ផ្តើមពីកូនកសិករខ្វះខាត មានតែការតស៊ូជាទុន ខេមរ: សិរីមន្ត មានមោទនភាពនឹងជោគជ័យខ្លួនបច្ចុប្បន្ន

ផ្តើមពីកូនកសិករខ្វះខាត មានតែការតស៊ូជាទុន ខេមរ: សិរីមន្ត មានមោទនភាពនឹងជោគជ័យខ្លួនបច្ចុប្បន្នកំពូលតារាចម្រៀងងារជាឧកញ៉ា លោក ខេមរ: សិរីមន្ត បានបង្ហាញពីអារម្មណ៍មោទនភាពចំពោះខ្លួន ដែលខំប្រឹងតស៊ូចេញពីកូនកសិករខ្វះខាត មិនមានអ្វីគ្រប់គ្រាន់ រហូតក្លាយជាឧកញ៉ាមានលុយចាយពេញដៃ។

តាមរយៈសំណេរពីគណនីហ្វេសប៊ុកផ្ទាល់ខ្លួន ភ្ជាប់ជាមួយនឹងរូបថតចាស់របស់លោក ១សន្លឹក ឧកញ៉ារូបនេះ បានរម្លឹកអតីតកាលតស៊ូរបស់ខ្លួនដោយរៀបរាប់ថា “ឃើញរូបនេះហើយស្រណោះខ្លួនផង មោទនភាពចំពោះខ្លួនឯងផង” ដោយបញ្ជាក់ទៀតថា ផ្តើមចេញពីកូនកសិករខ្វះខាត អាហារហូបចុកមិនគ្រប់គ្រាន់ មានតែសមត្ថភាពពីកំណើត ការតស៊ូ សុជីវធម៌ គុណធម៌ជាដើម ដែលសុទ្ធសឹងជាទុនមកដល់ពេលនេះ។ ទោះបីជោគជ័យ និងមានជីវិតល្អប្រសើរយ៉ាងណាក៏ដោយ ឧកញ៉ារូបនេះ បញ្ជាក់ដែរថា ខ្លួនក៏នៅតែខំប្រឹង ព្រោះជីវិតគឺជាការតស៊ូ។

ទន្ទឹមគ្នាដែលអាជីពសិល្ប: និងមុខជំនួញកាន់តែជោគជ័យ ហើយរីកដុះដាលខ្លាំងដែរនោះ កាលពីថ្មីៗកន្លងទៅឧកញ៉ា ខេមរ: សិរីមន្ត ក៏ធ្លាប់ប្រកាសទម្លាយតម្លៃខ្លួនក្នុងការឡើងឆាកតន្ត្រីច្រៀងត្រឹមតែ ៦បទប៉ុណ្ណោះ បានលុយរហូតខ្ទង់ម៉ឺនដុល្លារ។

គួររម្លឹកថា បន្ទាប់ពីកសាងកេរ្តិ៍ឈ្មោះបោះសំឡេងលើការងារសិល្បៈ តារាចម្រៀងរូបនេះ បានងាកមកចាប់ជំនួញលើវិស័យអចលនទ្រព្យ ដោយសាងសង់ជាផ្ទះ និងដីឡូតិ៍ នៅតំបន់មួយចំនួន ប្រកបដោយជោគជ័យលើជំនួញនេះ។ ផ្សារភ្ជាប់នឹងភាពជោគជ័យព្រមៗគ្នានេះ លោកក៏បានចូលរួមក្នុងកិច្ចការរួមចំណែកនឹងសង្គម តាមរយៈការជួយជាថវិកាកសាងសមិទ្ធផលនានា និងការងារមនុស្សធម៌ជាច្រើនទៀត។ តាមរយៈសកម្មភាពជួយដល់សង្គមជាតិខាងលើនេះ រូបលោកក៏ត្រូវបាន ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប្រោសព្រះរាជទានគោរមងារជា “ឧកញ៉ា” កាលពីថ្ងៃទី១៧ ខែកុម្ភៈ ឆ្នាំ២០២២ កន្លងទៅ៕

អត្ថបទ៖ ចាន់រ៉ា