ជីវិតកម្សាន្ដ

នាយ ពែកមី ហួសចិត្តផេកមួយចំនួនយករឿងទុក្ខសោកអ្នករងគ្រោះ ទៅផុសបែបលេងសើច

បានផុស

៩ ខែ មុន

នៅ

ថ្ងៃពុធ ១៩ មិថុនា ២០២៤

ដោយ

ដូចមហាជនបានដឹងហើយថា កាលពីល្ងាចថ្ងៃទី១៧ ខែមិថុនា ឆ្នាំ២០២៤ មានរឿងរ៉ាវដ៏រន្ធត់ ពាក់ព័ន្ធករណីបាញ់ប្រហារយ៉ាងព្រៃផ្សៃទៅលើបុរស-នារី ជាគូដណ្តឹង បណ្តាលឲ្យស្លាប់ និងបុគ្គលិកម្នាក់ទៀតរងរបួស ស្ថិតនៅបុរីប៉េងហួតបឹងស្នោ ផ្តើមចេញរឿងទំនាស់ព្រំដី និងស្នួលហាលខោអាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះរឿងហេតុដ៏រន្ធត់នេះ បានក្លាយជាសោកនាដកម្មយ៉ាងសោកសៅ និងសង្វេគបំផុតសម្រាប់គ្រួសារជនរងគ្រោះដែលបានស្លាប់បាត់បង់ជីវិត។ ខណៈទង្វើដ៏ព្រៃផ្សៃនេះត្រូវបានមហាជនគ្រប់មជ្ឈដ្ឋានថ្កោលទោសយ៉ាងខ្លាំងទៅលើជនដៃដល់ដែលមានងារជាឧកញ៉ាឈ្មោះ ស្រី ស៊ីណា ។

ដោយឡែកអ្វីដែលធ្វើឲ្យគេហួសចិត្តខ្លាំងនោះស្រាប់តែមានបុគ្គល និងផេករបស់ជនអគតិមួយចំនួនបានយករឿងរ៉ាវដ៏ទុក្ខសោកនេះទៅបង្ហោះជាខ្លឹមសារបែបលេងសើចទៅវិញ។ ព្រោះតែឃើញបែបនេះតារាកំប្លែងនាយ ពែកមី បានចេញមកបង្ហាញអារម្មណ៍ដោយហួសចិត្តខ្លាំងចំពោះសកម្មភាពមួយចំនួននោះ។

លោក ចែម ចាន់រ៉ា ហៅ នាយ ពែកមី បានបញ្ចេញខ្លឹមសារថា “ផេកមួយចំនួនយករឿងទុក្ខសោករបស់អ្នករងគ្រោះទៅផុសបែបលេងសើច គិតថាផុសទៅគេសើច គេសរសើរថាខ្លួនពូកែររកនឹកកំប្លែង! No… នៅមានផេកច្រើនទៀត”។ មានការលើកឡើងថា «អ្នកផលិតមាតិកាថោកទាបមួយចំនួនក៏អញ្ចឹងដែរ ដើម្បីឆ្នាំងបាយខ្លួនឯងយកទុក្ខសោកគ្រួសារគេមកលេងសើច»។

គេកត់សម្គាល់ថា បន្ទាប់ពីហេតុការណ៍ដ៏រន្ធត់ខាងលើនេះ គឺមានមហាជនជាច្រើនបានសម្តែងការតក់ស្លុត និងអាណិតយ៉ាងខ្លាំងចំពោះជនរងគ្រោះដែលត្រូវបានឃាតកដាច់ចិត្តលើកដៃបាញ់ប្រហារដោយមិនញញើតដៃបណ្តាលឲ្យស្លាប់គូដណ្តឹងពីរនាក់ដែលត្រៀមចូលរោងការនាខែតុលា ឆ្នាំ២០២៤ ខាងមុខនេះ៕

អត្ថបទ៖ ចាន់រ៉ា