ខាន់ ជេមស៍ រំភើបខ្លាំងខណ:កូនប្រុសទាំង២ មានឱកាសឡើងច្រៀងរួមឆាកតែមួយ

តារាចម្រៀងល្បីឈ្មោះ លោក ខាន់ ជេមស៍ បានបង្ហាញអារម្មណ៍រំភើបចិត្ត និងមានទនភាពខ្លាំង បន្ទាប់ពីកូនប្រុសទាំងពីររបស់លោក មានឱកាសឡើងច្រៀងលើឆាកតន្រ្តីតែមួយជាមួយខ្លួន។

តាមរយៈសំណេរដោយភ្ជាប់នឹងវីដេអូខ្លីមិនដល់ ១នាទី លោក ខាន់ ជេមស៍ បានរៀបរាប់ថា “កាលពី ២០ឆ្នាំមុន ខ្ញុំឡើងច្រៀងម្នាក់ឯងតែ២០ឆ្នាំក្រោយមកមានកូនកំលោះទាំង ២នាក់ មកច្រៀងជាមួយដែរ ខ្ញុំពិតជាសប្បាយចិត្តណាស់ ដែលមានកូនៗស្ដាប់តាមដំបូន្មាននិងគន្លងធម៌របស់ឪពុកម្ដាយ”។

គេនៅចាំបានថា ចំពោះចំណងអាពាហ៍ពិពាហ៍ប្ដី-ប្រពន្ធរបស់ លោក ខាន់ ជេមស៍ និងភរិយា គឺទទួលបានចំណងដៃកូន៤នាក់ ក្នុងនោះស្រី ២នាក់ និងប្រុស ២នាក់ ដោយកូនស្រីច្បងរបស់តារាចម្រៀងប្រុសរូបនេះ កាន់តែធំច្រើនវ័យទន្ទឹមខ្លួនទៅហើយ និងថែមទាំងស្រស់ស្អាត ហើយមានដុងសិល្ប:កាត់ទៅតាមឪពុកទៀតផង។

ដោយមើលឃើញពីទេពកោសល្យរបស់កូនៗ តារាចម្រៀងប្រុសមានឈ្មោះបោះសំឡេងរូបនេះ បានបណ្តុះជំនាញសិល្បៈដល់កូនប្រុសស្រីរបស់លោក ខណៈ ២នាក់ បានក្លាយជាតារាចម្រៀងរបស់ផលិតកម្មរួចទៅហើយ។

គួររម្លឹកថា កាលពីអំឡុងឆ្នាំ២០២១ តារាចម្រៀងប្រុសរូបនេះ ធ្លាប់បានដឹកដៃកូនប្រុសម្នាក់ ឈ្មោះ ហ្គេត ចូលរួមរ៉េប ក្នុងបទចម្រៀង “Boy Loy” ដោយទទួលបានការគាំទ្រ និងភ្ញាក់ផ្អើលចំពោះសមត្ថភាពនៃការច្រៀងរ៉េបរបស់កូនប្រុសរូបនេះម្តងរួចទៅហើយ។ ក្រោយមក នៅឆ្នាំ២០២៣ លោកធ្វើឱ្យអ្នកគាំទ្រចាប់អារម្មណ៍ជាថ្មី នឹងវត្តមានកូនស្រីរបស់លោក «អេមី» ដែលបានចុះកុងត្រាក្នុងនាមជាតារាចម្រៀងរបស់ផលិតកម្ម GALAXY និងដឹកដៃកូនប្រុសទី ២ ដូរ៉ា សក្តា “Gate” ជ្រកក្រោមទ្រនំតែមួយ នៅឆ្នាំ២០២៤ ៕

អត្ថបទ៖ ចាន់រ៉ា