ជោគជ័យជីវិតគូ! គង់ ច័ន្ទស្រីមុំ ចែករំលែកបទពិសោធរឿងជីវិតគ្រួសារ

តារាសម្តែង និងជាពិធីការិនី អ្នកនាង គង់ ច័ន្ទស្រីមុំ ត្រូវបានអ្នកគាំទ្រមើលឃើញថា សព្វថ្ងៃនាងមិនត្រឹមតែបោះជំហ៊ានជោគជ័យលើមុខជំនួញផ្ទាល់ខ្លួននោះទេ តែតារាស្រីរូបនេះ ក៏បាននិងកំពុងសាងភាពផ្អែមល្ហែមសម្រាប់ជីវិតគូជាមួយលោក គឹម សីហា ដែលជាស្វាមីយ៉ាងមានក្តីសុខ ពោរពេញដោយសុភមង្គលទៀតផង។

ដើរមកដល់ត្រង់ចំណុចនេះ ក៏ត្រូវបានមហាជនចាត់ទុកថាចំណងស្នេហារបស់អ្នកនាងគង់ ច័ន្ទស្រីមុំ និងស្វាមី បានដើរលើផ្លូវជោគជ័យ និងជាគំរូដល់អ្នកសិល្ប:ឯទៀត។ ទន្ទឹមគ្នានេះដែរ អ្នកនាងបានចែករំលែកនូវបទពិសោធដល់នារីៗថាតើ គួរជ្រើសរើសស្វាមីបែបណាទើបគ្រួសារមានសុភមង្គល។

តារាសម្តែងសាច់ចាំរូបនេះ បានលើកឡើងជាគំនិតដល់អ្នកគាំទ្រថា “សុភមង្គលគ្រួសារ កើតចេញពីការខិតខំសាងឡើងរបស់ប្តីនិងប្រពន្ធ ពិសេសគឺប្តីដែលជាមេគ្រួសារជាបង្គោលដ៏រឹងមាំ បើបង្គោលពុកផុយវានឹងងាយដួលរលំ បើមានមនុស្សប្រុសល្អម្នាក់ជាដៃគូប្រៀបដូចជារើសបានកំណប់មាសអ៊ីចឹង”។

អ្នកនាងបន្តថា បើមានប្តីយល់ចិត្តប្រពន្ធមិនបាច់ហត់នឹងតាមផ្គាប់ចិត្តប្តី ប្រពន្ធមិនចាំបាច់រែកពន់ទុក្ខលំបាកតែម្នាក់ឯង ប្រពន្ធមានប្តីចាំលើកទឹកចិត្ត ប្រពន្ធក្លាយជាមនុស្សស្រីដែលមិនបាច់ខ្វល់ច្រើនពីរឿងគ្រួសារ ព្រោះប្តីចេះជួយសម្រាលទុក្ខ ប្តីចេះខ្លាចប្រពន្ធអន់ចិត្ត ចេះខ្លាចប្រពន្ធលំបាកហត់នឿយ ចេះខ្លាចប្រពន្ធគ្មានក្តីសុខក្នុងជីវិតខ្លាចប្រពន្ធយំ ជាប្តីដែលធ្វើឲ្យមនុស្សស្រីដទៃច្រណែននឹងប្រពន្ធខ្លួន។

គួររម្លឹកថាតារាស្រីអ្នកនាង គង់ ច័ន្ទស្រីមុំ បន្ទាប់ពីរៀបមង្គលការជាមួយស្វាមីគឺ លោក គឹម សីហា រស់នៅសាងសុភមង្គលគ្រួសារក្រោមដំបូលផ្ទះតែមួយហើយនោះ អ្នកនាងក៏ទទួលបានកាដូរពិ​សេ​សពីចំណងអាពាហ៍ពិពាហ៍ដែលជាដំណក់ឈាមរួមគ្នាជាមួយស្វាមីលោក ​គឹម សីហា គឺកូនស្រី​ដ៏ស្រស់ស្អាតម្នាក់។

លើសពីនេះទៀតអ្នកនាង គង់ ច័ន្ទស្រីមុំ បើតា​មការកត់សម្គាល់ទោះបីជាពេលនេះនាងមានស្វាមី និងកូនមួយហើយ មានវ័យក៏រៀងច្រើនបន្តិចមែ​នក្តី ប៉ុន្តែបើសង្កេតឃើញពីរូបសម្ផស្សតារាស្រីរូបនេះ នៅតែរក្សាបានភាពស្រស់ស្អាតមិនចាញ់ក្រមុំឬតារាស្រករក្រោយឡើយ៕ អត្ថបទ៖ ចាន់រ៉ា