ជីវិតកម្សាន្ដ

កញ្ញា ស្លឹកឈើ ទទួលស្គាល់កំហុស ក្រោយមន្ទីរវប្បធម៌ និងវិចិត្រសិល្បៈខេត្តសៀមរាប កោះហៅបំភ្លឺ

បានផុស

១ ខែ មុន

នៅ

ថ្ងៃពុធ ២១ សីហា ២០២៤

ដោយ

ទីបំផុតលោក ហត កើ ហៅ កញ្ញា ស្លឹកឈើ បានចូលបំភ្លឺ និងទទួលស្គាល់កំហុសឆ្គងរបស់ខ្លួនបន្ទាប់ពីត្រូវបានខាង មន្ទីរវប្បធម៌ និងវិចិត្រសិល្ប ខេត្តសៀមរាប កោះហៅបំភ្លឺជុំវិញករណីបង្ហោះផ្សព្វផ្សាយជាសាធារណៈនូវវីដេអូខ្លីៗដែលមានរូបភាពប្រាសចាកពីក្រមសីលធម៌បង្កឱ្យប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទម្លាប់ ប្រពៃណី ជាតិ ពិសេសតម្លៃកុមារកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហត កើ ដែលប្រើប្រាស់គណនីបណ្ដាញសង្គមហ្វេសប៊ុកមានឈ្មោះ កញ្ញា ស្លឹកឈើ Fashion និង សាលា Kanha Slerkcher Catwalk Class ត្រូវបានមន្ទីរវប្បធម៌ និងវិចិត្រសិល្បខេត្តសៀមរាបកោះហៅឱ្យចូលខ្លួនមកបំភ្លឺការពីរសៀលថ្ងៃទី២០ ខែសីហា ឆ្នាំ២០២៤ ម្សិលមិញ។

បន្ទាប់ពីទទួលបានការអប់រំ និងណែនាំរបស់មន្ទីរវប្បធម៌ កញ្ញា ស្លឹកឈើ បានសុំទោសជាសាធារណៈ និងសន្យាបញ្ឈប់សកម្មភាពដែលនាំឲ្យប៉ះពាល់ដល់តម្លៃសង្គម និងកុមារ។

កញ្ញា ស្លឹកឈើ បានបញ្ជាក់ឲ្យដឹងថា “ក្រុមការងារក៏ដូចប្អូនៗដែលជាតារាបង្ហាញម៉ូត រួមទាំងអាណាព្យាបាលបានជួប និងបានទទួលការអប់រំ ណែនាំ តម្រង់ទិសពីថ្នាក់ដឹកនាំរបស់មន្ទីរវប្បធម៌ និងវិចិត្រសិល្បខេត្តសៀមរាប និងតំណាងមន្ទីពាក់ព័ន្ធ”។ កញ្ញា ស្លឹកឈើ បានបន្តថា លោកពិតជាអរគុណដល់ខាងមន្ទីរដែលបានអប់រំ និងណែនាំតម្រង់ផ្លូវសម្រាប់ការផលិតវីដេអូក្រោយៗទៀតដើម្បីកុំឲ្យមានកំហុសឆ្លងដែលនាំឱ្យប៉ះពាល់ដល់សង្គមជាតិ។

កញ្ញា ស្លឹកឈើ បានបន្ថែមថា ក្រុមខ្លួន និងធ្វើតាមការណែនាំរបស់មន្ទីរវប្បធម៌ និងវិចិត្រសិល្បខេត្តសៀមរាប ដើម្បីកុំឱ្យមានកំហុសឆ្លងបន្តទៀត នៅពេលដែលផលិតវីដេអូក្រោយៗទៀត។

គួររម្លឹកថាកាលពីថ្ងៃទី១៩ ខែសីហា ឆ្នាំ២០២៤ ខាងមន្ទីរវប្បធម៌ និងវិចិត្រសិល្បខេត្តសៀមរាបបានចេញលិខិតអញ្ជើញលោក ហត កើ ឬ កញ្ញា ស្លឹកឈើ Fashion ចូលរួមប្រជុំ និងបកស្រាយករណីបង្ហោះផ្សព្វផ្សាយជាសាធារណៈនូវវីដេអូខ្លីៗប្រាសចាកពីក្រមសីលធម៌ និងប៉ះពាល់តម្លៃកុមារ។

កញ្ញា ស្លឹកឈើ ត្រូវបានមហាជន និងអ្នកគាំទ្រស្គាល់ថា ជាអ្នកច្នៃម៉ូតសំលៀកបំពាក់ពីស្លឹកផ្ការុក្ខជាតិ និងគ្រូដើរបង្ហាញម៉ូតនៅខេត្តសៀមរាប។ លោកធ្លាប់បង្ហាត់បង្ហាញដល់សិស្សជាច្រើនដែលចង់ចេះដើរម៉ូត និងអ្នកចង់ចូលប្រកួតបវរកញ្ញាសម្រាប់យុវតីពេញវ័យ និងកុមារីជាដើម៕

អត្ថបទ៖ ចាន់រ៉ា

Related Topics:តារាខ្មែរ