ប៉ូលីសច្រានចោលការចោទប្រកាន់ទៅលើ Yoo Ah In ករណីរំលោភភេទដូចគ្នា

យោងតាមរបាយការណ៍របស់ប្រព័ន្ធផ្សព្វផ្សាយកាលពីថ្ងៃទី 19 ខែកញ្ញា KST ប៉ូលីសក្រុង Seoul Yongsan បានសម្រេចចិត្តច្រានចោលករណីរំលោភផ្លូវភេទរបស់ Yoo Ah In ដោយសារតែ “ភស្តុតាងមិនគ្រប់គ្រាន់” ។

កន្លងមក ជនដែលជាអ្នកចោទប្រកាន់ ‘A’ បានរាយការណ៍ទៅប៉ូលីសថា Yoo Ah In បានរំលោភផ្លូវភេទពួកគេនៅក្នុងផ្ទះមួយ ក្នុងទីក្រុងសេអ៊ូល កាលពីថ្ងៃទី 14 ខែកក្កដា។ យោងតាមច្បាប់ស្តីពីឧក្រិដ្ឋកម្មផ្លូវភេទ តារាសម្តែងរូបនេះត្រូវបានចោទប្រកាន់ពីបទរំលោភសេពសន្ថវៈស្មើនឹងការចាប់រំលោភ ហើយជនរងគ្រោះ គឺភេទប្រុសដូចគ្នា។

ក្រោយ​ការ​សាកសួរ​ទាំង​ជនជាប់ចោទ និង​ជនរងគ្រោះ សមត្ថកិច្ច​បាន​កំណត់​ថា ករណី​នេះ​ខ្វះ​ភស្តុតាង​គ្រប់គ្រាន់​ដើម្បី​បញ្ជូន​បន្ត​ទៅ​អយ្យការ។

ជាមួយគ្នានេះដែរ នៅក្នុងព័ត៌មានផ្សេងទៀត Yoo Ah In ត្រូវបានកាត់ទោសឱ្យជាប់ពន្ធនាគាររយៈពេល 1 ឆ្នាំ បូកនឹងពិន័យជាប្រាក់ចំនួន 2 លានវ៉ុន នៅថ្ងៃទី 3 ខែកញ្ញា KST ពីបទបំពានច្បាប់គ្រប់គ្រងគ្រឿងញៀន និងពីបទប៉ុនប៉ងបំផ្លាញភស្តុតាង៕

ប្រភព៖ allkpop