ព័ត៌មានអន្ដរជាតិ

Adidas ដក Bella Hadid ចេញពីពាណិជ្ជកម្ម ក្រោយរងការរិះគន់យ៉ាងចាស់ដៃពី អ៊ីស្រាអែល

បានផុស

៨ ខែ មុន

នៅ

ថ្ងៃសៅរ៍ ២០ កក្កដា ២០២៤

ដោយ

ក្រុមហ៊ុន Adidas បានដករូបភាពរបស់តារាម៉ូដែល Bella Hadid ចេញពីការផ្សាយពាណិជ្ជកម្មស្បែកជើងកីឡា ដែលបានក្លាយជាមុខក្នុងយុទ្ធនាការសម្រាប់ការដាក់លក់ស្បែកជើងឡើងវិញជុំវិញព្រឹត្តិការណ៍អូឡាំពិកទីក្រុង Munich ឆ្នាំ ១៩៧២ ពេលនោះ ភេរវករប៉ាឡេស្ទីនមកពីក្រុម Black September បានសម្លាប់អត្តពលិកអ៊ីស្រាអែល ១១ នាក់ និងមន្ត្រីប៉ូលីសអាល្លឺម៉ង់ម្នាក់។

ការរិះគន់កើតឡើងបន្ទាប់ពី កំពូលតារាបង្ហាញម៉ូដអាមេរិកវ័យ២៧ មានឪពុកជាជនជាតិប៉ាឡេស្ទីន ដែលញឹកញយនាងបានទាក់ទាញការខឹងសម្បារពីរដ្ឋាភិបាលអ៊ីស្រាអែល ហើយសរសេរពាក្យស្លោកមួយថា “ពីទន្លេដល់សមុទ្រ ប៉ាឡេស្ទីននឹងមានសេរីភាព” ដែលពេលនោះ ត្រូវបានគេចោទប្រកាន់ពីបទប្រឆាំងសាសនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជារឿយៗ នាងតែងតែរិះគន់រដ្ឋាភិបាលអ៊ីស្រាអែលម្តងហើយម្តងទៀត និងគាំទ្រប៉ាឡេស្ទីនជាច្រើនឆ្នាំកន្លងមក ហើយនៅថ្ងៃទី ២៣ខែតុលាបានធ្វើសេចក្តីថ្លែងការណ៍មួយនៅលើ Instagram ទួញសោកចំពោះការបាត់បង់ជីវិតស្លូតត្រង់ ខណៈពេលដែលនាងក៏បានអំពាវនាវឲ្យអ្នកដើរតាមដាក់សម្ពាធមេដឹកនាំរបស់ពួកគេឲ្យការពារជនស៊ីវិលនៅតំបន់ហ្គាហ្សា។

ភ្លាមៗនោះដែរ ក្រសួងការបរទេសអ៊ីស្រាអែលបានរិះគន់យ៉ាងខ្លាំងចំពោះការបង្ហាញខ្លួនរបស់ Hadid នៅក្នុងយុទ្ធនាការនៅលើប្រព័ន្ធផ្សព្វផ្សាយសង្គម ដោយអំពាវនាវដល់ក្រុមហ៊ុន Adidas ជួយដោះស្រាយកំហុសដ៏ធ្ងន់ធ្ងរ ហើយខ្លួនសូមជំទាស់នឹង Hadid ថាជាមុខនៃយុទ្ធនាការរបស់ក្រុមហ៊ុន។

លើសពីនេះ ក្រសួងការបរទេសអ៊ីស្រាអែលបានសរសេរនៅលើបណ្ដាញសង្គម X បន្ថែមថា “សម្រាប់ក្រុមហ៊ុន Adidas ក្នុងការជ្រើសរើសគំរូប្រឆាំងនឹងប្រទេសអ៊ីស្រាអែល ដើម្បីរំលឹកឡើងវិញនូវកីឡាអូឡាំពិកដ៏ខ្មៅងងឹតនេះ គឺជាកំហុសដ៏ធំឬដោយចេតនា ដែលមិនអាចទទួលយកបានទេ” ។

ទោះបីជាយ៉ាងណា មកដល់ពេលនេះ ក្រុមហ៊ុនសម្លៀកបំពាក់កីឡាដែលមានមូលដ្ឋាននៅប្រទេសអាឡឺល្លឺម៉ង់ បាននិយាយថា ខ្លួនកំពុងពិនិត្យឡើងវិញនូវយុទ្ធនាការរបស់ខ្លួន បន្ទាប់ពីការរិះគន់ពីអ៊ីស្រាអែលជុំវិញការចូលរួមរបស់តារាម៉ូដែលស្រីជនជាតិអាមេរិក។ ជាពិសេសក្រុមហ៊ុនបានបញ្ចាក់ទៀតថា “យើងដឹងច្បាស់ថាការតភ្ជាប់ត្រូវបានធ្វើឡើងចំពោះព្រឹត្តិការណ៍ប្រវត្តិសាស្ត្រដ៏សោកនាដកម្ម ទោះបីជាទាំងនេះជារឿងអចេតនាទាំងស្រុងក៏ដោយ ហើយយើងសូមអភ័យទោសចំពោះការតូចចិត្ត ឬទុក្ខព្រួយដែលបង្កឡើង។

យ៉ាងណាមិញ នេះក៏មិនមែនជាលើកទីមួយទេ ដែលក្រុមហ៊ុនសម្លៀកបំពាក់កីឡាកាត់ផ្តាច់ទំនាក់ទំនងជាមួយទូតសុឆន្ទៈល្បីៗ បន្ទាប់ពីមានការចោទប្រកាន់ពីបទប្រឆាំងសាសនា។ កន្លងមក Adidas បានបញ្ចប់ភាពជាដៃគូរបស់ខ្លួនជាមួយតារាចម្រៀងរ៉េប Kanye West ក្នុងខែតុលា ឆ្នាំ ២០២២ ដោយនិយាយថា មិនអត់ឱនចំពោះអ្នកប្រឆាំងទេ បន្ទាប់ពីតារារ៉េបរូបនេះបង្ហោះលើ Instagram និង Twitter ជុំវិញការបង្ហោះប្រមាថ៕