ទេព បូព្រឹក្ស ប្រកាសដាក់បទ«ទេវរាជ» ប្រកួតពានរង្វាន់អន្តរជាតិ និងស្នើឱ្យទស្សនាបទនេះតាម YouTube វិញ

ក្រោយពិធីសម្ពោធ MV បទ«ទេវរាជ» រំលងបានមួយថ្ងៃ អ្នកនាង ទេព បូព្រឹក្ស បានប្រកាសពីការសម្រេចចិត្តរបស់ខ្លួន ដាក់បទចម្រៀងដែលចំណាយទុន និងកម្លាំងមនុស្សច្រើនក្នុងការផលិតមួយនេះ ចូលរួមប្រកួតប្រជែង Award នៅក្រៅប្រទេស និងស្នើឱ្យអ្នកទស្សនាបទនេះ ងាកមកទស្សនាតាមរយៈ YouTube វិញ ដើម្បីបន្ថែម Views ឱ្យបានច្រើន។នេះបើតាមការបញ្ជាក់ឱ្យដឹងពីហ្វេសប៊ុកផេក របស់តារាចម្រៀងស្រីល្បីឈ្មោះរូបនេះ នៅរសៀលថ្ងៃទី២៩ ខែឧសភា​ ឆ្នាំ២០២៤ ។

តាមរយៈសំណេររបស់ម្ចាស់បទ « ទេវរាជ » បញ្ជាក់ថា ចំពោះការសម្រេចនេះ ខ្លួននឹងប្រឹងប្រែងឱ្យអស់ពីលទ្ធភាព ទោះជាមិនដឹងថានឹងមានលទ្ធផលបែបណាក៏ដោយ។ តារាចម្រៀងរូបនេះ បន្ថែមទៀតថា “គួរតែសាកល្បង ឈ្នះក៏យើងចំណេញ ទោះចាញ់ក៏យើងមិនខាត ព្រោះគោលដៅមួយយ៉ាងហោចណាស់ក៏អាចបង្ហាញនៅលើ Screen ពីស្នាដៃល្អឯកមួយរបស់យើងដែលផ្តល់ផលចំណេញផ្សេងទៀតតាមរយៈអត្តសញ្ញាណ”។

គួរជម្រាបថា បទ«ទេវរាជ» គឺជាស្នាដៃនិពន្ធរបស់លោក ងួន ចាន់ដេវីត (G-Devith) ឆ្លុះបញ្ជាំងពីវប្បធម៌ អរិយធម៌ និងការកកើតនៃនគរខ្មែរ បង្ហាញដល់ទៅ ៣សម័យកាល ដែលច្រៀងដោយអ្នកនាង ទេព បូព្រឹក្ស។ MV បទនេះ ក៏ទទួលបានការគាំទ្រដោយក្រសួងវប្បធម៌ និង វិចិត្រសិល្បៈ និងសហការរៀបចំទីតាំងដោយអជ្ញាធរអប្សរាផ្ទាល់ ក្នុងការផលិត ហើយត្រូវបានសម្ពោធខ្នាតធំ កាលពីថ្ងៃអាទិត្យ ទី២៦ ខែឧសភា ឆ្នាំ២០២៤។

បើតាមប្រភពដដែល បញ្ជាក់ទៀតថា សម្រាប់អ្នកដែលមិនបានចូលរួមទស្សនាផ្ទាល់ ក្នុងព្រឹត្តិការណ៍វប្បធម៌មួយកាលពីថ្ងៃអាទិត្យនោះ អាចរង់ចាំទស្សនាការចាក់ផ្សាយកម្មវិធីនេះពីដើមរហូតដល់ចប់ នៅម៉ោង ៧ល្ងាច ថ្ងៃសុក្រ ទី៣១ ខែឧសភា ខាងមុខនេះ៕