ជីវិតកម្សាន្ដ

តារាខ្មែរទី ២ ខេម ប្រកាសជួយក្មេងប្រុសកម្សត់ម្នាក់ ១ ខែ ១០០ ដុល្លារ ពេញ ១ ឆ្នាំ

បានផុស

៤៦ វិនាទី មុន

នៅ

ថ្ងៃសុក្រ ៥ កក្កដា ២០២៤

ដោយ

តារាចម្រៀងសំឡេងស្អកលោក ខេម ដោយក្តីអាណិតអាសូរ និងមើលឃើញការលំបាកនឹកដល់រឿងអតីតកាលរបស់ខ្លួន ក៏បានប្រកាសជួយឧបត្ថម្ភដល់ការសិក្សាចំពោះក្មេងប្រុសកម្សត់ម្នាក់ នូវថវិកា ១០០ ដុល្លារ រយៈពេលពេញ ១ ឆ្នាំ តែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសពីសំណាក់លោក ខេម នេះ បន្ទាប់ពីមានការបង្ហោះចែករំលែកវីដេអូក្មេងប្រុសកម្សត់ម្នាក់ ដែលបានរៀបរាប់នូវទុក្ខលំបាកគ្រួសារ ខណៈឪពុករត់ចោលតាំងពីតូច ចំណែកឯលោកយាយគាត់ដើរសុំទាន និងម្តាយដើរលាងចានឲ្យគេ។

លោក ខេម ជាតារាចម្រៀងខ្មែរទី ២ បន្ទាប់ពី តារាចម្រៀងរ៉េប G-Devith ប្រកាសឧបត្ថម្ភ ១ ខែ ២០០ ដុល្លារ រហូតពេញ ១ ឆ្នាំ ផងដែរ។

លោក ខេម បានបញ្ជាក់ថា “ឃើញការលំបាកក្មួយ ពូនឹកឃើញអតីតកាលពូ ដែលខ្ញុំមានការអាណិតក្មួយណាស់ ពូនឹងឧបត្ថម្ភក្មួយសម្រាប់ការរៀនសូត្រ និងជីវភាព ១០០ ដុល្លារ មួយខែ ក្នុងរយៈពេលមួយឆ្នាំ សូមក្មួយទំនាក់ទំនងមកផេកផ្លូវការដែលបងបានបង្ហោះនេះបាន”។

តាមរយៈដំណឹងនេះបានធ្វើឲ្យមហាជនអ្នកគាំទ្រ និងអ្នកប្រើប្រាស់បណ្ដាញសង្គមហ្វេសប៊ុក មានការរំភើប ព្រមជាមួយការសរសើរចំពោះទឹកចិត្តដ៏ប្រពៃពីសំណាក់តារាចម្រៀងលោក ខេម ដែលបានចែករំលែកក្តីស្រលាញ់មួយនេះដល់គ្រួសារក្មេងប្រុសខាងលើ។

សូមជម្រាបដែរថា តារាចម្រៀងរ៉េប G-Devith ថ្មីៗ នេះ ក៏បានប្រកាសឧបត្ថម្ភ ១ ខែ ២០០ ដុល្លារ រហូតពេញ ១ ឆ្នាំ ជួយក្មេងប្រុសកម្សត់ម្នាក់នេះដែរ។ លោកថា «ដោយឧបនិស្ស័យតាមរយៈការឃើញ Video នេះ ខ្ញុំ ក្រោយទទួលបានព័ត៌មានច្បាស់លាស់ ដោយខ្ញុំសម្រេចថា នឹងឧបត្ថម្ភជួយសម្រួលជីវភាពលោកយាយ និងការសិក្សារបស់ប្អូនប្រុសចំនួន ២០០ ដុល្លារ រាល់ខែ រហូតដល់គ្រប់មួយឆ្នាំពេញ”៕

អត្ថបទ ៖ ចាន់រ៉ា