ជីវិតកម្សាន្ដ

វ័យ៨០ឆ្នាំមិនជាបញ្ហា លោកយាយកូរ៉េខាងត្បូងចូលរួមប្រកួតបវរកញ្ញាចក្រវាលយ៉ាងជឿជាក់

បានផុស

៤ ខែ មុន

នៅ

ថ្ងៃពុធ ១៨ កញ្ញា ២០២៤

ដោយ

ប្រព័ន្ធផ្សព្វផ្សាយបរទេសរាយការណ៍ថា ការប្រកួតបវរកញ្ញាចក្រវាលកូរ៉េខាងត្បូងឆ្នាំ២០២៤ បានបង្កឲ្យមានការភ្ញាក់ផ្អើលយ៉ាងខ្លាំង នៅពេលដែលស្ត្រីអាយុ ៨០ ឆ្នាំម្នាក់បានបង្កើតប្រវត្តិសាស្ត្រថ្មីមួយដោយសម្រេចចិត្តចូលរួមប្រកួតកម្មវិធីបង្ហាញសម្រស់ជាមួយនឹងសក់សខ្លី នេះធ្វើឲ្យគាត់លេចធ្លោខ្លាំងជាងបេក្ខនារីផ្សេងទៀត

លោកយាយ Choi Sun-hwa បានសម្រេចចិត្តចូលរួមក្នុងកម្មវិធីប្រកួតបវរកញ្ញាចក្រវាលរបស់កូរ៉េខាងត្បូងក្នុងឆ្នាំនេះ។ យ៉ាងណាការចូលរួមរបស់គាត់ បន្ទាប់ពីគណៈកម្មការប្រកួតបានកែប្រែច្បាប់ថ្មី មិនមានការកំណត់អាយុជាផ្លូវការសម្រាប់ការចូលប្រលងនោះទេ ហើយក៏អនុញ្ញាតឲ្យស្ត្រីដែលរៀបការហើយឬមានកូនចូលក្នុងការប្រកួតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកយាយវ័យ៨០ឆ្នាំ បានបង្ហាញពីអារម្មណ៍ផ្ទាល់ខ្លួនក្នុងនាមជាបេក្ខនារីថា «បន្ទាប់ពីខ្ញុំឃើញថាការប្រកួតបវរកញ្ញាចក្រវាលមិនមានកំណត់អាយុ ខ្ញុំបានប្រាប់ខ្លួនឯងថា ខ្ញុំប្រាកដជានឹងប្រកួតប្រជែង។ ពេលនោះកូនប្រុសសួរថា តើម៉ាក់ពិតជាចង់ទៅចូលរួមពិតឬលេងសើច? តែក្រោយមកខ្ញុំបានផ្ញើររូបឲ្យកូនមើល ហើយមិនថាកូននិងចៅៗទេ ពួកគេសុទ្ធតែសរសើរថា ខ្ញុំជាមនុស្សអស្ចារ្យណាស់»។

ដោយឡែក គីម ស៊ុងស៊ីន ដែលជាបវរកញ្ញាសម្រស់មួយរូបបានចូលរួមប្រកួតបវរកញ្ញាចក្រវាលកូរ៉េខាងត្បូងឆ្នាំនេះ នាងបាននិយាយថា ចាប់តាំងពីការប្រលងបានលុបចោលច្បាប់កំណត់អាយុមក។ នៅឆ្នាំនេះមានបេក្ខនារីចម្រុះជាងមុន ដូច្នេះស្តង់ដារសម្រស់សម្រាប់ស្ត្រីបានកើនឡើង និងក្លាយជាប្រវត្តិសាស្ត្រ។

ជាមួយគ្នានេះដែរ លោក Yang Sunmook ដែលជាអ្នកឧបត្ថម្ភការប្រកួត និងជានាយកប្រតិបត្តិនៃ DQ Communications ដែលធ្លាប់ធ្វើការជាមួយស្ថាប័នប្រលងនៅប្រទេសកូរ៉េខាងត្បូងបាននិយាយថា ការប្រលងនេះនឹងជាអ្វីដែលនឹងបង្ហាញនោះ។ ប្រទេសកូរ៉េខាងត្បូងកំពុងមានម៉ូដទាន់សម័យសម្រាប់ពលរដ្ឋវ័យចំណាស់របស់ខ្លួន ដែលអាចត្រូវបានគេមើលឃើញថា បច្ចុប្បន្ននេះ មនុស្សចាស់បានចូលរួមក្នុងសកម្មភាពផ្សេងៗជាច្រើន រួមទាំងការផ្សាយពាណិជ្ជកម្ម, កម្មវិធីទូរទស្សន៍ កម្មវិធីបង្ហាញម៉ូដ និងកម្មវិធីប្រកួតសម្រស់លំដាប់ពិភពលោកជាដើម។

យ៉ាងណាមិញ សម្រាប់លោកយាយ Choi Sunhwa បច្ចុប្បន្ននេះគឺជាម្តាយ និងជាជីដូនដែលធ្វើការជាតារាបង្ហាញម៉ូដអាជីព គាត់ទើបតែដាក់ពាក្យឈរឈ្មោះជាបេក្ខជនតំណាងរាស្រ្តផងដែរ។ ក្នុងន័យនេះដែរ គាត់បានផ្ញើរសាដ៏សំខាន់មួយសម្រាប់មនុស្សវ័យចំណាស់ផ្សេងទៀតថា «ដើរតាមក្តីសុបិនរបស់អ្នក! ជាមួយនឹងទេពកោសល្យផ្ទាល់ខ្លួន ទៅកន្លែងដែលអ្នកអាចស្វែងរកទំនុកចិត្ត ចេញពីផ្ទះ ហើយចូលរួមក្នុងព្រឹត្តិការណ៍សង្គមតាមជម្រើស ដើម្បីធ្វើឲ្យសង្គមមនុស្សចាស់កាន់តែសកម្ម»៕