ម្ចាស់ផលិតកម្ម LD ប្រកាសថា បើជំនួបវិនិយោគរឿងខ្ទង់ ៨មុឺនដុល្លារ របស់ Allan មិនជោគជ័យ មករកលោក

មុននេះ លោក លៀក លីដា បានចេញមុខមកបញ្ជាក់ជុំវិញការរិះគន់ រឿងប្រវតិ្តស្នេហ៍នាងនាថ វគ្គ១ និងវគ្គ២ ដែលកំពុងចាក់បញ្ចាំង និងទទួលបានការគាំទ្រច្រើនថា ក្រោយការរិះគន់របស់ Allan លើរឿងប្រវត្តិស្នេហ៍នាងនាថ វគ្គ១ លោកគិតថា នោះអាចជាការខកចិត្តក្នុងនាមជាទស្សនិកជន ប៉ុន្តែនៅពេលដែលការរិះគន់នេះ កើតឡើងជាលើកទី២ លោកយល់ថា នោះជាចេតនា និងតាំងចិត្តធ្វើ។

ត្រង់ចំណុចនេះ លោកបញ្ជាក់ថា ក៏ព្រោះតែបុគ្គលរូបនោះ បានបង្ហាញការទន្ទឹងរង់ចាំនូវវគ្គ២ ដោយសរសេរថា “can’t wait” ជាមួយនឹង poster ត្រៀមចេញ បើទោះបីជាខ្លួនធ្លាប់បានបញ្ជាក់ថា ខកចិត្តនឹងវគ្គ១ ខ្លាំងកម្រិតណាក៏ដោយ។

លោក លៀក លីដា ក្នុងនាមជាផលិតករ និងម្ចាស់ផលិតកម្មផ្ទាល់ បានបញ្ជាក់ជាសាធារណៈថា រាល់ការផលិតកុន លោកតែងរកមើលចំណុចខ្វះខាតរបស់ខ្លួនជានិច្ច ទាំងពីអ្នករួមអាជីព និងសាធារណជន ប៉ុន្តែលោកសង្កត់ធ្ងន់ថា ទោះយ៉ាងណា ក៏រឿងនោះ មិនដល់កម្រិតសូន្យនោះដែរ ហើយលោកពិតជាទទួលយកនូវចំណុចខ្វះខាត។ ប៉ុន្តែក្នុងមានជាប្រធានសមាគមផលិតករវ័យក្មេងមួយរូបដែរ លោកចង់ញែកឱ្យដាច់រវាងអ្នកកេងចំណេញពីកុន ដោយសារតែនេះ គឺប៉ះពាល់ដល់វិស័យផលិតកុនទាំងមូល។

ទន្ទឹមនេះ លោកក៏បានបង្ហើបពីអ្នកវិនិយោគរឿងរបស់លោក Mr.Ken ជាមនុស្សតែម្នាក់ដែលបានឆ្លងឆ្លើយការវិនិយោគជាមួយ Allan និងគ្រោងណាត់ជួបផ្ទាល់នៅស្អែកនេះដែរនោះ គឺជាមនុស្សដែលជឿជាក់លើលោកកន្លងមកដែរ ហើយថែមទាំងបានអញ្ជើញលោកចូលរួមជំនួបស្អែកដែរ។ លោកថា លោកបានបដិសេធមិនទៅ ក៏ព្រោះតែលោកយល់ថា បើសិនជាការវិនិយោគនោះ មិនជោគជ័យឬយ៉ាងណា អាចក្រែងថា Allan ចាត់ទុកគាត់ជាអ្នករារាំងដំណើររបស់ខ្លួន។

លោក លៀក លីដា បន្ថែមថា ប៉ុន្តែបើសិនជាការជួបគ្នានឹង Mr.Ken នៅថ្ងៃស្អែកនេះមិនជោគជ័យ អ្នកវិនិយោគបដិសេធមិនវិយោគយ៉ាងណានោះ Allan អាចមករកលោកបាន លោកនឹងហ៊ានទទួលផ្តល់ការវិនិយោគជូន ដោយគ្រាន់តែមានការសន្យាដូចនឹងលោក Sokhorn Oeun ឬ Mr.ken ដែរ។

គួរជម្រាបថា ការឆ្លើយតបនេះ គឺបន្ទាប់ពី Allan បានវាយតម្លៃគុណភាពផលិតកុនដែលកំពុងចាក់បញ្ចាំង របស់ផលិតកម្ម LD និងបានចេញមកអះអាងជាមួយបុគ្គលម្នាក់ថា ខ្លួនអាចផលិតកុនគុណភាពដែលខ្លួនចង់បាន ជាប្រភេទរឿង Sci-fi បាន ដោយថវិការដែលខ្លួនត្រូវការដើម្បីថត ត្រឹមតែ ៨ម៉ឺនដុល្លារ ៕