ធនធានដ៏សំខាន់ និងជាមរតកមនុស្សរស់ព្រឹទ្ធាចារ្យ គង់ ណៃ បានទទួលមរណភាព ក្នុងវ័យ ៨០ ឆ្នាំ

មហាជន និងអ្នកគាំទ្រ​ ព្រមទាំងសិល្បករ-សិល្បការិនី​ មានការភ្ញាក់ផ្អើល និង​​រន្ធត់ចិត្ត​បំផុត​ បន្ទាប់ពី​ទទួល​ដំណឹង​ដ៏សោកសៅថា ព្រឹទ្ធាចារ្យ​កោសល្យ​វោហារ គង់ ណៃ បានទទួលមរណភាពហើយ នៅរសៀលថ្ងៃទី២៨ ខែមិថុនា ឆ្នាំ ២០២៤​ នេះ ក្នុងវ័យ ៨០ ឆ្នាំ។

បើយោងតាមការបង្ហោះនៅ​លើគណនី​របស់ អ្នកនាង នៅ សូនីតា បាន​បញ្ជាក់ថា មុននេះបន្តិច​បានទទួល​ដំណឹងពីក្រុមគ្រួសារ​ថា ព្រឹទ្ធាចារ្យ គង់ ណៃ ដែល​ជាធនធាន​ដ៏សំខាន់​ និង​ជាមរតកមនុស្សរស់​បាន​ទទួល​អនិច្ចកម្ម​ទៅហើយ​នៅឯស្រុកកំណើត ដោយ​រោគាពាធ​ក្នុងជន្មាយុ ៨០ ឆ្នាំ។

អ្នកនាង នៅ សូនីតា បានលើកឡើងទៀតថា «ចៅសូម​ឧទ្ទិស​ជូន​វិញ្ញាណក្ខន្ធ​លោកតា​ទៅបាន​ដល់​ឋានបរម​សុខ​តទៅ»។

ចំណែកនៅ​លើទំព័រ​ហ្វេសប៊ុក​របស់ ​លោក គង់ សម័យ ដែល​ជា​កូន​បង្កើត​របស់ ​លោកតា គង់ ណៃ បានបង្ហោះខ្លឹមសារខ្លីថា «សូមពុក​ទៅ​ឱ្យបានសុខ កូនសូមជួប​ពុកគ្រប់​ៗជាតិ លោកពុក គង់ ណៃ»។

ដំណឹង​មរណភាពរបស់​លោកព្រឹទ្ធាចារ្យ​កោសល្យ​វោហារ គង់ ណៃ ដែល​ជាសិល្បករ​ចាប៉ី​ដងវែង​ដ៏ឆ្នើម​ម្នាក់ និង​ជាមរតកមនុស្សរស់​ដ៏​មានតម្លៃ​របស់កម្ពុជានេះ បានធ្វើឱ្យមហាជន និងប្រជាពលរដ្ឋខ្មែរ​ជាច្រើន​សម្តែងការសោកស្តាយ​ជា​ពន់ពេក​ដោយក្នុងនោះ​ក៏មានការ​ចូលរួមរំលែក​ទុក្ខ​​ដ៏​ក្រៀមក្រំ និង​សោកសៅ​នេះ​ជាមួយក្រុមគ្រួសារ​ព្រឹទ្ធាចារ្យ ផងដែរ៕

អត្ថបទ៖ ចាន់រ៉ា