ព័ត៌មានអន្ដរជាតិ

Beyoncé ព្រមានលោក Trump ឲ្យឈប់ប្រើបទចម្រៀងរបស់នាងដោយគ្មានការអនុញ្ញាត

បានផុស

៦ ខែ មុន

នៅ

ថ្ងៃអាទិត្យ ២៥ សីហា ២០២៤

ដោយ

យោងតាម Rolling Stone ប្រភពខាងក្នុងបានប្រាប់អ្នកសារព័ត៌មានថា យុទ្ធនាការ Trump មិនទទួលបានការអនុញ្ញាតឲ្យប្រើបទចម្រៀង Beyoncé ក្រោមចំណងជើងថា Freedom ចេញពីអាល់ប៊ុម Lemonade របស់នាងនៅក្នុងវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គម។

បទនេះត្រូវបានប្រើក្នុងវីដេអូរយៈពេល ១៣ វិនាទីដែលអតីតប្រធានាធិបតី Donald Trump ចេញពីយន្តហោះក្នុងរដ្ឋ Michigan។ វីដេអូនេះត្រូវបានបង្ហោះដោយអ្នកនាំពាក្យយុទ្ធនាការលោក Steven Cheung ទៅកាន់ Twitter កាលពីថ្ងៃទី ២០ ខែសីហាមកម៉្លេះ។ យ៉ាងណាមកដល់ពេលនេះ បទរបស់តារាចម្រៀង Beyoncé ត្រូវបានលុបចេញភ្លាមៗហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះក៏មិនមែនជាលើកទីមួយទេ ដែលលោក Trump ត្រូវបានរងការចោទប្រកាន់ពីបទប្រើប្រាស់តន្ត្រីរបស់សិល្បករដោយគ្មានការអនុញ្ញាតពីពួកគេ។ កាលពីដើមខែសីហា អតីតប្រធានាធិបតីរូបនេះបានលេងបទ ‘My Heart Will Go On’ របស់ Celine Dion ក្នុងអំឡុងពេលយុទ្ធនាការឃោសនាបោះឆ្នោតប្រធានាធិបតីនៅ Montana ខណៈពេលដែលគាត់ក៏បានប្រើវីដេអូរបស់តារាចម្រៀងដែលកំពុងសំដែងរបាំទៅកាន់ហ្វូងមនុស្សផងដែរ។

ទោះជាយ៉ាងណាក៏ដោយ បទចម្រៀងដ៏ពេញនិយមនេះត្រូវបានចាក់ដោយគ្មានការអនុញ្ញាតពី Dion ហើយក្រុមរបស់នាងបាននិយាយប្រឆាំងនឹងការប្រើប្រាស់របស់វា ដោយជំរុញឲ្យអតីតប្រធានាធិបតីកុំប្រើតន្ត្រីណាមួយរបស់នាងឆ្ពោះទៅមុខ។

ដោយឡែក ងាកមកកាន់យុទ្ធនាការ Kamala Harris ឯណោះវិញហាក់ទទួលបានសិទ្ធជាង ដោយពេលនេះបាននិងកំពុងប្រើប្រាស់បទចម្រៀងរបស់ Beyoncé យ៉ាងខ្លាំងនៅទូទាំងយុទ្ធនាការមួយចំនួន និងមានការអនុញ្ញាតពីសិល្បកររូបនេះយ៉ាងគគ្រឹកគគ្រេងថែមទៀត។ បទចម្រៀងនេះបានលេង ក្នុងពេលដែលលោកស្រី Harris ដើរចេញទៅកាន់វេទិកាមួយក្នុងអំឡុងពេលបង្ហាញខ្លួនជាសាធារណៈលើកដំបូង បន្ទាប់ពីទទួលការយល់ព្រមពីលោក Joe Biden ៕