អ្នកគ្រូរបាំ ថៅ ពេជ្រអម្រិត បកស្រាយ ក្រោយផ្ទុះរឿងយល់ច្រឡំបវរកញ្ញាចរិតតួឯក

ដូចប្រិយមិត្ត​បាន​ដឹងហើយ​ថា ថ្មីៗនេះ អ្នកគ្រូរបាំម្នាក់​ឈ្មោះ ថៅ ពេជ្រអម្រិត បាន​ទម្លាយរឿងរ៉ាវ​ដ៏​ហួសចិត្ត​ជុំវិញ​បវរកញ្ញា​ខ្មែរ​ម្នាក់​កើត​ជំងឺ​តួឯក​ ប្រើ​សម្តីខ្វះ​សីលធម៌​មិនសមរម្យ​ទៅលើ​រៀមច្បង​ដែល​ជា​គ្រូ​បង្ហាត់​របាំ​បុរាណ។

ជា​ការកត់​សម្គាល់​ បន្ទាប់​ពីផ្ទុះ​រឿងរ៉ាវ​នេះ​ឡើង​ ស្រាប់តែ​មានមហាជន និងអ្នកគាំទ្រ​មួយចំនួន បានចូលទៅ​បញ្ចេញមតិដោយ​យល់ច្រឡំថា បវរ​កញ្ញារូបនោះ​ជា​ស្រីស្អាត ពេជ្រ វត្តីសារ៉ាវឌ្ឍី។ ប៉ុន្តែ ក្រោយ​មាន​ការ​យល់​ច្រឡំ​បែបនេះ អ្នកគ្រូរបាំ ថៅ ពេជ្រអម្រិត បានចេញមកបកស្រាយ​ដោយបាន​បញ្ជាក់ថា កាបង្ហោះនោះ គឺមិនមែនសំដៅ​លើ​​បវរកញ្ញា ពេជ្រ វត្តីសារ៉ាវឌ្ឍី ទេ។

អ្នក​គ្រូរបាំខាងលើ បានលើកឡើងថា «សូមបញ្ជាក់ថា នេះ​ជាវីដេអូក្នុងបែបផែន​ខ្លឹមសារ​ នៃ”ការរួមគ្នា​លុបបំបាត់​ទង្វើ​អសីលធម៌​ក្នុងសង្គម គឺមិនមែន​ជាវីដេអូ​បំពុលសង្គមឬឈ្លោះប្រកែកគ្នាឡើយ” សូមកុំមានការយល់ច្រឡំ។ហើយសូម​បញ្ជាក់ថា ប្អូនស្រី ពេជ្រ វត្តីសារ៉ាវឌ្ឍី ដែល​បងប្អូន​មាន​ការប៉ាន់​ស្មានយល់​ច្រឡំច្រើន​ជាង​គេ​នោះ គឺ​មិនមែន​ជា​បវរកញ្ញាដែល​មាន​បញ្ហាខាង​សីលធម៌​ក្នុងឆាត​ដែល​នាងខ្ញុំបាន​បិទ​ឈ្មោះនោះទេ»។

ថៅ ពេជ្រអម្រិត បាននិយាយទៀតថា «ដើម្បីបញ្ជាក់ក៏ដូច​ជារួមចំណែក​ផ្សព្វផ្សាយ​កិច្ចការពារ​ថែ​រក្សា​សីលធម៌ និង​វប្បធម៌​ជាតិ​នាង​ខ្ញុំ​សូម​អនុញ្ញាត​ផ្សាយ​វីដេអូនេះ​គោរពផ្ញើជូនថ្នាក់ដឹក​នាំ​គ្រប់ជាន់​ថ្នាក់​ជាទីគោរព​ដ៏​ខ្ពង់ខ្ពស់(ដែល​បាន​ជ្រាប​ព័ត៌មាន​ប៉ុន្មាន​ថ្ងៃនេះ) និង​លោកគ្រូអ្នក គ្រូនាងខ្ញុំទាំងអស់»។

អ្នកគ្រូរបាំ​បានលើក​ឡើង​ទៀតថា «សូមអធ្យាស្រ័យដែលវីដេអូរាង​វែងបន្តិច​ទើប​លម្អិត​អស់ខ្លឹមសារ និងសូមអធ្យាស្រ័យសម្រាប់​ការចេញបក​ស្រាយ​យឺត​យូរ ដោយសារនាង​ខ្ញុំ​ជាប់​មមាញឹក​ការងារ និង​ឈឺ​ខ្យល់ចាប់ជា​ទម្ងន់​ ណា​មួយទៀតជាប់​ពិធីបុណ្យ​ជាតិ​ផង​ដែល​មិន​អាច​ចេញ​បកស្រាយ​ទាន់សភាពការណ៍»។ 

គួរបញ្ជាក់ថា​ កាលពីថ្មីៗនេះ​បាន​ផ្ទុះរឿងដ៏​គួចាប់អារម្មណ៍ និងហួស​ចិត្ត​ខ្លាំង​ចំពោះ​មហាជន​ដែលតែង​និយមតាម​ដាន​វិស័យ​​បវរកញ្ញា​នៅ​កម្ពុជា​បន្ទាប់​ពី​មាន​ការ​ចែករំលែក​ជុំវិញ​ករណី​បវរកញ្ញាខ្មែរ​ម្នាក់កើត ជំងឺ​តួរឯក​ប្រើ​សម្តីខ្វះសីលធម៌​មិនសមរម្យ​ទៅ​លើ​រៀមច្បងដែល​ជាគ្រូបង្ហាត់របាំបុរាណ៕

អត្ថបទ៖ ចាន់រ៉ា