ជីវិតកម្សាន្ដ

ប្រធានសមាគមមិត្តសិល្បៈស្ម័គ្រចិត្តជួយសង្គម ស្នើក្រសួងវប្បធម៌ពិនិត្យករណី ឯម រៀម

បានផុស

៩ ខែ មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

បន្ទាប់ពីមានការរិះគន់យ៉ាងចាស់ដៃរបស់មហាជនទៅលើលោក ឯម រៀម ពេលនេះលោក ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គមក៏បានបង្ហាញការហួសចិត្ត និងស្នើដល់ក្រសួងវប្បធម៌ និងវិចិត្រសិល្បៈថាតើគិតយ៉ាងណាចំពោះអ្នកច្នៃម៉ូដ ឯម រៀម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញមុខស្នើរបស់ប្រធានសមាគមមិត្តសិល្បៈស្ម័គ្រចិត្តជួយសង្គមលោក ហេង ឡុង នេះក្រោយសង្កេតឃើញទង្វើមិនសមរម្យក្នុងការស្លៀកពាក់របស់អ្នកច្នៃម៉ូដ ឯម រៀម ដែលបានបង្ហាញវត្តមានចូលរួមកម្មវីធីសម្ពោធបទចម្រៀងរបស់អ្នកនាង ទេព បូព្រឹក្ស កាលពីថ្មីៗកន្លងមកនេះ ដែលបង្កឲ្យមានការវែកញែក និងរិះគន់យ៉ាងចាស់ដៃពីសំណាក់មហាជនជាច្រើន។

លោក ហេង ឡុង បានសរសេរខ្លឹមសារអមជាមួយរូបភាពមួយសន្លឹករបស់ ឯម រៀម បែបនេះថា «អភិវឌ្ឍបែបណាក៏ត្រូវតែគិតរឿងអភិរក្សដែរ ច្នៃប្រឌិតបែបនេះ ទទួលយកមិនបាន តើក្រសួងវប្បធម៌គិតយ៉ាងណា?
អត់យល់ពីគាត់»។

ជាមួយគ្នានេះក៏មានមតិជាច្រើនបានស្នើដល់ក្រសួងវប្បធម៌ និងវិចិត្រសិល្ប គួរមានវិធានការព្រមានបុគ្គលរូបនេះផងដែរ ខណៈមានការលើក ឡើងថាភាពអំនួត ភាពជឿជាក់ គិតថាត្រូវរបស់គាត់ធ្វើឲ្យប្រទេសអាម៉ាសដោយសារតែគាត់ វាលើសហើយ។

សាមីខ្លួនលោក ឯម រៀម ក្រោយរងការរិះគន់ដូចបាយពុះស្រាប់តែលោកបានចេញមុខដោយចាត់ទុកថា ការរិះគន់ ឬជេរប្រមាថនោះជារឿងធម្មតា ព្រោះមិនមែនជាលើកទី១ ទេ សម្រាប់លោក។ អ្នកច្នៃ ម៉ូដរូបនេះបានបញ្ជាក់ថា វាជាសិទ្ធិសេរីភាពរបស់លោកហើយឈុតរាជិនីAI ផ្គុំដោយគ្រឿងអេឡិចត្រូនិកនេះ លោកបានដកស្រង់ចេញពីសម័យបុរាណ (បែបសម័យអង្គរ)។ ចំណែកខ្សែ.ក ដែលខ្លួនពាក់គឺដកស្រង់ពីភ្នង (កុលសម្ព័នខ្មែរលើឆ្នាំ១៩២៩)។

គួររម្លឹកថា កន្លងមកឯម រៀមធ្លាប់រងការរិះគន់យ៉ាងចាស់ដៃជាច្រើនដងមកហើយនិងក៏ត្រូវបានក្រសួងវប្បធម៌ និងវិចិត្រសិល្បចេញវិធានការក្តៅព្រមានផងដែរក្រោយបង្ហោះរូបភាពស្រើបស្រាលននលគកនៅលើបណ្តាញសង្គមបណ្តាលឱ្យប៉ះពាល់ដល់វប្បធម៌ ប្រពៃណី និងសេចក្តីថ្លៃថ្នូររបស់សង្គមជាតិយ៉ាងធ្ងន់ធ្ងរ៕

អត្ថបទ៖ ចាន់រ៉ា