ផ្ទុះការចាប់អារម្មណ៍ Jin ប៉ះជាមួយតួឯកស្រីរឿង Fifty shade of grey

ផ្ទុះការចាប់អារម្មណ៍ទៅលើតារាចម្រៀងប្រុស Jin បងធំប្រចាំក្រុម BTS បានចូលរួមកម្មវិធី Milan Fashion Week ក្នុងនាមជាឯកអគ្គរដ្ឋទូតរបស់ម៉ាកផលិតផល Gucci។ នៅក្នុងកម្មវិធីបង្ហាញម៉ូដនេះ មានវត្តមានសុទ្ធតែតារាលំដាប់ហូលីវូដដែលមានកេរ្តិ៍ឈ្មោះល្បីល្បាញ។

អ្វីដែលធ្វើឲ្យអ្នកគាំទ្រមានចាប់អារម្មណ៍ជាងគេនោះ Jin ត្រូវបានគេដាក់ឲ្យអង្គុយក្បែរនឹង Dakota Johnson ដែលជាតារាសម្ដែងដ៏ល្បី គេភាគច្រើនស្គាល់នាងតាមរយៈរឿង Fifty shade of grey។ ជាមួយគ្នានេះ Dakota កំពុងតែមានទំនាក់ទំនងជាមួយនឹង Chris Matin ដែលត្រូវជាមិត្តរបស់ Jin ដែលពួកគេច្រៀងចម្រៀងរួមគ្នាបទ My Universe។

ទន្ទឹមនឹងនេះ គេឃើញថា Dakota បង្ហាញការរំភើប និង រួសរាយរាក់ទាក់ដាក់ Jin មែនទែន នាងបានអោបស្វាមគមន៍ ហើយថែមទាំងបានប្រាប់តារាកូរ៉េរូបនេះទៀតថា នាងរីករាយណាស់ដែលបានជួប Jin នាងបានឮពី Jin ច្រើនណាស់ ហើយនៅក្នុងក្លីបមួយ តារាស្រីវ័យ34ឆ្នាំនេះ បានសរសើរថា Jin ពិតជាសង្ហារណាស់។

ជាពិសេស Dakota ថែមទាំងបង្ហាញការយកចិត្តទុកដាក់ទៅកាន់សមាជិក BTS រូបនេះជាខ្លាំង នាងតែងតែសួរនាំ ក្រែងល Jin មានអារម្មណ៍ភ័យ ឬមិនស្រួលត្រង់ណា នាងរីករាយជួយជានិច្ច។ តាមរយៈសកម្មភាពទាំងនេះហើយ Dakota ត្រូវបានអ្នកគាំទ្ររបស់ ​BTS បាក់ចិត្តស្រឡាញ់នាងជាខ្លាំង ដោយនាងមានចរិតគួរឲ្យស្រឡាញ់មែនទែន ពិសេស ព្រោះតែរូបនាង បានបង្ហាញការយកចិត្តទុកដាក់ចំពោះ Jin ដែលធ្វើឲ្យពួកគេសប្បាយចិត្តក្រៃលែង៕

ប្រភព៖ Koreaboo