ផលិតកម្ម ៤ នាំមុខគេនៅកូរ៉េខាងត្បូង កើបប្រាក់ចំណេញរាប់លានដុល្លារ ពីវិស័យ K pop

នៅក្នុងឆ្នាំ២០២៤នៃត្រីមាសទី ២ យោងតាមរបាយការណ៍ដែលចេញផ្សាយដោយ Allkpop បានគូសបញ្ចាក់អំពីហិរញ្ញវត្ថុផ្សេងៗគ្នារបស់ក្រុមហ៊ុនកម្សាន្តធំ៤​ ដែលស្ថិតនៅក្នុងឧស្សាហកម្ម K-pop មានដូចជា HYBE, SM , JYP និង YG ។

ទីភ្នាក់ងារ HYBE ដែលជាផលិតកម្មយក្សដ៏ធំបំផុតនៅប្រទេសកូរ៉េខាងត្បូង និងជាទ្រនំដ៏កក់ក្ដៅរបស់ក្រុម BTS និង SEVENTEEN បានរាយការណ៍ពីប្រាក់ចំណេញប្រតិបត្តិការដ៏គួរឲ្យចាប់អារម្មណ៍ចំនួន ៥០.៩ ពាន់លានវ៉ុន ស្មើនឹង ៣៧ លានដុល្លារ លើប្រាក់ចំណូល ៦៤០.៥ ពាន់លានវ៉ុន​ ស្មើនឹង ៤៦៥ លានដុល្លារ ។

សម្រាប់ SM Entertainment ដែលត្រូវគេស្គាល់ថាបានដឹកនាំសកម្មភាពដ៏មានឥទ្ធិពលដូចជាក្រុម EXO, NCT និង aespa បានប្រកាសប្រាក់ចំណេញប្រតិបត្តិការចំនួន ៣១.៨ ពាន់លានវ៉ុន ស្មើនឹង ២៣.១ លានដុល្លារ លើប្រាក់ចំណូល ២៤៤.១ ពាន់លានវ៉ុនស្មើនឹង ១៧៧ លានដុល្លារ។

ចំណែកឯ​ JYP ក៏ជាផលិតកម្មឈានមុខគេក្នុងប្រទេស មិនខុសពីផលិតកម្ម២ខាងលើនោះទេ។ ទីភ្នាក់ងារនេះមានក្រុមពេញនិយមដូចជា TWICE, Stray Kids និង ITZY បានកត់ត្រាប្រាក់ចំណេញប្រតិបត្តិការចំនួន ២០ ពាន់លានវ៉ុន ​ស្មើនឹង ១៤.៥ លានដុល្លារ​ លើប្រាក់ចំណូល ៩៦.៨ ពាន់លានវ៉ុន ស្មើនឹង ៧០.៣៥ លានដុល្លារ ។

ដោយឡែក ងាកមកកាន់ YG Entertainment ឯណោះក៏មិនធម្មតាដែរ។ ស្លាកនេះត្រូវគេដឹងថា នៅពីក្រោយ ក្រុម BABYMONSTER ក៏បានរាយការណ៍ពីប្រាក់ចំណេញប្រតិបត្តិការ ៣០០លានវ៉ុន ស្មើនឹង ២១ម៉ឺន៨ពាន់ដុល្លារ លើប្រាក់ចំណូល ១០១.៧ ពាន់លានវ៉ុន ស្មើនឹង ៧៣.៩លានដុល្លារ ។

ថ្វីដ្បិតតែក្នុងចំណោមក្រុមហ៊ុនកម្សាន្ត៤ខាងលើនេះ​​ ទទួលបានប្រាក់ចំណេញក៏មែនពិត ប៉ុន្តែក្នុងនោះទស្សនិកជនក្នុងប្រទេសកូរ៉េសុទ្ធតែដឹងហើយថា ទីភ្នាក់ងារខ្លះកំពុងរងនូវរឿងអាស្រូវកេរ្តិ៍ឈ្មោះ​ និងឈានដល់ការផ្ដឹងផ្ដល់គ្នាពុំទាន់ដាច់ស្រេចនូវឡើយទេ។ ប៉ុន្តែទោះបីជាយ៉ាងណាក៏ដោយ ផលិតកម្មទាំងនោះក៏បានសម្រេចដោះដូរ​ ដោយការផ្ទេរឈ្មោះនាយកប្រតិបិត្តជំនួស ព្រមទាំងព្យាយាមលក់ភាគហ៊ុនខ្លះៗ ដើម្បីស្វែងរកប្រាក់ចំណេញផងដែរ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖រំលងត្រឹម២ថ្ងៃ មេ Big Hit និង Suga មានរឿងអាស្រូវព្រមគ្នា ហាក់បង្កើនកម្ដៅរិះគន់ពីទស្សនិកជន