ជីវិតកម្សាន្ដ

លោក ដួង សុខគា អំពាវនាវរួមគ្នាផ្សព្វផ្សាយពីសីលធម៌ សុជីវធម៌ ដើម្បីសេចក្ដីសុខក្នុងសង្គម

បានផុស

៩ ខែ មុន

នៅ

ថ្ងៃចន្ទ ១ កក្កដា ២០២៤

ដោយ

តារាប្រុសពហុជំនាញលោក ដួង សុខគា ទោះបច្ចុប្បន្នមមាញឹកក្នុងការងារសិល្បៈផ្នែកភ្លេងបុរាណយ៉ាងណាក្តី តែជាការកត់សម្គាល់ លោកមិនភ្លេចបំផុសមហាជនខ្មែរ ពាក់ព័ន្ធនឹងរឿងសង្គមនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់ តាមរយៈផ្នត់គំនិតរបស់លោក ដួង សុខគា កន្លងមក លោកតែងចេញសារដាស់តឿនល្អៗ ដែលជាគំនិតវិជ្ជមានសម្រាប់សង្គម ពិសេសយុវជនខ្មែរជំនាន់ក្រោយឲ្យបានយល់ដឹងពីតម្លៃវប្បធម៌ អរិយធម៌ សិល្បៈ និងអក្សរសាស្ត្រជាតិជាដើម…។

តួយ៉ាងថ្មីៗ នេះ លោក ដួង សុខគា បានចេញមកអំពាវនាវ ដោយស្នើឲ្យប្រជាពលរដ្ឋ និងអ្នកគាំទ្រ រួមគ្នាផ្សព្វផ្សាយពីសីលធម៌ សុជីវធម៌ ដើម្បីសេចក្ដីសុខរួមក្នុងសង្គម។ ជាមួយគ្នានោះ លោក សុខគា បានលើកឡើងដែរថា សុជីវធម៌ សីលធម៌ មាននៅទីណា ទីនោះមានក្តីស្រលាញ់ សាមគ្គីភាព ក្តីមេត្តា និងភាពស្រស់បំព្រង។

លោកក៏បានបញ្ជាក់បន្ថែមថា «យើងមិនគាំទ្រដាច់ខាត វីដេអូទាំងឡាយណាដែលបំផ្លាញនូវ សីលធម៌សង្គម ព្រោះវាជាមេរោគបំផ្លាញសេចក្តីសុខរបស់យើងទាំងអស់គ្នា»។ ទន្ទឹមគ្នានេះ មានការបញ្ចេញមតិថា «យើងរួមគ្នាផ្សព្វផ្សាយពីសីលធម៌ សុជីវធម៌ ដើម្បីឲ្យសង្គមយើងមានមនុស្សមានសុជីវធម៌ច្រើនបន្តិច»។

យ៉ាងណាក៏មានការបង្ហាញការគាំទ្រ និងក្តីបារម្ភផងដែរ ចំពោះយុវជនជំនាន់ក្រោយ ដោយទស្សនៈថា «ល្អណាស់បង ព្រោះមនុស្សក្នុងសង្គមយើងឥឡូវ សីលធម៌ និងសុជីវធម៌ ធ្លាក់ចុះខ្លាំងណាស់។ តើមានមនុស្សប៉ុន្មាននាក់ ដែលមើលឃើញដូចខ្ញុំ ខ្ញុំបារម្ភពីក្មេងៗ ជំនាន់ក្រោយដែលទទួលបានឥទ្ធិពលមិនល្អ។ នេះគ្រាន់តែជាមតិ និងការយល់ឃើញរបស់ខ្ញុំប៉ុណ្ណោះ»។

កត់សម្គាល់ដែរថា តារាពហុជំនាញអាចលេងបានគ្រប់ទម្រង់ទាំងសម័យ និងបុរាណ លោក ដួង សុខគា ជារឿយៗ លោកតែងបង្ហាញពីឆន្ទៈបំផុសស្មារតីដល់យុវជនដែលជាកូនខ្មែរគ្រប់រូប ត្រូវនាំគ្នាចូលរួមថែរក្សាតម្លៃវប្បធម៌ អរិយធម៌ និងភាសាជាតិ អក្សរជាតិ ដែលជាកេរដំណែលមរតកដូនតាដ៏ល្អផូរផង់របស់ខ្មែរ៕

អត្ថបទ ៖ ចាន់រ៉ា