ជីវិតកម្សាន្ដ

Katy Perry បំពានច្បាប់លុកលុយឆ្នេរ Ibiza ពេលនេះអាជ្ញាធរកំពុងស៊ើបអង្កេត

បានផុស

៦ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

ការបង្ហាញខ្លួននៅលើឆ្នេរខ្សាច់អេស្ប៉ាញក្នុងវីដេអូចម្រៀងថ្មីក្រោមចំណងជើងថា “Lifetimes” បានធ្វើឲ្យតារាប៉ុបអាមេរិក Katy Perry រងភាពក្តៅក្រហាយ បន្ទាប់ពីអាជ្ញាធរបានបើកការស៊ើបអង្កេតលើករណីឆ្នេរ Ibiza ដែលគ្មានការអនុញ្ញាត។ នេះបើយោងតាមការចុះផ្សាយពី thestar កាលពីថ្ងៃ១៦ ខែសីហា។

នាយកដ្ឋានកសិកម្ម នេសាទ និងបរិស្ថានធម្មជាតិនៃកោះ Balearic បាននិយាយកាលពីថ្ងៃអង្គារថា ក្រុមហ៊ុនផលិតដែលទទួលខុសត្រូវក្នុងការថតវីដេអូនៅ Ibiza ដែលល្បីល្បាញដោយសារឆ្នេរសមុទ្រ និងជីវិតពេលរាត្រីនោះ មិនបានស្នើសុំការអនុញ្ញាតទេ។ នោះហើយជាមូលហេតុដែលសកម្មភាពស៊ើបអង្កេតបឋមត្រូវបានផ្តួចផ្តើម ។

ទោះបីជាផ្នែកខ្លះនៃវីដេអូនេះត្រូវបានថតនៅក្នុងឧទ្យានធម្មជាតិ Ses Salines ដែលភ្នំ ឆ្នេរ និងផ្ទះអំបិលគឺជាជម្រកសម្រាប់សត្វស្លាប និងសត្វព្រៃដទៃទៀតក៏ដោយ នាយកដ្ឋានបាននិយាយថា មិនមានឧក្រិដ្ឋកម្មប្រឆាំងនឹងបរិស្ថានត្រូវបានសង្ស័យទេ ប៉ុន្តែជាការរំលោភបំពានផ្នែករដ្ឋបាលទៅវិញ។

មែនទែនទៅ Ses Salines គឺជាតំបន់អភិរក្សធម្មជាតិបេតិកភណ្ឌពិភពលោករបស់អង្គការយូណេស្កូ ដែលលាតសន្ធឹងរវាងកោះ Ibiza និង Formentera ។ វីដេអូដែលបានចេញផ្សាយកាលពីសប្តាហ៍មុន បង្ហាញពី Perry ធ្វើដំណើរដំបូងតាមយន្តហោះ ហើយបន្ទាប់មកតាមទូកទៅ Ibiza ពាក់អាវយឺតពណ៌ផ្កាឈូកដែលមានអក្សរ Eurotrash ពាក់លើវា បន្ទាប់មកជប់លៀងនៅលើឆ្នេរខ្សាច់ និងក្នុងក្លឹបរាត្រីក្នុងឈុតប៊ីគីនីជាច្រើនប្រភេទ។

យ៉ាងណាមិញ មកទល់ពេលនេះក្រុមហ៊ុនដែលដឹកនាំផលិតចម្រៀង We Own The City មិនបានឆ្លើយតបភ្លាមៗចំពោះសំណើសុំការអត្ថាធិប្បាយជុំវិញនឹងរឿងរ៉ាវរបស់ Katy Perry ឡើយ។ ផ្ទុយទៅវិញផលិតកម្មនេះបែរជាស្ងប់ស្ងៀម បន្ទាប់ពីតារាស្រីរូបនេះបានបំពានច្បាប់របស់ឆ្នេរដ៏ល្បីលើពិភពលោក៕