ជីវិតកម្សាន្ដ

អ្នកគាំទ្រភ្ញាក់ផ្អើលយ៉ាងខ្លាំង ក្រោយ YG ប្រកាសក្ដែងៗថា 2NE1 នឹងវិលមកជួបគ្នានៅចុងឆ្នាំ ២០២៤

បានផុស

៧ ខែ មុន

នៅ

ថ្ងៃចន្ទ ២២ កក្កដា ២០២៤

ដោយ

នៅថ្ងៃទី ២២ ខែកក្កដា ផលិតកម្ម YG Entertainment បានចេញវីដេអូប្រកាសពិសេសមួយ ដែលស្ថាបនិក Yang Hyun Suk ផ្ទាល់ បានបង្ហាញពីផែនការនាពេលខាងមុខរបស់ក្រុមហ៊ុនថា ក្រុម 2NE1 នឹងត្រលប់មកជួបជុំគ្នាវិញនៅឆ្នាំនេះ ហើយចាប់ផ្តើមដំណើរទេសចរណ៍ដែលនឹងបន្តដល់ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថាបនិក YG រូបនេះបាននិយាយតាមរយៈឃ្លិបវីដេអូមួយដោយបញ្ចាក់ថា ១៥ឆ្នាំបន្ទាប់ពីការបង្ហាញខ្លួនដំបូងរបស់ពួកគេ ក្រុមចម្រៀងស្រីដ៏ល្បីល្បាញនឹងត្រលប់មកវិញសម្រាប់ដំណើរទេសចរណ៍ពិភពលោក ដែលនឹងចាប់ផ្តើមនៅទីក្រុងសេអ៊ូលក្នុងខែតុលានេះ។ បន្ទាប់មក ដំណើរកម្សាន្តនឹងនាំក្រុម 2NE1 ទៅកាន់ទីក្រុងអូសាកា នៅចុងខែវិច្ឆិកា និងទីក្រុងតូក្យូក្នុងខែធ្នូ មុនពេលបន្តរហូតដល់ឆ្នាំ ២០២៥។

យ៉ាងណា បន្ទាប់ពីបានឮដំណឹងមួយនេះចេញពីមាត់របស់លោក Yang Hyun Suk មិនថាតែអ្នកលេងអ៊ីនធឺណែតទូទាំងពិភពលោកនិងមហាជនក្នុងប្រទេសកូរ៉េនោះទេ ពួកគេមិនអាចទប់ចិត្តរំភើប ចំពោះការវិលត្រលប់មកវិញនៃក្រុមចម្រៀងនារីជំនាន់ទី ២ ដ៏ល្បីល្បាញនេះទេ។ គ្រប់គ្នាបានសម្ដែងការភ្ញាក់ផ្អើលដោយរំពឹងថា តើកុងត្រារបស់ក្រុមជាមួយនឹង YG ត្រូវបានបន្តឬអត់។ មនុស្សជាច្រើនក៏បានងឿងឆ្ងល់ថា អ្នកណានឹងផលិតតន្ត្រីរបស់ពួកគេ ដោយសារតែអ្នកផលិតចម្រៀងរបស់ពួកគេ គឺ Teddy បានចាកចេញពី YG យូរណាស់មកហើយ។ ស្របពេលដែលអ្នកគាំទ្រផ្សេងទៀតបានសន្និដ្ឋានថា CL អាចនឹងផលិតបទភ្លេងថ្មីសម្រាប់ 2NE1 ផ្ដាច់មុខតែម្ដង។

មិនត្រឹមប៉ុណ្ណឹងទេ ងាកទៅកាន់ទស្សនិកមួយចំនួនទៀត ហាក់មិនចង់ជឿនូវដំណឹងនៃការវិលត្រលប់របស់ក្រុម 2NE1 ឡើយ ដោយពួកគេគិតថា នេះជាការលេងសើចប៉ុណ្ណោះ។ ប៉ុន្តែក៏នៅតែមានមនុស្សជាច្រើនបានសាទរនូវការវិលមកវិញ និងរង់ចាំការប្រគំតន្រ្តីដ៏ធំរបស់សមាជិកក្រុម នៅលើឆាកដ៏ធំមួយផងដែរ។

ទន្ទឹមនោះដែរ សូម្បីតែសមាជិកក្រុម 2NE1 រួមទាំង CL, Sandara Park និង Minzy បានអបអរព័ត៌មាននេះនៅលើគណនីបណ្តាញសង្គមរៀងៗខ្លួន ភ្លាមៗបន្ទាប់ពីការប្រកាសជាផ្លូវការរបស់ Yang Hyun Suk តែម្ដង។

យ៉ាងណាមិញ ដំណឹងនៃការវិលត្រលប់របស់ក្រុមចម្រៀងស្រីដ៏ល្បីល្បាញ 2NE1 មិនមែនជាលើកទីមួយឡើយសម្រាប់អ្នកគាំទ្ររបស់ពួកគេ។ កន្លងមកក៏ពាក្យចចាមអារ៉ាមពីការជួបជុំគ្នាជាថ្មីទៀតនៅមុនខួបលើកទី១៥ឆ្នាំរបស់ក្រុមនេះ ប៉ុន្តែផលិតកម្ម YG បែរចេញមុខបញ្ជាក់ថា Yang Hyun Suk គ្រោងនឹងជួបជាមួយសមាជិកទាំង៤រូបមែន ប៉ុន្តែវាជាជំនួបធម្មតាតែប៉ុណ្ណោះ ហើយមិនមែនជាកិច្ចប្រជុំផ្លូវការនោះទេ៕