IU ម៉ៅផ្ដាច់កៅអី VIP លើយន្តហោះអាមេរិក ឲ្យបុគ្គលិកជាង ១០០ នាក់ ជិះទៅកូរ៉េវិញយ៉ាងរំភើយ

យោងតាមការរាយការណ៍ថាពី Allkpop បានបញ្ចាក់ឲ្យដឹងថា តារាចម្រៀងកូរ៉េ IU បានម៉ៅផ្ដាច់កៅអីថ្នាក់ធុរកិច្ច ឬ Business Class សម្រាប់បុគ្គលិកជាង ១០០ នាក់ ដែលបានធ្វើការយ៉ាងលំបាកក្នុងអំឡុងពេលជើងហោះហើរសហរដ្ឋអាមេរិក នៃដំណើរប្រគំតន្ត្រីពិភពលោករបស់នាងនាពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ០៤ ខែសីហា សហគមន៍អនឡាញជាច្រើនពោរពេញទៅដោយរូបថតបង្ហោះរបស់បុគ្គលិក បង្ហាញពីកៅអី Business Class របស់ពួកគេដែលត្រូវបានគេចាត់ទុកថា ជាថ្នាក់កាប៊ីនលំដាប់ថ្នាក់ខ្ពស់មួយ ជាមួយនឹងសេវាកម្មពិសេសផ្ទាល់ខ្លួន ដូចជាអាហារ និងភេសជ្ជៈដែលមានគុណភាពខ្ពស់ កន្លែងអង្គុយធំជាង ងាយស្រួលជាងមុន កន្លែងធ្វើការផ្ទាល់ខ្លួន ឧបករណ៍ធ្វើដំណើរនិងមានអ្វីៗច្រើនទៀត។

យ៉ាងណា បុគ្គលិកទាំងនេះបានសម្តែងការដឹងគុណចំពោះ ថៅកែខ្លួនសម្រាប់កាយវិការគិតគូររបស់នាងចំពោះពួកគេ។ ស្របពេលដែល បុគ្គលិកម្នាក់បានសរសេរថា “ភាពបត់បែនរបស់នាង នោះគឺការផ្តល់កៅអី Business Class សម្រាប់បុគ្គលិកទាំងអស់ ជារង្វាន់សម្រាប់ការខិតខំប្រឹងប្រែងរបស់ពួកគេ។ ក្នុងនោះសូម្បីតែបុគ្គលិកផ្សេងក្នុងចំណោមជាង១០០នាក់ បានបង្ហោះសារបន្ទរពីក្រោយ​​ អមដោយសំណេរមនោសញ្ចេតនាសម្ដែងការដឹងគុណដល់ IU ដូចៗគ្នាថា​ អរគុណ Lee Ji-eun របស់ពួកយើង ពេលនេះគ្រប់គ្នាសុទ្ធតែបានជិះយន្តហោះដោយសុវត្ថិភាពត្រឡប់ទៅកាន់ប្រទេសកូរ៉េវិញ​។ អរគុណយ៉ាងខ្លាំង នាងគឺជា Fairy ដ៏អស្ចារ្យបំផុតសម្រាប់សមាជិកក្រុមទាំងអស់។

ដោយឡែក យោងតាមរបាយការណ៍ដដែលបានបង្ហាញថា​ ក្រុមប្រគំតន្ត្រីរបស់ IU រួមមានអ្នករាំយ៉ាងហោចណាស់ ៣០ នាក់ប៉ុណ្ណោះ ហើយនាងបានផ្តល់សំបុត្រ Business Class សម្រាប់មនុស្សជាង ១០០ នាក់ រួមទាំងសមាជិកក្រុម នាយកប្រតិបត្តិ និងក្រុមសន្តិសុខផងដែរ។

IU បានធ្វើការប្រគំតន្ត្រីទេសចរណ៍ពិភពលោកលើកដំបូងរបស់នាងក្រោមប្រធានបទ ‘HEREH’ ចាប់តាំងពីខែមីនា ដោយចាប់ផ្តើមនៅទីក្រុងសេអ៊ូល។ ក្នុងអំឡុងពេលដំណើរទេសចរណ៍នៅអាមេរិកខាងជើងថ្មីៗនេះ នាងបានបញ្ចប់ការប្រគំតន្ត្រីនៅទីក្រុង Newark ដោយជោគជ័យនៅថ្ងៃទី ១៥ ខែកក្កដា អាត្លង់តានៅថ្ងៃទី ១៩ ខែកក្កដា វ៉ាស៊ីនតោនឌីស៊ីនៅថ្ងៃទី ២២ ខែកក្កដា Rosemont នៅថ្ងៃទី ២៥ ខែកក្កដា Oakland នៅថ្ងៃទី ៣០ ខែកក្កដា និងទីក្រុង Los Angeles នៅថ្ងៃទី ០២ ខែសីហា។

ទោះបីជាយ៉ាងណាក៏ដោយ​ នេះមិនមែនជាលើកទីមួយទេ ដែលតួឯកស្រីក្នុងរឿង Hotel del Luna បង្ហាញកាយវិការកោតសរសើរដល់បុគ្គលិករបស់នាង។ ក្នុងអំឡុងពេលដំណើរកម្សាន្តនេះ IU ក៏បានជូនអំណោយដល់បុគ្គលិករបស់នាង ទៅកាន់ Universal Studios Hollywood ក្នុងទីក្រុង LA ផងដែរ។

បន្ថែមពីនេះ ក៏មានសេចក្តីរាយការណ៍មកថា ក្នុងអំឡុងពេលប្រគំតន្ត្រីនៅប្រទេសជប៉ុន IU បានរៀបចំរថយន្តដឹកអាហារដ៏ប្រណិតមួយសម្រាប់បុគ្គលិករបស់នាង ធ្វើឲ្យមានការចាប់អារម្មណ៍យ៉ាងខ្លាំងនាពេលនោះ៕

អត្ថបទ៖ សាង ស្រីល័ក្ខ

ចុចអាន៖IU នៅតែធ្វើសប្បុរសធម៌ មិនខ្វល់ពាក្យចចាមអារ៉ាមបែកគ្នាជាមួយ Lee Jong Suk