ជីវិតកម្សាន្ដ

លោក ហ៊ុយ យ៉ាឡេង សម្រេចផលិតភាពយន្តរឿង”កុំស្លាប់” ក្រោយជីវិតជួបវិបត្តិចង់សម្លាប់ខ្លួន ៣ ដង

បានផុស

៧ ខែ មុន

នៅ

ថ្ងៃព្រហស្បតិ៍ ២៧ មិថុនា ២០២៤

ដោយ

បន្ទាប់ពីជួបរឿងរ៉ាវវិបត្តិផ្លូវចិត្តរហូតប៉ងសម្លាប់ខ្លួន ៣ ដង មកនោះ ផលិតករល្បីឈ្មោះ លោក ហ៊ុយ យ៉ាឡេង បានប្រកាសផលិតខ្សែភាពយន្តរឿង “កុំស្លាប់” ដើម្បីជាសារដាស់តឿនអ្នកធ្លាប់ជួបបញ្ហាវិបត្តិផ្លូវចិត្តដែលប៉ងសម្លាប់ខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ុយ យ៉ាឡេង បញ្ជាក់ថា ដំបូងឡើយ លោកមានគម្រោងសរសេររឿង “សម្លាប់ខ្លួន” ប៉ុន្តែក្រោយមក ដោយបានការផ្តល់យោបល់ពីមិត្តភ័ក្ដិចង់ឲ្យប្តូរពីការផលិតរឿងនេះមកសរសេររឿង “កុំស្លាប់” លោកក៏បានយល់ស្របតាមគំនិតនេះវិញ។

លោក ហ៊ុយ យ៉ាឡេង បាននិយាយថា «សម្លាប់ខ្លួន ជាចំណងជើងភាពយន្តដែលខ្ញុំសរសេរ បន្ទាប់ពីមានវិបត្តិកូវីដ-១៩ វាមានរឿងរ៉ាវច្រើនណាស់ដែលបណ្ដាលចិត្តឲ្យសរសេររឿងនេះ»។

ផលិតករភាពយន្តរូបនេះ បានបន្តថា លោកប្រឡូកវិស័យសិល្បៈតាំងពីឆ្នាំ ២០០០ តាំងពីតួ ២ ដុល្លារ ឡើងជាជំនួយការដឹកនាំ ឡើងជាអ្នកដឹកនាំ អត់មានអ្នកស្គាល់ មកចៃដន្យគេស្គាល់ដោយសាររឿង “វិកលចរិត” អ្នកដឹកនាំដើរតួខ្លួនឯង អត់មានអ្នកមើល ខ្ចីលុយគេមកថតកុន អត់មានអ្នកមើល សល់កង់មួយចង់ជិះកង់ចូលឡាន ចង់សម្លាប់ខ្លួនលើកទី ១។ លើកទី ២ ពេលមានវិបត្តិកូវីដ-១៩ ចង់ថតរឿងវិបត្តិកូវីដ-១៩ ឲ្យគេចងចាំវិបត្តិនោះ តែគ្មានអ្នកមើល ពេលនោះចង់លោតចូលភ្លើង តែចៃដន្យភ្លើងធ្វើឲ្យរលាក ក៏មិនបានលោត។ លើកទី ៣ ពេលអស់មែនទែន ប្រកាសលក់ផ្ទះ ដើម្បីបន្តដំណើរ ក៏គ្មានអ្នកជួយ ក៏សម្រេចចិត្តចេញពីភ្នំពេញទៅសៀមរាប ពេលចេញជិះកាត់ស្ពានជ្រោយចង្វារ ក៏គិតថាកាច់ចង្កូតឡានទម្លាក់ស្ពានជ្រោយចង្វារ តែហាក់ដូនតាទះកំផ្លៀង ឡានពួក ម៉ាកឲ្យខ្ចីជិះ ហេតុអ្វីបានត្រូវទាញឡានគេឲ្យរងគ្រោះ បំណុលធនាគារអ្នកណាអ្នកសងជំនួសយើង។

លោក ហ៊ុយ យ៉ាឡេង បន្តទៀតថា ថ្ងៃនោះ លោកជាន់ហ្វ្រាំងជាប់ កុំអីគ្មានអ្វីអស្ចារ្យក្រៅពីប្រជាជនគេសើចយំទេ ហើយរឿងរ៉ាវសម្លាប់ខ្លួនហាក់មានជើងកបផ្លុំត្រចៀក។

លោកថា «មិត្តភ័ក្ដិខ្ញុំលេបថ្នាំសម្លាប់ខ្លួនម្តងអត់ស្លាប់ ហាក់ដូចមានអ្វីមកទាញ ប៉ុន្តែលើកទី ២ គាត់ស្លាប់ទាល់តែបាន ហេតុនេះហើយខ្ញុំសម្រេចសរសេររឿងដែលមានចំណងជើងថា “សម្លាប់ខ្លួន”»។

ផលិតករ ហ៊ុយ យ៉ាឡេង បញ្ជាក់បន្ថែមថា ប៉ុន្តែក្រោយមកទៀត លោកបានរកឃើញចម្លើយមួយពីមិត្តភ័ក្ដិដែលគេបានដឹងពីសុខភាពជីវិតលោក ហើយលោកក៏ដឹងខ្លួនឯងដូចគ្នា មនុស្សដែលឆ្លងកាត់ការចង់សម្លាប់ខ្លួនឯង ៣ ដងហើយមិនស្លាប់ គឺក្លាយជាមនុស្សរឹងមាំ ហើយមិត្តភ័ក្ដិលោកដែលបានជួយឲ្យផលិតរឿងនេះហើយ ក៏បានសុំប្ដូរចំណងជើងរឿងនេះថា ”កុំស្លាប់”៕

អត្ថបទ ៖ ចាន់រ៉ា