ជីវិតកម្សាន្ដ

មិនស្មានថា Aum ងប់ងុលនឹងតារាប្រុសចិនមួយរូប ទាល់ស្ដាប់សំឡេងគេទើបគេងលក់

បានផុស

២ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

Aum Patcharapa តារាស្រីថៃជួរមុខដ៏ពេញនិយម និងជាអ្នកជំនួញវាល់លាន នាពេលថ្មីៗនេះបានទម្លាយពីអារម្មណ៍ពិតឥតលាក់លាមថា ខ្លួនជាអ្នកគាំទ្រយ៉ាងងប់ងុលក្នុងរឿងភាគចិន «Are You the One » ហើយបុរសសង្ហាដែលជាតួប្រុស បានឆក់យកបេះដូងរបស់នាងយ៉ាងពេញទំហឹង។

អ្វីដែលកាន់តែចាប់អារម្មណ៍បំផុតក្នុងភ្នែកមាហាជននោះគឺថា ក្នុងជីវិតរបស់កំពូលតារាស្រថៃវ័យ៤៥ឆ្នាំ ក្រៅពីមានការងារតឹងតែង ថែរក្សាអាជីវកម្មផ្ទាល់ខ្លួនយ៉ាងរវល់បំផុតនោះ នាងក៏ជាអ្នកគាំទ្រដ៏ធំនៃស៊េរីរឿងភាគចិនដែរ។

តាមរយៈគណនីតីកតុកផ្ទាល់ខ្លួន Aum បានផ្សាយផ្ទាល់ជាមួយមិត្តភក្តិជិតស្និទ្ធដូចជា Ning Panita និង DJ Pop ជជែកគ្នាពីនេះពីនោះមិនចេះចប់។ មួយស្របក់ក្រោយមក នាងស្រាប់តែអួតបង្ហាញរឿងភាគចិនថ្មីមួយទៅកាន់មិត្តភក្តិនិងអ្នកទស្សនា ហើយនោះបានធ្វើឲ្យតារាស្រីរូបនេះ គេងមិនលក់លុះត្រាខ្លួនបានស្ដាប់នូវសំឡេងដ៏ស្រទន់របស់តួឯកប្រុសក្នុងរឿងសិន សឹមដេកលក់ស្កប់ស្កល់។ ជាពិសេសនោះ នាងបានទម្លាយទៀតថា បេះដូងរបស់តួប្រុសថ្មីបានឆក់យកស្នាមញញឹមនិងធ្លាក់មកលើនាងយ៉ាងខ្លាំង។

មិនត្រឹមប៉ុណ្ណឹងទេ នៅក្នុងអំឡុងពេលការផ្សាយបន្តផ្ទាល់ Aum Patcharapa ថែមទាំងឆ្លៀតទម្លាយចំណងជើងរឿងភាគបុរាណចិន ដែលធ្វើឲ្យរូបនាងក្លាយជាមនុស្សងប់ងុល លែងសឹងបានដេកពួនរាល់យប់ថា «Are You the One » ដែលតួឯកប្រុសវ័យក្មេងកំពុងល្បីក្នុងប្រទេសចិន Zhang Wan Yi អាចធ្វើឲ្យបេះដូង Aum កក្រើកមកបាន ហើយក៏ជាសំឡេងដែលរូបនាងតែងតែត្រូវស្ដាប់ជារៀងរាល់យប់ផងដែរ។

យ៉ាងណាមិញ បន្ទាប់ពីតារាស្រីលេខ១របស់ប៉ុស្តិ៍លេខ៧ថៃប្រកាសពីការពេញចិត្តពេញថ្លើម លើតារាប្រុស Zhang Wan Yi ពេញបេះដូងភ្លាមៗ ដោយមិនបង្អង់យូរឡើយ អ្នកតាមដានក្នុងគណនីតីកតុកប្រញាប់ប្រញាល់ចូលទៅឆែកមើល និងទស្សនាតាម Aum វិញដែរ។ ព្រមជាមួយគ្នានោះថែមទៀត ភាពយន្តចិនបុរាណមួយនេះក៏ទទួលបានការគាំទ្រយ៉ាងគគ្រឹកគគ្រេងពីហ្វេនៗ នៅក្នុងប្រទេសថៃផងដែរ៕