ជីវិតកម្សាន្ដ

លៀក លីដា ស្នើរួមគ្នាការពារវិស័យភាពយន្តជាតិ កុំឲ្យធ្លាក់ក្នុងទស្សនៈ ត្រីស្អុយមួយ ស្អុយមួយកន្ត្រក

បានផុស

៧ ខែ មុន

នៅ

ថ្ងៃសុក្រ ៣០ សីហា ២០២៤

ដោយ

ផលិតករភាពយន្តខ្មែរ និងជាអ្នកដឹកនាំសម្តែងរឿង “ប្រវត្តិស្នេហ៍នាងនាថ” លោក លៀក លីដា បានចេញមុខអំពាវនាវដោយស្នើសុំដល់មហាជន និងអ្នកគាំទ្រ ចូលរួមការពារវិស័យភាពយន្តជាតិកុំឲ្យធ្លាក់ចូលក្នុងទស្សនៈត្រីស្អុយមួយ គឺស្អុយមួយកន្ត្រក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក លៀក លីដា នេះធ្វើឡើងបន្ទាប់ពីសង្កេតឃើញមានទស្សនៈរបស់ទស្សនិកជនមួយចំនួនបានធ្វើការរិះគន់ដល់វិស័យភាពយន្តរបស់ជាតិថា គ្មានគុណភាព ឬមិនល្អមើលដូចភាពយន្តរបស់បរទេស។ ត្រង់ចំណុចនេះត្រូវបានលោក លៀក លីដា បានសង្កត់ធ្ងន់ថា ជាការមិនឲ្យតម្លៃលើស្នាដៃផលិតករក្នុងស្រុក។

ផលិតករភាពយន្តល្បីឈ្មោះលោក លៀក លីដា បានបញ្ជាក់ភ្ជាប់ និងខ្លឹមសារដូច្នេះថា “សូមចូលរួមការពារវិស័យភាពយន្តជាតិរបស់យើង កុំឲ្យធ្លាក់ចូលនៅក្នុងទស្សនៈត្រីស្អុយមួយ គឺស្អុយមួយកន្ត្រក។ ព្រោះទស្សនៈនេះ អាចធ្វើឲ្យវិស័យមួយដែលកំពុងតែត្រូវការការគាំពារអាចស្លាប់ទៅវិញបាន“។

លោក លៀក លីដា បាននិយាយទៀតថា ដើម្បីការពារវិស័យភាពយន្តជាតិយើងទាំងមូលគឺ សូមបងប្អូនប្រើពាក្យពេចន៍ឲ្យចំគោលដៅក្រោយពេលបងប្អូនទស្សនាភាពយន្តជាតិរបស់យើងគួរតែប្រើពាក្យថារឿងរបស់ផលិតកម្មមួយនេះអត់ល្អមើល ឬរឿងរបស់ផលិតកម្មមួយនោះល្អមើល។ លោកបន្តថា សូមបងប្អូនពេលបានទស្សនា និងចេញពីរោងកុនមកវិញនិយាយពាក្យរិះគន់ ឬបង្អាប់ថារឿងខ្មែរឥឡូវអត់ល្អមើល ឬមើលមិនកើតទេ។

លៀក លីដា បន្ថែមទៀតថា បើសិនមានការរិះគន់បែបនេះគឺ ធ្វើឲ្យប៉ះពាល់ដល់អារម្មណ៍របស់ផលិតករដទៃទៀតដែលពួកគាត់បានខិតខំផលិត ជាពិសេសទៀតគឺ ធ្វើឲ្យប៉ះពាល់ដល់វិស័យភាពយន្តជាតិយើងទាំងមូលតែម្តង៕

អត្ថបទ៖ ចាន់រ៉ា