បាត់ពីសិល្បៈជិត១០ឆ្នាំ កូនប្រុស ឈិនឡុង ចេញ MV ថ្មី រៀបរាប់ពីដំណើរជីវិតខ្លួនពាក់ព័ន្ធគ្រឿងញៀន

Jaycee Chan ដែលត្រូវជាកូនប្រុសរបស់តារាហូលីវូដ Jackie Chan ឬឈិនឡុង បានត្រលប់មកវិញជាសាធារណៈជាមួយនឹងវីដេអូចម្រៀងថ្មីមួយ បន្ទាប់ពីការសម្រាកអស់មួយទសវត្សរ៍ ក្រោយការចាប់ខ្លួនគាត់ពីបទចោទប្រកាន់ទាក់ទងនឹងគ្រឿងញៀន។

កាលពីថ្ងៃពុធ Jaycee បានចេញវីដេអូចម្រៀងក្រោមចំណងជើងដោយ”In Search for Darkness” ដែលជាបទចម្រៀងដែលគាត់បាននិពន្ធ សរសេរ និងដឹកនាំដោយខ្លួនឯងផ្ទាល់។

MV នេះផងដែរ បានបង្ហាញពីដំណើរឆ្លងកាត់ការខកចិត្ត ការសោកស្ដាយ និងការវង្វេងស្មារតី ដែលទីបំផុតនាំទៅដល់ការទទួលយក និងយកឈ្នះលើរយៈពេលដ៏ខ្មៅងងឹតមួយ។ វារាប់បញ្ចូលទាំងជីវិតពិតរបស់ Jaycee ដូចជារូបភាពឪពុកម្តាយរបស់គាត់ Jackie និងអតីតតារាសម្តែង Lin Feng Jiao រូបថតកុមារភាព និងវីដេអូពីការសុំទោសជាសាធារណៈឆ្នាំ ២០១៥ របស់គាត់ចំពោះការប្រើប្រាស់គ្រឿងញៀន។

វីដេអូនេះក៏បង្ហាញពីទិដ្ឋភាពដែលកូនប្រុសរបស់តារាសម្ដែងឈិនឡុង សម្លឹងមើលកដៃរបស់គាត់ ដោយបង្ហាញពីកាលបរិច្ឆេទ ១៤/០៨/២០១៤ ដែលជាថ្ងៃដែលគាត់ត្រូវបានចាប់ខ្លួនពីបទប្រើប្រាស់គ្រឿងញៀន។

យ៉ាងណាក៏ដោយ រឿងរ៉ាវរបស់តារាប្រុស Jaycee ត្រូវបានកាត់ទោសឲ្យជាប់ពន្ធនាគាររយៈពេលប្រាំមួយខែ និងពិន័យជាប្រាក់ចំនួន ២,០០០ យ័ន (ជិត ២៨០ ដុល្លារ) ក្នុងខែមករា ឆ្នាំ ២០១៥។ គាត់ត្រូវបានឃុំខ្លួនដំបូងនៅក្នុងខែសីហា ២០១៤ និងបានអនុវត្តការកាត់ទោសពេញលេញរបស់គាត់។

នាពេលនោះ Jaycee បានសារភាពថា ខ្លួនជាអ្នកផ្តល់ជម្រកដល់អ្នកដទៃដើម្បីប្រើប្រាស់គ្រឿងញៀន ដែលជាការចោទប្រកាន់ដែលអាចនាំឲ្យជាប់ពន្ធនាគាររហូតដល់ ៣ ឆ្នាំ។ ក្រោមក គាត់បានទទួលការកាត់ទោសស្រាលពីតុលាការប្រជាជនស្រុក Dongcheng ដោយសារតែកិច្ចសហប្រតិបត្តិការរបស់គាត់ជាមួយប៉ូលិស រួមទាំងការផ្តល់ព័ត៌មានអំពីការប្រើប្រាស់គ្រឿងញៀនរបស់គាត់ផងដែរ។ យោងតាមសារព័ត៌មាន South China Morning Post បានឲ្យដឹងថា កញ្ឆាជាង ១០០ ក្រាមត្រូវបានរកឃើញនៅផ្ទះរបស់គាត់។

យ៉ាងណាមិញ ដ្បិតថាតារាប្រុសវ័យ៤១ឆ្នាំរូបនេះ បានបន្តអាជីពជាតារាសម្តែង តារាចម្រៀង និងអ្នកនិពន្ធបទចម្រៀងអស់រយៈពេលជាងមួយទសវត្សរ៍ក៏ដោយ ប៉ុន្តែគាត់មិនបានទទួលជោគជ័យគួរឲ្យកត់សម្គាល់នោះទេ ។ ជាពិសេសនៅពេលផ្ទុះរឿងរ៉ាវពាក់ព័ន្ធនឹងគ្រឿងញៀនថែមទៀត កេរ្តិ៍ឈ្មោះរបស់ Jaycee កាន់តែស្រុតចុះជាលំដាប់ ទោះបីជារូបលោកមានឪពុកជាតារាល្បីលើពិភពលោកក្ដី៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖មិត្តជិតស្និទ្ធទម្លាយ​ថា ​ទិនហ្វី ផ្តល់​អាទិភាព​លើ​លុយជាង​ភាព​ស្មោះត្រង់ និងបង្កជម្លោះជាមួយគេច្រើន