Jang Geun Suk ប្រាប់សុខភាពផ្ទាល់ខ្លួន ក្រោយវះកាត់មហារីកក្រពេញទីរ៉ូអ៊ីតរួចរាល់

កាលពីថ្ងៃទី ០៥ ខែកញ្ញា តារាសម្តែងកូរ៉េ Jang Geun Suk បានស្វាគមន៍អ្នកគាំទ្រជាមួយនឹងការផ្សាយបន្តផ្ទាល់ក្នុងបន្ទប់គេង។ ក្នុងកំឡុងពេលនៃការផ្សាយផ្ទាល់ តួ​ប្រុសរូបនេះ បានចំណាយពេលឆ្លើយសំណួររបស់អ្នកគាំទ្រ លេងឆ្មា ​និងចែករំលែកព័ត៌មានថ្មីៗអំពីអ្វីដែលខ្លួនទទួលបាននាពេលថ្មីៗនេះ ចាប់តាំងពីការធ្វើរោគវិនិច្ឆ័យ និងការវះកាត់មហារីកក្រពេញទីរ៉ូអ៊ីត។

តាមរយៈការចុះផ្សាយពីសារព័ត៌មានកូរ៉េ​​ Allkpop ដោយដកស្រង់សម្ដីតារាសម្តែងរូបនេះបានបង្ហើបថា «​ថ្មីៗនេះខ្ញុំបានទៅកម្សាន្តនៅ Aomori ជាមួយ Ha Suk Jin hyung និងអ្នករចនាផ្ទៃខាងក្នុង Lim Sung Bin ។ វាមិនបានគ្រោងទុកទាំងស្រុងនោះទេ ប៉ុន្តែវាជាដំណើរកម្សាន្តដ៏រីករាយបំផុត ដែលខ្ញុំធ្លាប់ធ្វើនៅក្នុងជីវិតរបស់ខ្ញុំ។ ខ្ញុំ​មិន​មែន​ជា​ប្រភេទ​ដែល​រីករាយ​នឹង​វិស្សមកាល​នៅ​បរទេស​នោះ​ទេ ប៉ុន្តែ​ក្រោយ​ពី​វះកាត់ ខ្ញុំ​រក​ឃើញ​ថា​ហេតុ​អ្វី​បាន​ជា​មនុស្ស​ចូល​ចិត្ត​ដើរ​កម្សាន្ត​ខ្លាំង​ណាស់​ក្នុង​ឆ្នាំ​នេះ ខ្ញុំ​ចង់​ធ្វើ​ដំណើរ​ដោយ​ខ្លួន​ឯង»។

នាពេលនោះ នៅពេលដែល លោកសម្រេចចិត្តថាគាត់គួរតែគិតពីកន្លែងដែលគាត់ចង់ទៅទស្សនាកន្លែងណាមួយ អ្នកគាំទ្របានណែនាំកន្លែងដូចជាអូស្ត្រាលី និងក្រិកជាដើម។

ក្រោយមក តារាសម្ដែងរូបនេះបានបញ្ចេញមតិយ៉ាងចំហថា «គ្រប់គ្នា យើងសុទ្ធតែមានការតស៊ូ និងការលំបាកក្នុងជីវិត ប៉ុន្តែការពិត វាមិនមានពេលគ្រប់គ្រាន់ក្នុងជីវិតរបស់យើងដើម្បីចំណាយវាច្រើននោះទេ គ្រាន់តែបារម្ភពីរឿងទាំងនោះ។ ត្រូវតែហ៊ាន ហើយតម្រង់ខ្លួនឯងជាមុនសិន។ រាល់ការសម្រេចចិត្តរបស់អ្នក នឹងប្រែជាមានបញ្ហា នោះអ្នកអាចដោះស្រាយបញ្ហានោះបាននៅពេលវាដល់ពេល។ បន្ទាប់ពីឆ្លងកាត់ជំងឺនោះ ពេលខ្ញុំក្រោកពីគេង ខ្ញុំដឹងថានៅសល់ពេលតិចទៀតមែនទេ? វាជារឿងហួសចិត្តមែនទេ? ពេលវេលាពិតជាមិនមានច្រើនទេ ដូច្នេះសម្រាប់ខ្ញុំ ជាជាងខ្វល់ខ្វាយ ខ្ញុំបានសម្រេចធ្វើរឿងដែលខ្លួនឯងមិន​ធ្លាប់ធ្វើកន្លងមក»។

ទោះបីជាយ៉ាងណាក៏ដោយ ចាប់តាំងពីថ្ងៃដែលតារាសម្ដែងប្រុស Jang Geun Suk បានប្រាប់អ្នកគាំទ្រថា ខ្លួនត្រូវគេធ្វើរោគវិនិច្ឆ័យថាមានជំងឺមហារីកក្រពេញទីរ៉ូអ៊ីត កាលពីខែតុលាឆ្នាំមុន អាជីពសម្ដែងរបស់លោកស្រាប់តែផ្អាកមួយរយៈធំ។ បន្ទាប់ពី ទទួលបានទទួលការវះកាត់ដោយជោគជ័យនៅក្នុងខែឧសភាឆ្នាំនេះ ទើបរូបលោកចាប់ផ្ដើមចំណាយពេលខ្លះដើម្បីឲ្យខ្លួនឯងឆាប់សះស្បើយដោយការធ្វើដំណើរកម្សាន្តទៅគ្រប់ទីកន្លែងដែលខ្លួនចង់ទៅ៕

អត្ថបទ៖ សាង ស្រីល័ក្ខ

ចុចអាន៖ដោយសារនឹកកូនស្រីខ្លាំង ស្ត្រី ថៃ បោះដៃអោបកូនតាមកាំមេរ៉ាសុវត្ថិភាព ខណៈអ្នកទស្សនាយំគ្រប់គ្នា