ជីវិតកម្សាន្ដ

ពេជ្រ ចរណៃ បង្ហាញឆន្ទៈ ដាច់ខាតមិនទទួលផ្សព្វផ្សាយល្បែងស៊ីសង និងគ្រឿងស្រវឹង

បានផុស

៦ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

តារាសម្តែង និងជាគ្រូគុនល្បុក្កតោរូបស្រស់ កញ្ញា ពេជ្រ ចរណៃ បានប្រាប់កម្ពុជាថ្មីឲ្យដឹងថា ដាច់ខាតនាងមិនទទួលយកការផ្សព្វផ្សាយពាណិជ្ជកម្មល្បែងស៊ីសង និងគ្រឿងស្រវឹងនោះទេ ទោះបីក្នុងតម្លៃថ្លៃយ៉ាងណាក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា ពេជ្រ ចរណៃ បានបញ្ជាក់ថា នាងបានតាំងចិត្តតាំងពីដំបូងរួចហើយថា ទោះបីជាល្បីមានកេរ្តិ៍ឈ្មោះនៅក្នុងវិស័យសិល្បៈ ដាច់ខាតមិនទទួលការផ្សព្វផ្សាយល្បែងស៊ីសង និងគ្រឿងស្រវឹងទេ ខណៈកន្លងមកមានគេទាក់ទង ដើម្បីចូលរួមផ្សព្វផ្សាយល្បែង និងគ្រឿងស្រវឹងផងដែរ។

តារាសម្តែងកញ្ញា ពេជ្រ ចរណៃ បានសង្កត់ធ្ងន់ថា «ខ្ញុំមានឆន្ទៈផ្ទាល់ខ្លួនពាក់ព័ន្ធនឹងការមិនទទួលផ្សព្វផ្សាយពាណិជ្ជកម្មគ្រឿងស្រវឹង និងល្បែងស៊ីសងឡើយ ព្រោះវាជារឿងមិនល្អសម្រាប់សង្គមទេ ហើយអ្វីដែលខ្ញុំចង់ធ្វើនៅពេលនេះគឺការចូលរួមលើកស្ទួយវប្បធម៌ អរិយធម៌ គុនល្បុក្កតោ និងសិល្បៈយើងឲ្យកាន់តែល្បីរន្ទឺទៅកាន់ពិភពលោក»។

ជាការពិតគេកត់សម្គាល់ថា កន្លងមកនៅលើបណ្ដាញសង្គមហ្វេសប៊ុករបស់តារាសម្តែង ពេជ្រ ចរណៃ គឺមិនដែលបង្ហោះពាក់ព័ន្ធនឹងការលេងល្បែងស៊ីសង ឬ ពិសាគ្រឿងស្រវឹងឡើយ ផ្ទុយមកវិញនាងតែងតែបញ្ចេញសារដាស់តឿន និងបំផុសឲ្យចៀសឆ្ងាយពីការលេង និងពិសាគ្រឿងស្រវឹងជាដើម។

សូមបញ្ជាក់ថា កាលពីកន្លងមក ធ្លាប់មានតារាសម្តែងជើងចាស់ល្បីឈ្មោះ គឺ លោក សាវិន ហ្វីលីព និងអ្នកនាង ខាត់ សុឃីម ក៏ប្រកាសឆន្ទៈដាច់ខាតមិនទទួលផ្សព្វផ្សាយល្បែង និងគ្រឿងស្រវឹងឡើយ។ ទង្វើនេះ កំពុងទទួលបានការគាំទ្រ និងសរសើរពីសំណាក់មហាជនដែលជាគំរូដ៏ល្អសម្រាប់សង្គម៕

អត្ថបទ ៖ ចាន់រ៉ា