ជីវិតកម្សាន្ដ

ណុប បាយ៉ារិទ្ធ បំផុសយុវជនជំនាន់ក្រោយគាំទ្រលើកគុណតម្លៃហូលខ្មែរជាមរតកពីដូនតា

បានផុស

៩ ខែ មុន

នៅ

ថ្ងៃពុធ ៧ សីហា ២០២៤

ដោយ

តារាចម្រៀង លោក ណុប បាយ៉ារិទ្ធ អំពាវនាវដល់ប្រជាពលរដ្ឋ ពិសេសយុវជនជំនាន់ក្រោយ ត្រូវនាំ គ្នាចូលរួមគាំទ្រ និងលើកគុណតម្លៃពីហូលខ្មែរដែលជាមរតកដូនតាកុំឲ្យបាត់បង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណុប បាយ៉ារិទ្ធ បានបញ្ជាក់ថា ស្មារតីក្នុងការចូលរួមគាំទ្រ និងលើកគុណតម្លៃពីហូលខ្មែរជារឿងដ៏ចាំបាច់សម្រាប់មហាជន និងមនុស្សជំនាន់ក្រោយ។ លោកថា លោកពិតជាស្រលាញ់ណាស់ ព្រោះពាក់មកឃើញពីគុណតម្លៃនៅនឹងមុខតែម្ដង ម្យ៉ាងទៀតហូលខ្មែរគឺពាក់ចូលរួមថែមរតកដូនតា ដូច្នេះបើចេះថែទាំទុកដាក់បានល្អ នោះនឹងពាក់តដល់កូនចៅ។

តារាចម្រៀងប្រុស ណុប បាយ៉ារិទ្ធ បានរៀបរាប់ទៀតថា គុណតម្លៃ នៃហូលខ្មែរ គឺឆ្លងកាត់ការលំបាកច្រើនដំណាក់កាលណាស់ រាប់ចាប់តាំងពីចំណុចចាប់ផ្ដើម នៃការចិញ្ចឹមនាងយកសូត្រ ស្ងោរសូត្រស្រាវសូត្រ រវៃសូត្រ រុំសូត្រ ភាពច្នៃប្រឌិតខ្ពស់ក្នុងការចងគោម រំលេចក្រឡា រុំពណ៌ ជ្រលក់ពណ៌ លើកត្រក ឆ្កឹះត្រក រួមផ្សំនឹងការតស៊ូអំណត់អត់ធ្មត់ក្នុងការត្បាញ ត្បាញម្ដងមួ យសរសៃៗ ដែលកើតចិត្តពីគំនិតច្នៃប្រឌិតពោរពេញដោយទេពកោសល្យគួរឲ្យស្ងើចសរសើរ។

តារាចម្រៀងលោក ណុប បាយ៉ារិទ្ធ និយាយទៀតថា ចំណុចទាំងអស់នេះកើតឡើងពីក្តីស្រលាញ់ ការថែរក្សា និងអភិរក្សដ៏ខ្ជាប់ខ្ជួនពីអ្នកចំណេះជំនាញដែលជាមរតកដូនតាមិនអាចកាត់ថ្លៃបានបន្តគ្រប់ជំនាន់។

លោកបានបន្ថែមថា លោកសង្ឃឹមថាប្រជាជនកម្ពុជា ពិសេសមនុស្សជំនាន់ក្រោយ ចូលរួមគាំទ្រ លើកគុណតម្លៃពីហូលខ្មែរដែលជាមរតកពីដូនតាកុំឲ្យបាត់បង់ ដោយកុំគិតរឿងតម្លៃជាធំ ព្រោះតម្លៃកើតពីគុណភាព និងកម្លាំងកាយចិត្តដែលប្រឹងប្រែងធ្វើ ព្រោះធ្វើដោយដៃទាំងអស់។ លោកថា ហត់នឿយណាស់ទម្រាំបានជាសមិទ្ធផលមួយក្បិនៗ គួរយើងចូលរួមលើកស្ទួយទើបមិនបាត់បង់៕

អត្ថបទ ៖ ចាន់រ៉ា