ជីវិតកម្សាន្ដ

ខេមរៈ សិរីមន្ត គាំទ្ររៀមច្បង ម៉េង កែវពេជ្ជតា និង ចន ច័ន្ទលក្ខិណា ទទួលយកការអធ្យាស្រ័យគ្នា

បានផុស

៦ ខែ មុន

នៅ

ថ្ងៃពុធ ២៤ កក្កដា ២០២៤

ដោយ

កំពូលតារាចម្រៀងងារជាឧកញ៉ា លោក ខេមរៈ សិរីមន្ត បានសម្ដែងការគាំទ្រយ៉ាងពេញទំហឹង ខណៈតារាស្រីរៀមច្បង ២ ដួង គឺអ្នកនាង ម៉េង កែវពេជ្ជតា និង អ្នកនាង ចន ច័ន្ទលក្ខិណា ទទួលយកនូវការអធ្យាស្រ័យគ្នាក្រោមការសម្របសម្រួលរបស់ប្រធានសមាគមសិល្បករខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខេមរៈ សិរីមន្ត បានបញ្ជាក់ថា នេះជាដំណោះស្រាយដ៏ល្អ និងគំរូចំពោះអ្នកសិល្បៈជំនាន់ក្រោយដោយសាររៀមច្បងសិល្បៈទាំង ២រូប ទទួលយកដំណោះស្រាយនៃការសម្របសម្រួលដ៏ល្អមួយនេះ។ លោកបន្តថា ក្នុងនាមជាសិល្បៈករខ្មែរមួយរូប ខ្ញុំបាទ ខេមរៈ សិរីមន្ត ពិតជារំភើបខ្លាំងណាស់ពេលឃើញបងៗទាំងពីរបានទទួលយកការអធ្យាស្រ័យគ្នា រួបរួមគ្នាឡើងវិញ នេះជាគំរូល្អខ្លាំងណាស់សម្រាប់ប្អូនៗ។

កំពូលតារាចម្រៀង ខេមរៈ សិរីមន្ត បានលើកឡើងទៀតថា សូមអរគុណចំពោះលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរដែលបានជួយសម្រួលដល់ពួកគាត់ទាំងពីរបានជួបគ្នាវិញ ស្រលាញ់គ្នាវិញ ក្នុងនាមជាបងជាប្អូនសិល្បករខ្មែរ។

សូមជម្រាបថា ជម្លោះយ៉ាងក្តៅគគុករវាងកំពូលតារាចម្រៀងអ្នកនាង ម៉េង កែវពេជ្ជតា និងអតីតប្រធានសមាគមសិល្បករខ្មែរអ្នកនាង ចន ច័ន្ទលក្ខិណា ដែលអូសបន្លាយអស់រយៈពេលជាច្រើនឆ្នាំត្រូវបានផ្សះផ្សាគ្នា ១០០ភាគរយហើយ ក្រោមការសម្របសម្រួលរបស់លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ។

ដោយមើលឃើញពីស្ថានការណ៍កាន់តែអាក្រក់បែបនេះ និងដើម្បីសាងសាមគ្គីភាពនៅក្នុងសង្គមសិល្បៈលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរក៏បានចូលខ្លួនធ្វើជាអ្នកសម្របសម្រួលប្រកបដោយតម្លាភាពដោយឈរលើគោលការណ៍ឈ្នះឈ្នះទាំងសងខាង៕

អត្ថបទ៖ ចាន់រ៉ា