេត្តកំពតត្រៀមទៅប្រកួតMiss Queen 2024 នៅប្រទេសថៃ នាពេលដ៏ខ្លីខាងមុខនេះដែរ។ ស្របពេលដែលលំដាប់រងទី១បានទៅលើបវរកញ្ញាមកពីខេត្តតាកែវ លំដាប់រងទី២ បានទៅលើបវរកញ្ញាមកពីខេត្តកំពង់ធំ ,លំដាប់រងទី៣ បានទៅលើបវរកញ្ញាមកពីខេត្តព្រៃវែង ,លំដាប់រងទី៤ បានទៅលើបវរកញ្ញាមកពីខេត្តពោធិ៍សាត់ និងលំដាប់រងទី៥ បានទៅលើបវរកញ្ញាមកពីខេត្តក្រចេះ ។

ដោយមើលឃើញពីសម្ថភាពដ៏ប៉ិនប្រសព្វ ជាមួយចំណេះដឹងជំនាញច្បាស់លាស់មិនធម្មតា និងភាពក្លាហានរបស់​ភេទទី៣ ដែលអាចធ្វើបានដើម្បីឲ្យសង្គមទទួលស្គាល់នេះហើយទើបលោក ស៊ិន ឌី បានស្ញើចសរសើរពួកគាត់ និងជំរុញឲ្យគេតស៊ូក្នុងជីវិតតទៅទៀត ព្រោះមិនភេទទី៣ ឬមិនថាជាភេទអ្វីទេ យើងត្រូវតែមានជំនាញច្បាស់លាស់ដើម្បីប្រកបរបរចិញ្ចឹមជីវិតរស់នៅដោយថ្លៃថ្នូរ។ ប៉ុន្ដែលោក ស៊ិន ឌី ទទួលស្គាល់​ថា អ្នកខ្លះនៅមិនទាន់អាចសម្របខ្លួនទទួលស្គាល់​ភេទទី៣ ឬហៅថា ”សុទ្ធ” នៅឡើយទេ គឺនៅមានការរើសអើងនៅឡើយ។ លោកថា ភេទទី៣ មិនមែនជាមនុស្សខុសធម្មជាតិទេ គឺរស់នៅដោយសប្បាយចិត្តតាមប្រភេទជីវិតពួកគាត់។

គួរបញ្ជាក់ថា លោក ស៊ិន​ ឌី ធ្លាប់ធ្វើសប្បុរសធម៌ជាមួយភេទទី៣ ជាបន្ដបន្ទាប់ និងរហូតមកដល់បច្ចុប្បន្ន គ្រាន់តែលោកមិនសូវបង្ហាញតាមបណ្ដាញសង្គមប៉ុណ្ណោះ។ លោក​ ស៊ិន ឌី ជាម្ចាស់ហាង ស៊ិន ឌី សំអាងការ ហាងNk សាឡន និងហាងកែសម្ផសក្លារា (Clara Clinic) ជាដើម ទើបធ្វើឲ្យលោកមមាញឹកខ្លាំងលើមុខជំនួញ ត្រូវផ្អាកពីអាជីពសម្ដែងជាច្រើនឆ្នាំ ដើម្បីគ្រប់គ្រងអាជីវកម្មខាងលើ។ ប៉ុន្ដែលោកថា នៅតែស្រលាញ់សិល្បៈនឹងអាចវិលមកវិញនៅពេលវេលាសមស្រប៕

អត្ថបទ៖ ចាន់រ៉ា