ជីវិតកម្សាន្ដ

ស្រួង ភាវី ខកចិត្តខ្លាំង ក្រោយផ្ទុះរឿងយកហូលខ្មែរទៅស្លៀកហាត់ប្រាណជាន់ឈ្លីវប្បធម៌

បានផុស

៧ ខែ មុន

នៅ

ថ្ងៃសៅរ៍ ២៧ កក្កដា ២០២៤

ដោយ

កីឡាការិនីប៊ីយ៉ា-ស្នូកឃ័រជម្រើសជាតិកម្ពុជា អ្នកនាង ស្រួង ភាវី បានបង្ហាញការខកចិត្តជាខ្លាំង ក្រោយឃើញសកម្មភាពរបស់បុគ្គលមួយចំនួន ជោរតាមគ្នា ដោយមិនគិតពីតម្លៃអត្តសញ្ញាណ តម្លៃវប្បធម៌ជាតិ ដែលទង្វើនេះហាក់កំពុងបំពុលទម្លាក់តម្លៃសង្គមជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ចេញប្រតិកម្មមិនសប្បាយចិត្តចំពោះទង្វើរបស់បុគ្គលមួយចំនួនដែលកំពុងជោរតាមគ្នាពីសំណាក់កីឡាការិនីរូបនេះ បន្ទាប់ពីមានការបង្ហោះចែករំលែកនៅលើបណ្ដាញសង្គមហ្វេសប៊ុក និងTik Tok ខណៈឃើញសកម្មភាពរបស់នារីៗមួយចំនួន បានយកហូលខ្មែរទៅស្លៀកហាត់ប្រាណ ហាក់មិនផ្តល់តម្លៃអត្តសញ្ញាណ និងតម្លៃវប្បធម៌ជាតិខ្លួនឯង។

អ្នកនាង ស្រួង ភាវី បានលើកឡើងខ្លឹមសារខ្លីខ្លឹមថា «តម្លៃអត្តសញ្ញាណ តម្លៃវប្បធម៌ជាតិ មិនអាចចេះតែយកមកលេងសើចតាមអំពើចិត្តបានទេ សុំរួសរាន់ចេញទទួលកំហុសឆាប់ទៅ កុំឲ្យមានការអន្តរាគមន៍ទាន់ បំណងល្អពីខ្ញុំ»។

ដោយឡែកងាកមកមើលមហាជន និងអ្នកប្រើប្រាស់បណ្ដាញសង្គមហ្វេសប៊ុកមួយចំនួនធំគឺមិនខុសគ្នាពីកីឡាការិនី ស្រួង ភាវី នោះទេ ដោយបានផ្ទុះការរិះគន់យ៉ាងខ្លាំងចំពោះទង្វើបែបនេះ ខណៈដែលអ្នកខ្លះស្នើឲ្យក្រសួងពាក់ព័ន្ធគួរមានវិធានការក្តៅលើរឿងនេះ ពិសេសចំពោះបុគ្គលជោរតាមគ្នា។

ជាមួយគ្នានេះ មានការលើកឡើងជាច្រើនពីសំណាក់អ្នកលេងហ្វេសប៊ុកថា «ទង្វើបែបនេះ កំពុងតែជាន់ឈ្លីតម្លៃប្រពៃណី វប្បធម៌ និងតម្លៃអត្តសញ្ញាណជាតិ ដែលនាំឲ្យជាតិសាសន៍ដទៃ ឬ បរទេសមើលងាយមកលើប្រទេស។ តើគួរឲ្យកើតមានទង្វើបែបនេះទៀតទេ? ក្រសួងគួរធ្វើបែបណាចំពោះបុគ្គលទាំងនោះ?»។ នេះជាសំសួររបស់មហាជន។

ក្នុងនោះក៏មានការបញ្ចេញទស្សនៈថា «ជួយពិចារណាផងបងប្អូន ឡប់ជាប្រព័ន្ធ វប្បធម៌ ប្រពៃណីខ្មែរមិនអាចយកមកលេងសើចបានទេ សម្លៀកបំពាក់នេះស្លៀកបានក្នុងកម្មវិធីប្រពៃណីផ្សេងៗ ដែលបង្ហាញពីអត្តសញ្ញាណជាតិ បង្ហាញពីភាពទន់ភ្លន់របស់ខ្មែរ មិនមែនយកមកផ្ចាញ់ផ្ចាលចង់ឈ្នះចង់ចាញ់នោះទេ»។

សូមបញ្ជាក់ដែរថា សកម្មភាពបែបគឃ្លើនខាងលើពីសំណាក់បុគ្គលមួយចំនួននេះ គឺលេចឡើងបន្ទាប់ពីមានការបង្ហោះរិះគន់របស់ម្ចាស់ហ្វេសប៊ុកមួយពាក់ព័ន្ធរឿងមិនសមភ្នែកដែលស្ត្រីខ្លះស្លៀកពាក់ទៅហាត់ប្រាណហាក់បញ្ចេញភាពសិចស៊ីជ្រុលហួសហេតុ៕

អត្ថបទ ៖ ចាន់រ៉ា