ជីវិតកម្សាន្ដ

ល្អហួស ប្ដេជ្ញាចូលរួមផ្សព្វផ្សាយលើកស្ទួយនូវមរតកវប្បធម៌ និងទេសចរណ៍ ទាំងលើឆាកជាតិ-អន្តរជាតិ

បានផុស

៧ ខែ មុន

នៅ

ថ្ងៃព្រហស្បតិ៍ ២៥ កក្កដា ២០២៤

ដោយ

ក្នុងនាមកូនខ្មែរមួយរូប ជូរី ល្អហួស ដែលជាម្ចាស់មកុដ Miss Preteen Junior Idol 2024 បានបង្ហាញការប្ដេជ្ញាចិត្ត ដើម្បីចូលរួមផ្សព្វផ្សាយលើកស្ទួយនូវមរតកវប្បធម៌ និងទេសចរណ៍ ទៅលើឆាកជាតិ-អន្តរជាតិ ឲ្យនៅគង់វង្សយូរអង្វែង សម្រាប់កូនចៅជំនាន់ក្រោយបានស្គាល់នូវអ្វីដែលជារបស់ខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្មីៗកន្លងមកនេះ យុវតី ជូរី ល្អហួស ក៏បានដាក់ក្តីរំពឹងថា ខ្លួននឹងចូលផ្សព្វផ្សាយរបាំអប្សរាឲ្យពិភពលោកបានស្គាល់ប្រទេសដ៏អច្ឆរិយរបស់ប្រទេសកម្ពុជា។ ការប្រកាសនេះ បន្ទាប់ពី ល្អហួស ទទួលបានការអនុញ្ញាតឲ្យថត«របាំអប្សរា» នៅប្រាសាទអង្គរវត្តដូចការរំពឹងទុក។

ទោះបីជាយ៉ាងណាពេលនេះម្ចាស់មកុដ Miss Preteen Junior Idol 2024 រូបនេះ បានរម្លឹកផងដែរជាមួយព្រះរាជបណ្តាំរបស់ព្រះរាជបុត្រី សម្តេច «ព្រះរាម នរោត្តម បុផ្ផាទេវី ទេពនាដវដ្តីឯក» ជាមួយនឹងការប្ដេជ្ញាក្នុងការចូលរួមផ្សព្វផ្សាយលើកស្ទួយនូវមរតកវប្បធម៌ និងទេសចរណ៍កម្ពុជាទៅកាន់ពិភពលោក។

ល្អហួស បានឲ្យដឹងថា «ព្រះរាជបណ្តាំរបស់ព្រះរាជបុត្រី សម្តេច «ព្រះរាម នរោត្តម បុផ្ផាទេវី ទេពនាដវដ្តីឯក» ដែលព្រះអង្គបានផ្ដែផ្ដាំកូនចៅជាអ្នកសិល្បករក្ដី ជាសាមញ្ញជនក្ដី ឲ្យមានចិត្តកតញ្ញូស្រឡាញ់សិល្បៈបុរាណខ្មែរ និងគាំទ្រ ឧបត្ថម្ភ កុំឲ្យវប្បធម៌សិល្បៈជាតិបាត់បង់»។

ជូរី ល្អហួស បាននិយាយបន្តថា «ឆាប់ៗ ខាងមុខនេះ នាងខ្ញុំ នឹងថតរបាំអប្សរានៅប្រាសាទអង្គរវត្ត ដើម្បីចូលរួមផ្សព្វផ្សាយ និងលើកស្ទួយនូវមរតកវប្បធម៌ ក៏ដូចជាទេសចរណ៍ ទាំងលើឆាកជាតិ និងឆាកអន្តរជាតិ នាងខ្ញុំ ក៏សូមឧទ្ទិសស្នាដៃខាងមុខជូនលោកគ្រូ អ្នកគ្រូ សិល្បករទាំងអស់ កុំបីអខានឡើយ»។

យុវតី ជូរី ល្អហួស បញ្ជាក់បន្ថែមទៀតថា ក្នុងនាមនាងជាកូនខ្មែរមួយរូប នាងសូមប្ដេជ្ញាចិត្តថា នឹងថែរក្សាសម្បត្តិមួយនេះឲ្យនៅគង់វង្សយូរអង្វែង ដើម្បីឲ្យកូនចៅជំនាន់ក្រោយបានស្គាល់នូវអ្វីដែលជារបស់ខ្មែរផងដែរ៕

អត្ថបទ ៖ ចាន់រ៉ា