ជីវិតកម្សាន្ដ

សិល្បករ-សិល្បការិនី ជាង ៥០ នាក់ ធ្វើទស្សនកិច្ចនៅបណ្ដាខេត្ត ៤ ជាប់ព្រំប្រទល់ កម្ពុជា-វៀតណាម-ឡាវ

បានផុស

៣ សប្តាហ៍ មុន

នៅ

ថ្ងៃពុធ ៤ កញ្ញា ២០២៤

ដោយ

ក្រុមការងាររបស់សមាគមសិល្បករខ្មែរបានដឹកនាំសិល្បករ-សិល្បការនី ជាង ៥០រូប ដើម្បីធ្វើទស្សនកិច្ចនៅតាមបណ្ដាខេត្តចំនួន ៤ ជាប់ ព្រំប្រទល់កម្ពុជា-វៀតណាម-ឡាវ រួមមាន,ខេត្តក្រចេះ,ស្ទឹងត្រែង, រតនគិរី និងមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈដំណើរទស្សនៈកិច្ចនេះ គឺដើម្បីស្វែងយល់ពីស្ថានភាពពិតនៃជីវភាពរស់នៅរបស់ប្រជាពលរដ្ឋ និងការវិវត្តនានារបស់រាជរដ្ឋាភិបាល ក៏ដូចជាស្វែងយល់ពីវប្បធម៌រស់នៅរបស់ប្រជាជនព្រមទាំងសក្ដានុពលទេសចរណ៍នៃបណ្ដាខេត្តទាំង ៤នោះផងដែរ។

ដំណើរទស្សនៈកិច្ចនេះដឹកនាំដោយលោក ទិត ថាវរិទ្ធ រដ្ឋលេខាធិការ ក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលសមាគមសិល្បករខ្មែរ និងលោកស្រី ឡុង ភារម្យ រដ្ឋលេខាធិការក្រសួងទេសចរណ៍ និងជាសមាជិកក្រុមប្រឹក្សាភិបាលសមាគមសិល្បករខ្មែរកាលពីថ្ងៃទី២ ខែកញ្ញា ឆ្នាំ២០២៤។

ក្រុមការងារ និងសិល្បករ-សិល្បការនី ចំនួនជាង ៥០ រូប បានបន្តដំណើរទៅដល់ខេត្តស្ទឹងត្រែងដោយបានធ្វើទស្សនកិច្ចនៅតាមបង្គោលព្រំដែន រវាងកម្ពុជា-ឡាវ និងតំបន់អភិវឌ្ឍផ្សេងៗជាច្រើនជាពិសេសទំនប់វារីអគ្គិសនីសេសានក្រោម២។ សិល្បករ-សិល្បការិនី ដែលបានចូលរួមក្នុងដំណើរទស្សនកិច្ចបានបង្ហាញអារម្មណ៍រីករាយដែលបានចុះទៅដល់បន្ទាត់ព្រំដែនដោយផ្ទាល់ស្វែងយល់នូវការពិតជាក់ស្ដែង។

លោក ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងប្រធានក្រុមប្រឹក្សាភិបាលសមាគមសិល្បករខ្មែរ យល់ឃើញថា ការដឹកនាំប្រកបដោយចក្ខុវិស័យរបស់រាជរដ្ឋាភិបាលកម្ពុជាធ្វើឱ្យប្រជាពលរដ្ឋមានការជឿជាក់។ ជាពិសេសប្រជាពលរដ្ឋរស់នៅតាមបណ្ដាខេត្តជាប់ព្រំដែនប្រទេសជិតខាង។តាមព្រំប្រទល់ជាមួយប្រទេសជិតខាងសុទ្ធសឹងតែមានការអភិវឌ្ឍន៍ មានហេដ្ឋារចនាសម្ព័ន្ធ និងមានគម្រោងវិនិយោគធំៗជាដើម។

បើតាមប្រធានក្រុមប្រឹក្សាភិបាលសមាគម ក្រៅពីការគ្រប់គ្រង និងការពារព្រំដែនជាតិយ៉ាងរឹងមាំរក្សាសន្តិសុខសណ្តាប់ធ្នាប់ហើយ នោះលោកមើលឃើញថា រាជរដ្ឋាភិបាលបានខិតខំកសាងព្រំដែន សន្តិភាព មិត្តភាព កិច្ចសហប្រតិបត្តិការដើម្បីលើកកម្ពស់សេដ្ឋកិច្ចជាតិផងដែរ៕

អត្ថបទ៖ ចាន់រ៉ា